Tau Fakafili

12 TI fakapotopoto ai e tau tagata Efaraimo, kua o age a lautolu ke he fahi tokelau, ti pehe mai a lautolu kia Iefeta, Ko e ha ne fano a koe ke tau mo e fanau a Amoni, ka e nakai ui mai e koe kia mautolu, kia o a tautolu mo koe? To huhunu ni e mautolu hau a fale ke he afi ki luga ia koe.

2 Ti pehe atu a Iefeta kia lautolu, Ne taufetoko lahi a mautolu, ko au mo e haku a motu, mo e fanau a Amoni; ti ui atu ai au kia mutolu, ka e nakai laveaki mai e mutolu au he lima ha lautolu;

3 Ti kitia e au kua nakai laveaki mai e mutolu au, ti tuku e au haku moui ke he haku lima, ti fina age ai au ke he fanau a Amoni; ti tuku mai ai e Iehova a lautolu ke he haku a lima. Ti o mai he ha a mutolu ke he aho nai ke tau kia au?

4 Ti fakapotopoto ai e Iefeta e tau tagata Kiliata oti, ti tau ai a lautolu mo Efaraimo. Kua keli he tau tagata Kiliata a Efaraimo, he pehe age a lautolu, Ko e tau tagata fehola mai Efaraimo, a mutolu na i Kiliata, ha ha i Efaraimo mo Manase.

5 Ne hehele foki he tau tagata Kiliata a Efaraimo ke he hala potaki a Ioritana; ka pehe age foki a lautolu ne fehola he tau tagata Efaraimo, Kia toka au ke fano ke he fahi atu; ti pehe age e tau tagata Kiliata kia ia, Ko e tagata Efaraimo kia a koe? Ti pehe age a ia, Nakai;

6 Ti pehe age a lautolu kia ia, Kia pehe mai a koe, Sihipoleta; ti pehe age a ia Sipoleta, ha kua nakai maeke ke vagahau ai pihia; ti tapaki ai e lautolu a ia mo e keli a ia ke he hala potaki a Ioritana. Ti keli ai e tau tagata Efaraimo ke he vaha ia ne fagofulu e afe ti ua e afe tagata.

7 Ne fakafili ai e Iefeta a Isaraela ke he tau tau ne ono; ti mate ai a Iefeta ko e tagata Kiliata, ti tanu e lautolu a ia ke he taha maga a Kiliata.

8 Kua mole atu a ia, ti fakafili a Ivisona i Petelehema a Isaraela.

9 Ne ha ha ia ia e tau tama tane tokotolugofulu, mo e tau tama fifine tokotolugofulu, ne fakafano kehe e ia hana tau tama fifine tokotolugofulu; ti ta mai kehe ai e ia e tau hoana tokotolugofulu ma e tau tama tane hana; kua fakafili ai e ia a Isaraela ke he tau tau ne fitu.

10 Ti mate a Ivisona, kua tanu ai a ia i Petelehema.

11 Kua mole atu a ia, ti fakafili ai a Isaraela e Elona ko e tagata Sepulona; ti fakafili ai e ia a Isaraela ke he tau tau ne hogofulu.

12 Ti mate a Elona ko e tagata Sepulona; kua tanu ai a ia i Ailona, ke he maga motu a Sepulona.

13 Kua mole atu a ia ti fakafili ai a Isaraela e Avatonu ko e tama a Ileli ko e tagata Piratoni.

14 Ne ha ha ia ia e tau tama tane tokofagofulu, mo e tau tama tane he hana tau tama tane ne tokotolugofulu, ti heke ai e lautolu e tau asini ne fitugofulu; ne fakafili ai e ia a Isaraela ke he tau tau ne valu.

15 Ti mate a Avatonu ko e tama a Ileli ko e tagata Piratoni; kua tanu ai a ia i Piratoni ke he magamotu a Efaraimo ke he mouga he tau tagata Amaleka.