Fakakiteaga

8 KUA vevete foki e ia e fakamau fakamailoga ne fitu, ti fakafenono ai a lautolu ha he lagi tokai kua hoko ke he tuloto he magaaho taha.

2 Ne kitia foki e au e tau agelu ne tokofitu, ko lautolu ne tutu ki mua he Atua, kua āge foki kia lautolu e fitu a pu.

3 Kua hau foki e taha agelu, mo e tu mai a ia ke he tapa he fatapoa, ha ha ia ia e kapiniu auro ke fakavela ai e tau mena manogi; kua ta age foki kia ia e tau mena manogi ne loga ke huhunu, kia ta atu ai katoa mo e tau liogi he tau tagata tapu oti ki luga he fatapoa auro ha i mua he nofoaiki.

4 Kua hake foki e ahua he tau mena manogi ha he lima he agelu, katoa mo e tau liogi he tau tagata tapu, ki mua he Atua.

5 Kua toto foki he agelu e kapiniu ke fakavela ai e tau mena manogi, ti fakapuke ai e ia ke he afi mai he fatapoa, kua liti hifo ke he lalolagi; ti ha i ai e tau leo, mo e tau pakulagi, mo e tau uhila, mo e mafuike.

6 Ko e tau agelu foki ne tokofitu ha i ai e tau pu ne fitu, kua tauteute e lautolu ke ulo.

7 Kua ulo foki he agelu fakamua e pu, ti ha i ai e tau uha tuli, mo e afi kua fiofio mo e toto, kua liti hifo ke he lalolagi; ti huhunu ai e taha veveheaga ne tolu aki e tau akau, ti huhunu foki mo e tau motietie moui oti kana.

8 Kua ulo foki he agelu ne tokoua aki e pu, ti ha i ai ke tuga e mouga lahi kua vela he afi, kua liti hifo ke he tahi; ti faliu toto ai e taha fahi ne tolu aki e tahi.

9 Ti mamate ai e taha vahega ne tolu aki e tau mena momoui ha he tahi, katoa mo e taha veveheaga ne tolu aki e tau foulua kua fakamoumou.

10 Kua ulo foki he agelu ne tokotolu aki e pu, ti to mai he lagi e fetu lahi kua vela po ke lamepa, mo e to hifo ke he taha veveheaga ne tolu aki e tau vailele katoa mo e tau vaipuna.

11 Kua higoa foki e fetu ko e Kona; ti kona ai e taha veveheaga ne tolu aki e tau vai, kua mamate foki e tau tagata tokologa he vai, ha kua fakakona.

12 Kua ulo foki he agelu ne tokofa aki e pu, ti ta ai e taha fahi ne tolu aki e la, mo e taha fahi ne tolu aki e mahina, mo e taha vahega ne tolu aki e tau fetu, kia pouligia e tau vahega ne tolu aki a lautolu, kia nakai maama foki e aho ke he magaaho ne tolu aki, pihia foki mo e po.

13 Ne kitia foki e au, mo e logona e taha agelu kua lele ke he puloto he lagi, kua pehe mai mo e leo lahi, Oi, oi, oi kia lautolu kua nonofo ke he lalolagi, ha ko e tau leo kua toe he tau pu he tau agelu tokotolu ko e ulo la ne fai.