Roma

4 KO e hanai, to talahau ha ha e tautolu ke he mena kua lata mo e tino ne moua he matua ha tautolu, ko Aperahamo?

2 Ha ko e mena ane mai kua talahaua tututonu a Aperahamo ke he tau gahua, po kua ha ia ia e mena ke hula ai; ka e nakai ki mua he Atua.

3 Ha kua talahau ha ha kia e Tohi? Ne tua a Aperahamo ke he Atua, ti talahaua ai kia ia ke eke mo tututonu.

4 Ka ko e palepale he tagata ekegahua, kua nakai talahaua ia ko e fakaalofa noa, ka ko e totogi ni.

5 Ka ko ia kua nakai gahua, ka e tua kia ia kua talahaua tututonu e tau tagata matahavala, kua talahaua hana tua ko e tututonu.

6 Tuga foki he talahaua e Tavita e monuina he tagata kua talahaua ki ai he Atua e tututonu, ka e nakai ha i ai e tau gahua,

7 Uhoaki a lautolu kua fakamagalo ha lautolu a tau holifono, kua ufia foki ha lautolu a tau hala.

8 Uhoaki e tagata kua nakai talahaua he Iki kua hala.

9 Hanai po kua fakaigati kia e fakamonuina nei kia lautolu kua peritome? po ke hoko foki kia lautolu kua nakai peritome? Nukua pehe a tautolu, Kua talahaua e tua a Aperahamo ko e tututonu.

10 Ne talahaua a ia ka kua fefe? Ne peritome kia a ia, po ke nakai la peritome? Nakai talahaua a ia ka kua peritome, ka e talahaua a ia ka kua nakai la peritome.

11 Ne moua foki e ia e fakamailoga, ko e peritome haia, ko e fakamoli ia ke he tututonu ha ha he tua ka kua nakai la peritome a ia; kia eke ai a ia mo matua kia lautolu oti kana kua tua ka e nakai peritome, kia talahaua kia lautolu foki e tututonu;

12 Kia eke foki a ia mo matua kia lautolu kua peritome, ka e nakai kuenaia a lautolu kua peritome, ka ko lautolu foki kua o ke he tau tuaga hui he tua he matua ha tautolu, ko Aperahamo, ka kua nakai la peritome a ia.

13 Ha ko e mena nakai ko e fakatufono ne talahaua ai kia Aperahamo, po ke hana fanau, ke eke māna e lalolagi ka ko e tututonu ha ha he tua.

14 Ha ko e mena kaeke ko e tau hakeaga a lautolu ha he fakatufono, ti kua eke e tua mo mena nakai aoga, kua noa foki e kupu kua talahau.

15 Ha ko e fakatufono kua tupu mai ai e ita; ha ko e mena ka nakai fai fakatufono ti nakai fai holifono.

16 Hanai ne moua ai ke he tua kia moua he fakaalofa noa; kia tumau e kupu ne talahaua ke he faoa gotoa, nakai kia lautolu hoko lautolu ha ha he fakatufono, ka e katoa foki mo lautolu ha ha i ai e tua a Aperahamo, ko ia haia ko e matua ha tautolu oti kana,

17 (Tuga he tohi mai, Kua kotofa e au a koe ke eke mo matua ke he tau motu loga,) ki mua he Atua, ko ia ne tua a ia ki ai, ko e fakamoui a ia ha lautolu kua mamate, kua ui foki a ia ke he tau mena nakai ha i ai, tuga he ha ha i ai.

18 Ko ia ne tua mo e amaamanaki ka e nakai fai mena ke amaamanaki ki ai, kia eke a ia mo matua he tau motu loga, tuga he talahau mai, To pihia hāu a tau fanau.

19 Kua nakai tua fakalolelole foki a ia ti nakai manatu e ia kua mate tuai hana tino, (na ko e teau hana tau tau), mo e manava foki a Sara kua mate;

20 Nakai ko e mena mahalohalo noa a ia mo e nakai tua ke he kupu ne talahau he Atua; ka e fakamalolo a ia ke he tua, kua tuku atu e ia e fakahekeaga ke he Atua,

21 Ne mau foki hana manatu kua maeke ia ia ke eke e mena ne talahau mai e ia.

22 Ko e mena foki ia, kua talahaua ai kia ia ko e tututonu.

23 Ka e nakai tohi mai ha ko ia ni hokoia, Kua talahaua ai kia ia;

24 Ka ko tautolu foki, ke talahaua ki ai, ko tautolu haia kua tua kia ia ne fakatu mai e Iki ha tautolu ko Iesu, mai ia lautolu kua mamate;

25 Ne tuku mai a ia ha ko e tau hala ha tautolu, ne liu foki fakatu mai a ia kia talahaua tututonu ai a tautolu.