2 Nofoaga he Tau Patuiki

21 NE takoto a Iehosafata fakalataha mo e hana tau matua, ti tanu ai a ia fakalataha mo e hana tau matua ke he maga a Tavita. Ti eke a Iehoramo ko e tama hana mo patuiki ke hukui aki a ia.

2 Ne fai matakainaga foki a ia, ko e tau tama tane a Iehosafata, ko Asaria, mo Iehielu, mo Sakaria, mo Asaraia, mo Mekaeli, mo Sefatiao; ko e tau tama oti ia he patuiki a Iuta ko Iehosafata.

3 Ne foaki atu he matua tane ha lautolu kia lautolu e tau mena fakaalofa loga, ko e tau ario, mo e tau auro, mo e tau koloa uho, katoa mo e tau maga nonofo taue i Iuta; ka e foaki atu e ia e kautu kia Iehoramo ha ko e tama uluaki a ia.

4 Kua moua e Iehoramo e kautu he hana matua, ti fakamalolo ai a ia mo e kelipopo e ia hana tau matakainaga oti ke he pelu, katoa foki mo e falu a iki Isaraela.

5 Ko e tolugofulu ma ua e tau tau a Iehoramo he eke a ia mo patuiki; ti valu e tau ne eke a ia mo patuiki i Ierusalema.

6 Ne fano a ia ke he puhala he tau patuiki a Isaraela, tuga he eke he magafaoa a Ahapo; ha kua eke e tama fifine a Ahapo mo hoana hana; ne eke ai e ia e mahani kelea ki mua a Iehova.

7 Ka e nakai finagalo a Iehova ke fakaoti e magafaoa a Tavita, ha ko e maveheaga ne eke ai e ia mo Tavita, tuga he talahau mai e ia, ke foaki mai e lamepa kia ia mo e fanau hana ke he tau aho oti.

8 Ko e vaha ne patuiki ai a ia ne fakafualoto ai a Etoma kia Iuta, ti eke e lautolu e patuiki ma lautolu.

9 Ti o age ai a Iehoramo mo e tau iki ha ha ia ia, katoa mo e hana tau kariota oti fakalataha mo ia; ti matike ai a ia he po, mo e keli e tau tagata Etoma ne agaagai kia ia, katoa mo e tau iki he tau kariota.

10 Ka kua fakafualoto a Etoma ke he pule a Iuta, ke hoko mai ke he aho nai. Ko e vaha ia foki ne fakafualoto ai a Lipena ke he pule hana; ha kua tiaki e ia a Iehova ko e Atua he hana tau matua.

11 Ne eke foki e ia e tau mena tokoluga ke he tau mouga a Iuta, mo e fakatupu ai e ia e feuaki kia lautolu ne nonofo i Ierusalema, mo e uhu kehe e ia a Iuta.

12 Ne ta mai foki kia ia e tohi mai he perofeta ko Elia, kua pehe mai, Kua vagahau mai pehe a Iehova ko e Atua he matua hau ko Tavita, Nakai fano a koe ke he tau puhala he matua hau ko Iehosafata, mo e tau puhala he patuiki a Iuta ko Asa.

13 Ka kua fano a koe ke he puhala he tau patuiki a Isaraela, mo e fakatupu ai e koe e feuaki kia Iuta, mo lautolu kua nonofo i Ierusalema, tuga ne feuaki e magafaoa a Ahapo, kua kelipopo foki e koe e tau matakainaga hau, ko e magafaoa he hau a matua tane, ne mua e mitaki e mahani ha lautolu ke he mahani hau;

14 Kitiala, ko e mena ia kua fakahoko mai e Iehova e malaia lahi ke he motu hau, mo e fanau hau, mo e hau a tau faoa fifine, mo e hau a tau koloa oti;

15 Ko koe foki to gagao lahi ni a koe, ko e gagao ke tupu ai he manava hau, atu mokulu ai e gakau hau ha ko e gagao ke he taha aho mo e taha aho.

16 Ne fakaohooho foki e Iehova e tau tagata Filisitia, mo e tau tagata Arapi, ne tata age ke he tau tagata Aitiope, ke tau mo Iehoramo.

17 Ti o hake a lautolu ki Iuta mo e heia atu ai, mo e uta e lautolu e tau koloa oti ne moua ai e lautolu ke he fale he patuiki, ko e hana tau tama tane foki, mo e hana tau hoana, nakai toe ai ha tama tane māna, ka ko Iehoahasa ko e hana tama tane fakamui.

18 Kua mole atu e tau mena oti ia ti ta ai e Iehova a ia ke he gagao ke he hana manava nakai maeke ke fakamalolo ai a ia.

19 Kua mole atu e tau aho loga, kua katoa e tau tau ne ua, ti mokulu ai hana gakau ha ko e gagao hana; ti mate ai a ia he gagao kelea. Nakai tafu ai he motu hana e afi ha ko ia, tuga ne tafu ai e lautolu e tau afi ha ko e tau matua hana.

20 Ne tolugofulu ma ua e tau hana he eke a ia mo patuiki, ti valu e tau ne patuiki ai a ia i Ierusalema. Ne fano a ia ti nakai manako taha kia ia. Ti tanu e lautolu a ia ke he maga a Tavita, ka e nakai tuku a ia ke he tukuaga he tau patuiki.