1 Nofoaga he Tau Patuiki

21 KUA tu mai a Satani ke totoko atu kia Isaraela, kua fakalagalaga atu e ia a Tavita ke totou a Isaraela.

2 Ti pehe age a Tavita kia Ioapo mo e tau iki he motu, Kia o ā mutolu, kia totou a Isaraela ke kamata mai i Peresepa ke hoko atu ki Tano, mo e ta mai ai kia au e katoatoa he totou kia iloa e au, po ke tokofiha a lautolu.

3 Ti pehe age a Ioapo, Kia lafilafi e Iehova ke he hana motu ke tatai mo lautolu kua taki teau; haku a iki na e, ko e patuiki, nakai kia ko e tau fekafekau he haku a iki a lautolu oti? Ko e ha kua finagalo ai haku a iki ke he mena nai? Ke eke he ha a ia mo mena ke nofo a Isaraela mo e hala?

4 Ka e mahala a Ioapo ke he kupu he patuiki, ti fina atu ai a Ioapo, kua faifano a ia i Isaraela oti, ti liu mai a ia ki Ierusalema.

5 Ti ta age e Ioapo e katoatoa he tau tagata he motu he totou kia Tavita. Ko Isaraela oti ne taha afe e tau afe ti taha e teau afe tagata ne toto e pelu. Ko Iuta foki ne fa e teau afe ti fitugofulu e afe tagata ne toto e pelu.

6 Ka e nakai totou a Levi mo Peniamina fakalataha mo lautolu, he vihiatia e Ioapo e poaki he patuiki.

7 Kua kelea e mena na ke he tau fofoga he Atua; ti ta ai e ia a Isaraela.

8 Ti pehe atu a Tavita ke he Atua, Kua hala lahi au, ha kua eke e au e mena na; hanai, kua ole atu au kia koe, kia fakamagalo e koe e mahani kelea he hau a fekafekau, ha kua goagoa lahi ni au.

9 Ti vagahau mai a Iehova ke he tagata kitekite a Tavita ko Kato, kua pehe mai,

10 Kia fano a koe, mo e vagahau kia Tavita, kua pehe age, Kua vagahau mai pehe a Iehova, Tolu e mena ke tuku atu e au kia koe, kia fifili la e koe taha mena he tau mena ia ke eke ai e au kia koe.

11 Ti fina age a Kato kia Tavita, mo e pehe age kia ia, Kua vagahau mai pehe a Iehova, Kia fifili la e koe,

12 Po ke tolu e tau ke hoge ai e motu; po ke tolu e mahina ke fakaoti ai a koe ki mua ha lautolu kua fai fi kia koe, he moua atu a koe he pelu ha lautolu kua fai fi kia koe; po ke tolu e aho ke ha i ai e pelu a Iehova, ko e tatalu ke he motu hau, mo e Agelu a Iehova kua fakaoti ai ke he motu oti a Isaraela. Hanai, kia manamanatu a e koe, po ke heigoa e kupu ke liuaki atu e au kia ia ne fakafano mai au.

13 Ti pehe age a Tavita kia Kato, Kua fakaatukehe lahi ni au; kia veli atu au ke he lima a Iehova, ha kua lahi mahaki hana fakaalofa noa, ka e aua neke veli atu au ke he tau lima he tau tagata.

14 Ti tuku mai ai e Iehova e tatalu kia Isaraela, ti mamate ai e tau tagata Isaraela, ko e fitugofulu e afe tagata.

15 Kua fakafano mai foki he Atua e agelu ki Ierusalema ke fakaoti ai e maga, kua fofoga mai a Iehova, ko e fakaoti ha ne fai e ia e tau tagata ti tokihala a ia ha ko e malaia, ti pehe age a ia ke he agelu ne fakaoti e motu, Tokai, hanai, kia taofi la e koe hau a lima. Ne tu ai e agelu ki luga he mena taholi saito a Aruna ko e tagata Iepusi.

