1 Samuela

20 TI hola ai a Tavita i Naiota i Rama, ti fano a ia mo e pehe atu ki mua a Ionatana, Ko e heigoa kia kua eke ai e au? ko e heigoa kia haku a mahani kelea? ko e heigoa foki haku a hala ki mua he matua hau, kua kumi ai e ia ke keli au?

2 Ti pehe mai a ia kia ia, Kia mamao e mena ia; nakai ni mate a koe; kitiala, nakai eke he matua haku ha mena lahi po ke mena tote, ka e talahau mai fakamua a ia ke he haku tau teliga; ti fufu he ha haku matua e mena nai ia au? Nakai ni pihia.

3 Ka kua omonuo ni a Tavita, kua pehe atu Kua iloa ni he matua hau kua ofania au e koe, ti pehe a ia, Aua neke iloa e Ionatana e mena nai, neke mamahi ai a ia, kua moui a Iehova, kua moui foki a koe, ko e moli ni, ko e taha maka ni e lakaaga ke he vaha haku mo e mate.

4 Ti pehe mai ai a Ionatana kia Tavita, Ko e mena kua manako a koe ki ai to eke ai ni e au māu.

5 Ti pehe atu a Tavita kia Ionatana, Kitiala, ko e pula fou e mahina a pogipogi, ti lata ke nonofo fakalataha a maua mo e patuiki, ke kai mena ai; ka e toka e koe au ke fano, ti fakamumuli ai au ke he vao ato hoko ke he afiafi he aho tolu.

6 Kaeke ke kumi e matua hau kia au, ti pehe atu a koe, Ne ole mai e Tavita kia au, kia poi atu a ia ki Petelehema ko e maga hana, ha ko e mena ha ha i ai e poa kua eke ai ke he tau mo e hana magafaoa oti.

7 Kaeke ke pehe a ia, Kua mitaki; ko e monuina haia ke he hau a fekafekau; ka ko e mena ka ita lahi a ia, ti iloa ai kua finagalo vale mai a ia.

8 Ti fakaalofa mai a koe ke he hau a fekafekau; ha ko e maveheaga a Iehova ne eke ai e koe mo e hau a fekafekau; ka ko e mena kaeke ke ha ia au e mahani kelea, kia keli ai e koe au; ke uta he ha e koe au ke he hau a matua?

9 Ti pehe mai ai a Ionatana, Kia mamao ia ia koe, ha ko e mena ane mai kua iloa e au kua fakahiku ai e fifiliaga he haku a matua, ko e hoko ne fai e kelea kia koe po kua tala atu ni e au kia koe.

10 Ti pehe atu a Tavita kia Ionatana, Ko hai kia ke tala mai kia au kaeke ke tali mai ai hau a matua kia koe mo e ita?

11 Ti pehe age a Ionatana kia Tavita, Hau ā ke o a taua ke he vao; ti o ai a laua ke he vao.

12 Ti pehe age a Ionatana kia Tavita, Ko Iehova, ko e Atua a Isaraela, kia kitekite mai a ia, ka oti haku a kamatamata ke he matua haku ke he magaaho pehenai a pogipogi po ke anoiha; kitiala, kaeke ke loto mitaki a ia kia Tavita, kaeke ke nakai fakafano atu e au taha kia koe ke tala atu ai kia koe,

13 Kia eke pihia e Iehova kia Ionatana; mo e lafilafi e ia ki ai; ka ko e mena ka loto e matua haku ke eke fakakelea atu kia koe, mo e fakafano atu e au a koe, ke fano mo e monuina; kia ha ha ia koe foki a Iehova, tuga ne ha i ai a ia mo e haku a matua.

14 Kaeke ke moui agaia au, kia eke ai e koe kia au e fakaalofa a Iehova kia au, ke aua neke mate au; ha ko e mena to mate au,

15 Aua neke toka e koe hau a fakaalofa ke he haku a magafaoa tukulagi, ka kua fakaotioti ai e Iehova mai he fuga kelekele a lautolu oti takitokotaha kua fai fi kia Tavita.

16 Ti eke ai e Ionatana e maveheaga mo e magafaoa a Tavita, kua pehe, Kia kumi e Iehova mai he tau lima ha lautolu kua fai fi kia Tavita.

17 Ti pehe age a Ionatana, ke omonuo foki a Tavita ha kua fakaalofa a ia kia ia; ha kua fakalofa a ia kia ia, tuga hana fakaalofa kia ia ni.

18 Ti pehe age a Ionatana kia ia, Ko e mahina pula fou a pogipogi, ti kumi ai a koe, ha kua nakai nofo ai a koe ke he hau a nofoa.

19 Ka tolu e aho hau, he nofo ti hifo agataha a koe, mo e fina atu ke he mena ne fakamumuli ai a koe ke he aho ne eke ai e mena, ti nofo tata age a koe ke he maka ko Asela.

20 Ko au foki, to fana e au tolu e fana ke he taha fahi hana, tuga ne fana atu e au ke he fakamailoga.

21 Kitiala, to fakafano atu e au e tama ke fano mo e kumi e tau fana; kaeke ke pehe atu ni au ke he tama, Kitiala, ko e tau fana ke he fahi mai nai hāu, kia toto ā; ti hau ai a koe, ha kua monuina a koe, kua nakai ni fai mena; kua moui a Iehova.

