Fakakiteaga

6 NE kitia foki e au kua vevete he Punua mamoe e taha he tau fakamau fakamailoga, ti logona ai e au e taha he tau mena moui ne fa, kua leo po ke pakulagi, kua pehe mai, Hau ā ke kitekite.

2 Ti kitia ai e au, kitiala, ko e solofanua hina, ha ia ia foki kua heke ai e kaufana; kua ta age foki ki ai e foufou, ti fina atu ai a ia kua kautu, to kautu ni a ia.

3 Kua vevete foki e ia e fakamau fakamailoga ne ua, ti logona ai e au e mena moui ne ua, kua pehe mai, Hau ā ke kitekite.

4 Ti fina atu ai e taha solofanua kua kula; kua ta age foki e pule kia ia kua heke ai ke uta kehe e mafola mai he lalolagi, kia fekeliaki ai a lautolu; kua ta age foki kia ia e pelu lahi.

5 Kua vevete foki e ia e fakamau fakamailoga ne tolu, ti logona ai e au e mena moui ne tolu, kua pehe mai, Hau ā ke kitekite. Ti kitia ai e au, kitiala, ko e solofanua uli; ha he lima hana kua heke ai e fua tautau.

6 Ne logona foki e au e leo mai he vaha he tau mena momoui ne fa, kua pehe mai, Ko e totogi he koini saito ko e taha tenari ia, ko e totogi foki he tolu a koini karite ko e taha tenari ia, aua foki neke moumou e koe e puke lolo mo e uaina.

7 Kua vevete foki e ia e fakamau fakamailoga ne fa, ti logona ai e au e mena moui ne fa, kua pehe mai, Hau ā ke kitekite.

8 Ti kitia ai e au, kitiala, ko e solofanua kula tea, ko e higoa foki hana kua heke ai ko e Mate, kua mui foki a Hate kia ia; kua ta age foki kia laua e pule ke kelipopo e vahega ne fakafa aki e lalolagi ke he pelu, mo e hoge, mo e mate, katoa mo e tau manu favale he vao.

9 Kua vevete foki e ia e fakamau fakamailoga ne lima, ti kitia ai e au i lalo hifo he fatapoa e tau agaga ha lautolu ne kelipopo ha ko e kupu he Atua, mo e talahauaga ne taofi ai e lautolu.

10 Kua tauui a lautolu mo e leo lahi, kua pehe atu, Ko e Iki na e, ko e tapu, mo e fakamoli, ato a fe kia he nakai fakafili e koe, mo e taui ha mautolu a tau toto kia lautolu kua nonofo ke he lalolagi?

11 Ti kua ta age kia lautolu takitokotaha e tau tapulu hina; kua tala age foki kia lautolu ke tatali fakatekiteki ke he vaha tote, ato katoatoa mai ai ha lautolu a tau matakainaga a fekafekau, katoa mo e ha lautolu a tau matakainaga, kua nakaila kelipopo tuga na lautolu ni.

12 Kua vevete foki e ia e fakamau fakamailoga ne ono, ti kitia ai e au, kitiala, ko e mafuike lahi kua to, ko e la foki kua faliu a ia kua uli tuga ne ie fulufulu talatala, ko e mahina foki kua faliu tuga ne toto,

13 Ko e tau fetu foki he lagi kua to ke he lalolagi, tuga ne mati kua fakamokulu hana tau fua mata ka luelue he matagi lahi;

14 Ko e lagi foki kua mole atu ia tuga ne tohi kua vakai, ko e tau mouga foki mo e tau motu oti, kua uta kehe a lautolu mai he tau mena ne toka ai a lautolu;

15 Ko e tau patuiki foki he lalolagi, mo e tau iki, mo e tau maukoloa, mo e tau iki he tau kau, mo e tau toa, mo e tau tupa oti, mo e tau tagata toka noa oti, kua fakamumuli a lautolu ke he tau ana mo e tau kaumaka he tau mouga;

16 Kua pehe age foki a lautolu ke he tau mouga mo e tau kau maka, Mafuluhi mai a ki luga ia mautolu, mo e ūfi aki a mautolu mai he fofoga hana kua nofo ke he nofoaiki, mo e ita he Punua mamoe;

17 Ha kua hoko mai e aho lahi he hana ita, ko hai foki kua maeke ke tu atu?