Ioane

2 KUA tu e aho tolu, kua eke e taonaga i Kana i Kalilaia; ha i ai foki e matua fifine a Iesu.

2 Ne ui foki kia Iesu mo e hana tau tutaki ke o age ke he taonaga.

3 Kua oti foki e uaina, ti tala age e matua fifine a Iesu kia ia, Kua nakai fai uaina a lautolu.

4 Kua tala mai a Iesu kia ia, Teme na e, ko e heigoa kia hāu kia au? nakaila hoko foki ke he haku a magaaho.

5 Kua tala age hana matua fifine ke he tau fekafekau, Ko e hana ka tala mai ai kia mutolu, kia eke e mutolu.

6 Ne toka ai ke he mena ia ono e vai maka, takiua po ke takitolu e paita he tau vai, ke tuga e mahani he fakameaga he tau Iutaia.

7 Kua tala age a Iesu kia lautolu, Ati fakapuke a e tau vai ke he magavai. Ati fakapuke ai e lautolu, kua hoko ni ke he tau laugutu.

8 Ti tala age a ia kia lautolu, Ati ahu age a, ke uta ke he tagata ne pule ke he taonaga. Ti uta ai e lautolu.

9 Ne kamata foki he tagata ne pule ke he taonaga e vai kua faliu uaina, nakai iloa foki e ia e mena ne moua ai, ka ko e tau fekafekau ne ahu e vai kua kitia e lautolu, ati ui age ai a ia ke he kitofaihoana, kua pehe age e tagata ne pule ke he taonaga kia ia,

10 Kua ta mai fakamua he tau tagata oti e uaina mitaki; ka konahia ai e tau tagata, ati ta mai ai e uaina kelea; ka kua toka e koe e uaina mitaki ato hoko ke he magala nai.

11 Ne eke e Iesu e fakamailoga fakamua nai i Kana i Kalilaia, mo e fakakite mai ai hana lilifu; ti tua ai hana tau tutaki kia ia.

12 Kua oti e mena ia, ati hifo ai a ia ki Kapanaumi, ko ia, mo e hana matua fifine, mo e hana tau matakainaga, mo e hana tau tutaki; ka e nakai nonofo ai ke he tau aho loga.

13 Kua tata mai foki e paseka a Iutaia; ti hake ai a Iesu ki Ierusalema.

14 Ti kua kitia e ia ke he faituga a lautolu ne fakafua e tau povi, mo e tau mamoe, mo e tau lupe; ko lautolu foki ne fakafua e tau tupe, ha ne nonofo mai ai.

15 Kua eke e ia e fahi ke he tau afo tua ikiiki, ati vega atu ai a lautolu oti kana ki fafo he faituga, ko e tau mamoe katoa mo e tau povi; kua liligi hifo foki e tau tupe he tau tagata fakafua, mo e fuluhi atu e tau laulau.

16 Ti pehe age a ia kia lautolu ne fakafua e tau lupe, Uta kehe a e tau mena nei; ua eke e fale he haku a matua mo fale fakafua koloa.

17 Ati manatu ai hana tau tutaki ke he kupu kua tohi, Kua kai ni au he manako lahi ke he hau a fale.

18 Ko e mena ia kua tala mai ai e tau tagata Iutaia, kua pehe mai kia ia, Ko heigoa e fakamailoga ke fakakite mai ai e koe kia mautolu, he eke e koe e tau mena nai?

19 Kua tala age a Iesu, kua pehe age kia lautolu, Ati ulu a e faituga nei, ti eke foki e au ke he tolu e aho.

20 Ati pehe mai ai e tau Iutaia, Ne fagofulu ma ono e tau tau he ta e faituga nai, po ke maeke kia ia koe he eke ke he tolu e aho?

21 Ka ko e hana tino, ko e faituga haia ne talahau mai e ia.

22 Ne tu mai foki a ia ia lautolu kua mamate, ti manatu ai hana tau tutaki, kua tala mai e ia e kupu nai kia lautolu; ti talia ai e lautolu e Tohi mo e kupu ne talahau mai ai e Iesu.

23 Ha ha i Ierusalema a ia ke he paseka, ke he galue, ti tokologa ai a lautolu ne tua ke he hana higoa, he kikite atu a lautolu ke he tau fakamailoga ne eke e ia.

24 Ka ko Iesu, kua nakai tua a ia kia lautolu, ha kua fioia e ia e tau tagata oti kana.

25 Nakai aoga foki kia ia he talahau atu he taha e tau mena he tagata, ha kua fioia e ia ni e tau mena ha i loto he tau tagata.