22 Ka ko e mena kaeke ke tala atu pehe au ke he taulekaleka, Kitiala, ko e tau fana ke he fahi atu hau; kia fano ā a koe, ha kua fakafano atu e Iehova a koe.

23 Ka ko e mena ne vagahau ai a taua, ko au mo koe, kitiala, ko Iehova ha ha he vaha loto ha taua, ko koe mo au tukulagi.

24 Ti fakamumuli ai a Tavita ke he vao, kua hoko foki ke he mahina pula fou, ti nofo ai e patuiki ke taumafa ai.

25 Kua nofo e patuiki ke he hana nofoa, tuga ne tau aho, ke he nofoa ne tata age ke he kau fale; ti tu ai a Ionatana, ka e nofo a Apineru ke he tapa a Saulo; ka e toka noa ni e nofoa a Tavita.

26 Ka e nakai vagahau ai e Saulo ha kupu ke he aho ia, ha kua pehe a ia, Na kua hoko taha mena kia ia, kua nakai mea a ia, ko e moli ni nakai mea a ia.

27 Kua hoko ke he aho a pogipogi, (ko e aho ua he mahina haia,) kua toka noa foki ni e nofoa a Tavita; ti pehe age ai a Saulo ke he hana tama ko Ionatana, Ko e heigoa kia e mena nakai hau ai e tama a Iese ke kai mena neafi katoa mo e aho nai?

28 Ti tali age a Ionatana kia Saulo, Ne ole mai ni e Tavita kia au ke fano ai a ia ki Petelehema;

29 Kua pehe mai, Kia toka e koe au ke fano; ha ko e mena eke poa ha mautolu a magafaoa ke he maga; ti poaki mai ai haku a matakainaga kia au; hanai, kaeke kua fakaalofa mai a koe kia au; kia toka e koe au ke fano ke fekiteaki a mautolu mo e haku tau matakainaga; ko e mena ia nakai hau ai a ia ke he laulau he patuiki.

30 Ti ita ai a Saulo kia Ionatana kua pehe age, kia ia, Ko e tama he fifine mahani keukeu mo e fakafualoto! nakai kia iloa e au kua fifili e koe e tama a Iese ke fakama ai a koe; mo e fakama ai e nakai fai felevehi he hau a matua fifine.

31 Ha ko e tau aho oti ke moui ai e tama a Iese ke he fuga kelekele nakai fakamau ai a koe mo e hau a kautu; hanai, kia fakafano atu e koe kia ia, mo e ta mai a ia kia au, ha ko e mena to mate ni a ia.

32 Ti tali age a Ionatana ke he hana matua ko Saulo, kua pehe age kia ia, Ke mate a ia he ha? Ko e heigoa kia kua eke e ia?

33 Ti velo ai e Saulo e tao kia ia ke keli a ia; ti iloa ai e Ionatana kua mau tuai hana matua ke tamate a Tavita.

34 Ti matike mai a Ionatana he laulau mo e ita lahi, ti nakai kai mena a ia ke he aho ua he mahina, he mamahi a ia ha ko Tavita, ha kua eke fakakelea hana matua kia ia.

35 Kua hoko ke he aho a pogipogi, ti o atu a Ionatana, mo e tama tote fakalataha mo ia, ke he vao, ke he magaaho ne kotofa ai e laua mo Tavita.

36 Ti pehe age a ia ke he hana tama, Poi atu ā ke kumi e tau fana ka fana atu e au. Kua poi e tama, ti fana atu e ia e fana ke he fahi atu hana.

37 Kua hoko atu e tama ke he mena ne toka ai e fana ne fana atu e Ionatana, ti ui age e Ionatana, ke he tama kua pehe age, Nakai kia ha ha he fahi atu hāu e fana?

38 Ti ui age ai e Ionatana ke he tama, Kia alumaki a, fakaave ā, aua neke tu a koe. Ti okooko ai he tama a Ionatana e tau fana ti ta mai ai e ia ke he hana iki.

39 Kua nakai iloa he tama ha mena, ko Ionatana mo Tavita hoko laua ne iloa ai e mena.

40 Ti ta age e Ionatana hana tau kanavaakau ke he tama ne ha i ai mo ia, kua pehe age a ia kia ia, Fano ā a koe, ti uta e koe e tau mena nai ke he maga.

41 Kua fano e tama, ti matike a Tavita mai he fahi toga, ti fakaveli fakafohifo ai a ia ke he kelekele, ti tukutukuhifo laga tolu a ia, ti tagi ai a laua, mo e taufigita ai a laua, ato homo atu e tagi a Tavita.

42 Ti pehe age a Ionatana kia Tavita, Kia fano a a koe mo e monuina, ha kua omonuo a taua mo au ke he higoa a Iehova, kua pehe, Kia ha i ai a Iehova ke he vaha loto haku mo koe, ke he vaha loto foki he haku a fanau mo e hau a fanau tukulagi. Ti matike ai a ia mo e fano kehe, ka e fano a Ionatana ke he maga.