Hosea

13 NE vagahau a Efaraimo ti tupu ai e vivivivi, ne lilifu a ia i Isaraela; ka e hala a ia ha ko Paala ti mate ai a ia.

2 Ka ko e ainei kua hala mau a lautolu, kua eke e lautolu ma lautolu e tau tupua lapatoa, ko e tau tupua kua eke ke he tau ario ha lautolu, ke lata mo e pulotu ha lautolu, ko e gahua he tau tufuga e tau mena oti ia; kua pehe e tau kupu ha lautolu ki ai, Kia figita ke he tau punua povi e tau tagata kua eke poa.

3 Ko e mena ia to eke a lautolu ke tuga e aolu ke he pogipogi, tuga ne hahau foki kua mole atu ke he magaaho pogipogi; tuga ne tau otaota saito kua havilia he matagi ke he mena ne taholi ai e saito, tuga ne ahua foki mai he hala ke hake ai e ahua.

4 Ka ko au ko Iehova, ko e Atua hau tali he hau a koe he motu ko Aikupito, nakai iloa e koe taha atua ka ko au; nakai iloa foki e koe e fakamoui, ka ko au ni.

5 Ne iloa e au a koe ke he tutakale, ko e motu nakai fai vai.

6 Tuga he fagai a lautolu, pihia he makona a lautolu; ne makona a lautolu, ti fakatokoluga ai e tau loto ha lautolu; ko e mena ia ne nimo au ia lautolu.

7 Ko e mena ia kua eke ai au kia lautolu ke tuga e leona; to takahao ai au tuga e nameri ke he kauhala.

8 To oho atu au kia lautolu tuga ne urosa kua fofo ai hana tau punua to hehe e au e mena ne ufi aki e atefua ha lautolu; to kai ai e au a lautolu ke he mena ia tuga ne leona; to hēhē ai he tau manu favale a lautolu.

9 Isaraela na e, kua mahaikava a koe, he totoko mai a koe kia au, kua totoko a koe ke he hau a lagomatai.

10 Ko fe kia e patuiki hau ainei kia fakamoui ai e ia a koe ke he tau maga oti ha mutolu? ko fe foki hau a tau fakafili ne pehe mai ai a koe, Kia ta mai a kia au e patuiki katoa mo e tau iki?

11 Ne foaki atu e au e patuiki kia koe ke he haku a ita; ne uta kehe foki e au a ia ke he haku a ita lahi.

12 Kua haihai fakalataha e mahani kelea a Efaraimo; kua tatanaki ai hana tau hala.

13 Kua hoko kia ia e mamahi po ke mamahi fanau he fifine kua fatu; ko ia ko e tama nakai fai manamanatu, he nakai lata he mule ai a ia ke he mena kua o hifo ai e tau tama.

14 To laveaki e au a lautolu mai he malolo he tukuaga; to fakamoui e au a lautolu mai he mate. Ko e mate na e, ko fe kia e tatalu ha ha ia koe? Ko e tukuaga na e, ko fe kia e malaia ha ha ia koe? to galo ni ia au e tokihala.

15 Pete he fua loga ai a ia ki mua he tau matakainaga hana, to agi e matagi mai he fahi uta, ko e matagi a Iehova kua hau ai he tutakale, to maha ai hana a tau vaikeli, to mamiti foki hana tau vaipuna; to fakaoti ai e koloa ko e tau mena uho oti.

16 To fakahala ai a Samaria ha ko e hana fakafualoto ke he hana Atua; to veveli ai a lautolu ke he pelu; to palu ke he tau maka e tau tama mukemuke ha lautolu, to ihi ai e tau manava he tau fifine fatu ha lautolu.