Mareko

8 KO e vaha ia kua tokologa lahi ai e lanu tagata, ti nakai fai mena ke kai a lautolu, ti ui atu ai a Iesu ke he hana tau tutaki, mo e tala age kia lautolu.

2 Kua hofihofi haku a fakaalofa ke he lanu tagata ha ko e aho tolu ainei he nonofo a lautolu mo au, ti nakai fai mena kai a lautolu.

3 Kaeke foki ke fakafano e au a lautolu ke he tau faoa ha lautolu mo e hoge ti mamate a lautolu he magahehala; ko e mena mamao e tau mena ne o mai ai e falu ia lautolu.

4 Ti tala age ai hana tau tutaki kia ia, Mai fe kia e areto ke maeke ai ia taha ke fagai a lautolu ke he tutakale nai?

5 Kua hūhu age a ia kia lautolu, Po ke ne fiha ha mutolu a tau areto? ti pehe a lautolu, Ne fitu la.

6 Kua tala age foki a ia ke he tau tagata kia tatakoto a lautolu ke he kelekele; ti toto ai e ia e fitu e areto, kua fakaaue, ti tofitofi, mo e age ke he hana tau tutaki, kia fakatokatoka age e lautolu ki ai; ti fakatokatoka ai e lautolu ke he moto tagata.

7 Ha i ai foki ia lautolu e tau ika ikiiki gahoa; ti fakaaue ai a ia, mo e tala age foki ke fakatokatoka ai.

8 Ti kai ai a lautolu, kua makona; kua uta foki fitu e kato he tau mena ne toe.

9 Ko lautolu foki ne kai tokai ko e fa e afe; ti fakafano atu e ia a lautolu.

10 Ti hake agataha a ia, mo e hana tau tutaki ke he foulua, kua o age ke he fahi ko Tamanuta.

11 Ti o mai e tau farasaio, kua kamata ke hūhu kia ia, mo e kumi atu kia ia e taha fakamailoga mai he lagi, kua kamatamata e lautolu a ia.

12 Ti oi ai ni a ia he hana finagalo, mo e pehe age Ko e heigoa e mena ne kumi ai he hau nai e fakamailoga? Ko e moli ke tala atu ne au kia mutolu, nakai fakai taha fakamailoga ke ta atu ke he hau nai.

13 Ti toka e ia a lautolu, kua liu hake foki a ia ke he foulua, kua haele ke he fahi atu.

14 Kua nimo ia lautolu nakai uta e tau mena kai, taha maka ne areto ha ha ia lautolu ke he foulua.

15 Ne tomatoma atu foki e ia kia lautolu, kua pehe age, A mutolu, kia kalo kehe a mutolu mo e mena fakaea he tau farasaio, mo e mena fakaea a Herota.

16 Kua fevagavagahauaki ai a lautolu, kua pehe, Na kua pihia he nakai fai mena kai a tautolu.

17 Kua fioia e Iesu, ti tala age ai a ia kia lautolu, Ko e heigoa e mena ne fevagavagahauaki ai a mutolu he nakai fai mena kai a tautolu? Nakai kia la iloa e mutolu, ti nakai kia la logona e mutolu? Kua mao agaia kia ha mutolu a tau loto?

18 Ha ha ia mutolu e tau mata, ka e nakai kia kitia e mutolu? Ha ha ia mutolu foki e tau teliga, ka e nakai kia logona e mutolu? ti nakai kia manatu a mutolu?

19 Ne tofitofi e au e lima e areto ke he lima e afe tagata, ti fiha kia e kato ne puke he tau mena kai ne toe ne uta e mutolu? Ti pehe a lautolu kia ia, Ne hogofulu ma ua ni.

20 Katoa mo e fitu ke he fa e afe, ti fiha kia e kato kua puke he tau mena kai ne uta e mutolu? Ti pehe ai a lautolu, Ne fitu la.

21 Ti tala age a ia kia lautolu, Po ke nakai logona fefe e mutolu?

22 Kua hoko a ia ki Petesaita, ti kua ta mai ai e lautolu e tagata matapouli kia ia, mo e olelalo a lautolu kia ia, kia piki age a ia kia ia.

23 Ti toto ai e ia e lima he matapouli, mo e takitaki a ia ki tua he māga. Ti anu a ia ke he tau mata hana, ti fakalago ai e ia hana a tau lima kia ia, mo e hūhu atu ki ai, po ke ne kitia nakai e ia ha mena?

24 Kua haga hake a ia, ti pehe mai a ia, Kua kitia e au e tau tagata, tuga ne tau akau a lautolu ha ne o he kitia e au.

25 Ti liu tuku ai e ia hana tau lima ke he hana tau mata, kua tala age kia ia, ke haga hake; kua mitaki tuai a ia, kua kitia mitaki foki e ia e tau mena oti.26 Ti fakafano atu ai e ia a ia ke he fale hana, kua pehe atu, Ua fano a koe ke he māga, ti ua tala age e koe kia taha ke he māga.

27 Kua o atu a Iesu mo e hana tau tutaki ke he tau māga i Kaisaria Filipi; ha ha he magahehala a lautolu, ti hūhu atu a ia ke he tau tutaki hana, kua pehe atu kia lautolu, Po ke heigoa e kupu he tau tagata kia au nai po ko hai?

28 Ti tala age ai a lautolu, Ko Ioane papatiso; ka ko e falu, Ko Elia; ka ko e falu foki, Ko e taha he tau perofeta.

29 Ti pehe a ia kia lautolu, Ka ko mutolu na, po ke heigoa ha mutolu a kupu kia au nai, po ko hai? Ti tala age a Peteru, kua pehe age kia ia, Ko koe ni ko e Keriso.

30 Ti hataki atu ai e ia a lautolu neke talahau atu e lautolu a ia kia taha.

31 Ti kamata ai a ia ke fakaako kia lautolu, ko e mena lata ke mamahi e Tama he tagata he tau mena loga; ke tiaki foki a ia he tau patu, mo e tau ekepoa ne mua, mo e tau tohikupu, ke kelipopo foki a ia; ka mole tolu e aho to tu mai.

32 Ne talahau fakatonu e ia e kupu na, ti takitaki age ai a ia e Peteru, kua kamata ke hataki a ia.

33 Ka e tafilu atu a ia mo e kitekite age ke he tau tutaki hana, ti hataki atu ai e ia e Peteru, kua pehe atu, Satani na e, ati fano a ki tua haku; ha ko e mena nakai loto atu a koe ke he tau mena he Atua, ka ko e tau mena he tau tagata.

34 Ti ui atu a ia ke he lanu tagata, katoa mo e hana tau tutaki, kua pehe atu kia lautolu, Ko e tagata ne fia mui mai kia au, aua neke oma e ia a ia, ka e nikiti e ia hana satauro, mo e mui mai kia au.

35 Ka ko e tagata kua fia kuku hana moui, to moumou ai kia ia; ka ko ia ke moumou hana moui ha ko au ni, mo e vagahau mitaki to fakamoui ai e ia.

36 Ha kua aoga ha ha ke he tagata, kaeke kua moua e ia e lalolagi oti, ka e moumou ai hana moui?

37 Po ke heigoa foki e mena ke ta atu he tagata ke totogi aki hana moui?

38 Ka ko e tagata ke ma ia au, mo e haku a tau kupu ke he hau nai kua faivao mo e hala, to ma foki e Tama he tagata kia ia, ka hau a ia fakalataha mo e tau agelu tapu hana, mo e lilifu he hana Matua.