16 Kua haga hake a Tavita, kua kitia e ia e agelu a Iehova kua tu ke he vaha he lalolagi mo e lagi, ha ha he lima hana e pelu kua āki, ne fakaolo atu e ia ki luga a Ierusalema. Ti veveli fakafohifo ai a Tavita mo e tau patu, ne tapulu ai a lautolu ke he ie talatala.

17 Ti pehe atu a Tavita ke he Atua, Nakai kia ko au ne pehe kia totou ai e motu? Ko au ni kua hala, mo e mahani kelea ni au; ka ko e tau mamoe nai ko e heigoa kia kua eke e lautolu? Iehova na e, haku Atua, kua ole atu au kia koe, kia hoko mai hau a lima kia au, mo e magafaoa he haku matua; ka e aua neke hoko atu ke he motu hau ke ta ai a lautolu.

18 Ti pehe age a agelu a Iehova kia Kato, ke pehe atu a ia kia Tavita, kia hake a Tavita mo e eke ai e ia e fatapoa kia Iehova ke he mena taholi saito a Aruna ko e tagata Iepusi.

19 Ti hake ai a Tavita ke lata mo e kupu a Kato, ne vagahau mai e ia ke he higoa a Iehova.

20 Ne haga ki tua a Aruna, ti kitia e ia e agelu; ti fakamumuli hana tau tama tane tokofa ne ha i ai mo ia. Ne taholi saito a Aruna.

21 Kua fina atu a Tavita kia Aruna, kua kitekite atu e Aruna kua kitia e ia a Tavita, ti fina atu ai a ia he mena ne taholi ai e saito, mo e fakaveli fakafohifo ai a ia ke he kelekele kia Tavita.

22 Ti pehe atu a Tavita kia Aruna, Kia ta mai a a e koe kia au e mena taholi saito, kia ati ai e au e fatapoa kia Iehova, kia ta mai a e koe kia au to taui atu e au ke he tau tupe ke lata ai, kia motuhia e tatalu mai he motu.

23 Ti pehe mai a Aruna kia Tavita, Kia uta a māu, mo e eke ai he iki haku ko e patuiki e mena kua finagalo a ia ki ai. Kitiala, kua ta atu e au kia koe e tau povi ke eke mo poa huhunu, mo e tau mena ne taholi aki e saito ke eke mo tau gaafi, mo e tau fua saito ke eke mo poa mena kai; kua ta atu oti e au kia koe.

24 Ti pehe atu e patuiki ko Tavita kia Aruna, Nakai; to fakafua ni e au ia koe ke he tau tupe kua lata ki ai, ha ko e mena nakai uta e au e tau mena hau kia Iehova, ti nakai eke ai e au e tau poa huhunu ke he tau mena kua moua noa.

25 Ti ta atu ai e Tavita kia Aruna ono e teau sikeli auro e mamafa hana.

26 Ti ati ai e Tavita ke he mena ia e fatapoa kia Iehova, ti eke ai e ia e tau poa huhunu, mo e tau poa fakaaue, mo e ui atu a ia kia Iehova; ti tali mai a ia kia ia mo e afi mai he lagi ki luga he fatapoa ne eke ai e poa huhunu.

27 Ti poaki age e Iehova ke he agelu ti liu aki atu e ia hana pelu ke he hana tokaaga.

28 Kua kitia e Tavita ke he aho ia kua fanogonogo mai a Iehova kia ia ke he mena taholi saito a Aruna ko e tagata Iepusi, ti eke poa ai e ia ke he mena ia.

29 Ha ko e faituga a Iehova ne eke e Mose ke he tutakale, mo e fatapoa ne eke ai e poa huhunu, ha ha i ai ke he vaha ia ke he mena tokoluga i Kipeona.

30 Ka e nakai maeke kia Tavita ke fano ki ai ke huhu atu ke he Atua; he matakutaku a ia ke he pelu he agelu a Iehova.