Hakai

Ko e Tohi a Hakai

1 KO e tau ua he patuiki ko Tariu, ko e ono mahina, ko e aho fakamua he mahina, ne hoko mai ai e kupu a Iehova ke he perofeta ko Hakai kia Serupapelu ko e tama a Salatielu, ko e iki ne pule kia Iuta, katoa mo Iosua ko e tama a Iosataka ko e ekepoa ne mua, kua pehe mai,

2 Kua pehe e vagahau a Iehova Sapaota, kua pehe mai, Kua pehe mai e motu nai, Nakaila hoko ke he aho, ko e aho ke eke ai e fale a Iehova.

3 Ti hoko mai ai e kupu a Iehova ke he perofeta ko Hakai, kua pehe mai,

4 Ko e vaha nai kia ke nonofo ai a mutolu ke he tau fale ha mutolu kua ufi aki e tau lapa, ka ko e fale nai kua eke mo mena kua moumou.

5 Hanai kua pehe mai e vagahau a Iehova Sapaota, Kia manamanatu ā mutolu ke he ha mutolu a tau mahani.

6 Kua gana e mutolu e tau mena loga ka e gahoa e mena kua moua ai, kua kai a mutolu ka e nakai makona ai a mutolu, kua inu a mutolu ka e nakai makona ai a mutolu he inu; kua tapulu a mutolu ka e nakai mafana ai taha; ko ia foki kua gahua ke palepale kua tuku e ia hana palepale ke he kofukofu tupe kua pūpū.

7 Kua pehe mai e vagahau a Iehova Sapaota, Kia manamanatu a mutolu ke he ha mutolu a tau mahani.

8 Kia o hake a mutolu ke he mouga, mo e ta mai ai e mutolu e tau akau, mo e eke ai e mutolu e fale; ti fiafia au ki ai, to fakaheke ai foki au, kua pihia mai a Iehova.

9 Ne amaamanaki a mutolu ke he tau mena loga, ti kitiala, kua gahoa; ne ta mai ai e mutolu ke he tau fale, ti uulo au ki ai. Ko e ha? kua pihia mai a Iehova Sapaota. Ha ko e fale haku kua eke mo mena kua moumou, ka e takitaha a mutolu mo e poi atu ke he hana ni a fale.

10 Ko e mena ia kua taofi ai e lagi i luga ha mutolu, ke aua neke to mai ai e hahau, ko e kelekele foki kua taofi ai e ia hana tau fua.

11 Ne ui foki e au ke lā ai ki luga he kelekele mo luga foki he tau mouga, ki luga foki he tau saito, ki luga foki he uaina, ki luga foki he puke lolo, mo luga he tau mena kua tutupu ai he kelekele, mo luga he tau tagata, mo luga he tau manu huifa, ki luga foki he tau gahua oti he tau lima ha mutolu.

12 Ti fanogonogo ai a Serupapelu ko e tama a Salatielu, mo Iosua ko e tama a Iosataka, ko e ekepoa ne mua, katoa mo lautolu oti ne toe he motu, ke he leo a Iehova ha lautolu a Atua, mo e tau kupu he perofeta ko Hakai, ke lata mo e tau mena ne fakafano mai ai a ia e Iehova ha lautolu a Atua; kua matakutaku foki e motu kia Iehova.

13 Ti tala age a Hakai ko e fekau a Iehova ko e fekau a Iehova ke he motu kua pehe age, Kua pehe mai a Iehova, Ko au, ha ha i ai au mo mutolu.

14 Ti fakalagalaga ai e Iehova e loto a Serupapelu ko e tama a Salatielu, ko e iki ne pule kia Iuta, mo e loto a Iosua ko e tama a Iosataka ko e ekepoa ne mua, mo e tau loto ha lautolu oti ne toe he motu; ti o mai ai a lautolu mo e eke ai e lautolu e gahua he fale a Iehova Sapaota ha lautolu a Atua,

15 Ke he aho uafula ma fa, he ono mahina ke he tau ua he patuiki ko Tariu.