2 Korinito

5 HA kua iloa e mautolu kaeke ke vete e fale api ha mautolu ha ha he lalolagi, ha ha ia mautolu e fale mai he Atua, ko e fale nakai eke he tau lima, ke tumau tukulagi ke he lagi.

2 Ha kua oi a mautolu ke he fale nai; kua manako lahi he fia fakatapulu mai a mautolu ke he fale ha mautolu mai he lagi.

3 Kaeke foki ke fakatapulu mai a mautolu, ti nakai moua a mautolu kua noa mo e felevehi.

4 Ha ko mautolu ni ha ha he fale api nai, kua oi a mautolu he pehia; ha kua nakai loto a mautolu ke vevete kehe e tapulu ka kia fakatapulu ai, kia mahala e mena mole vave ke he moui.

5 Ka ko ia kua taute a mautolu mo e mena ia ni, ko e Atua haia; ko ia foki kua foaki mai e fakamoli he Agaga kia mautolu.

6 Hanai, kua fakamalolo a mautolu nakai noa, ha kua iloa e mautolu, ka nonofo ai a mautolu ke he tino kua nofo kehe mo e Iki;

7 (Ha ko e tua kua o fano ai a mautolu, ka e nakai ko e fakakite mai he tau mena;)

8 Kua fakamalolo a mautolu, kua mua foki ha mautolu a manako ke o kehe mo e tino, kia nonofo a mautolu mo e Iki.

9 Hanai, kua fakamalolo a mautolu, po ke ha he tino, po ke nakai ha i ai kia fiafia mai ai a ia kia mautolu.

10 Ha ko e mena ke tutu a tautolu oti kana ki mua he nofoa fakafili a Keriso ke lata ai; kia takitokotaha mo e moua e tau mena ne eke ke he tino, ke fakalata ke he tau mena ne eke, po ke mitaki, po ke kelea.

11 Hanai, ha kua iloa e mautolu e matakutaku ke he Iki, kua ole a mautolu ke he tau tagata; kua fioia he Atua a mautolu, kua taofi foki au kua iloa a mautolu he tau loto manamanatu ha mutolu.

12 Ha kua nakai liu foki talahau mitaki e mautolu a mautolu kia mutolu, ka kua ta atu e mautolu kia mutolu e mena ke fiafia ai a mutolu ha ko mautolu, kia fai mena a mutolu ke tala age kia lautolu kua hula ke he tau mena he tino, ka e nakai ko e loto.

13 Ha ko e mena kaeke ke heketia a mautolu ha ko e Atua haia, kaeke ke loto matala a mautolu, ha ko mutolu haia.

14 Ha kua omoomoi a mautolu he fakaalofa a Keriso, kua manatu pehe a mautolu, kaeke kua mate tokotaha ke hukui aki e tau tagata oti kana, ti kua mamate tuai e tau tagata oti kana;

15 Ne matulei foki a ia ke hukui aki e tau tagata oti, kia nakai omaoma a lautolu kua momoui kia lautolu ni, ka ko ia ne matulei, mo e liu tu mai foki ke hukui aki a lautolu,

16 Hanai, kua kamata ke he vaha nai he nakai tuai iloa e mautolu taha ke he tino; pete ni he iloa tuai e mautolu a Keriso ke he tino, ka ko e vaha nai nakai tuai iloa pihia e mautolu a ia.

17 Hanai, kaeke ke ha ia Keriso taha, ko e tagata fou a ia, kua mole atu e tau mena tuai; kitiala, kua fakafou e tau mena oti.

18 Ka ko e tau mena oti kana, mai he Atua ia, ko ia kua fakafeilo tuai a tautolu kia ia ia lesu Keriso, kua tuku mai foki kia mautolu e gahua he fakafeilo;

19 Hanai, ne ha ia Keriso a Atua, kua fakafeilo e ia e lalolagi kia ia, nakai talahau ha lautolu a tau hala kia lautolu; kua tuku mai foki kia mautolu e fekafekauaga he fakafeilo.

20 Hanai, ko e tau fekau a Keriso a mautolu nai, tuga he ole he Atua kia mutolu ia mautolu; kua hukui aki e mautolu a Keriso mo e ole atu kia mutolu kia fakafeilo a mutolu mo e Atua.

21 Ha ko ia kua nakai iloa e hala, kua eke a ia mo hala ke hukui aki a tautolu; kia eke ai a tautolu mo tututonu he Atua kia ia.