Tau Fakatai

13 KUA fanogonogo e tama tane iloilo ke he tau mena ne fakaako atu ai he matua hana; ka ko e tagata fa va nakai fanogonogo a ia ke he akonakiaga.

2 To kai he tagata e tau mena mitaki ne fua mai ai e gutu hana; ka ko e manako he tau tagata mahani fakavai to kai e ia e favale.

3 Ko ia kua leveki hana gutu, kua omaoma a ia ke he hana agaga; ka ko ia kua fakamaga hana tau laugutu, to ha ha ia ia e malaia.

4 Kua manako e loto he tagata teva, ka e nakai moua e ia ha mena; ka ko e manako he tagata malolo ke gahua to makona ni a ia.

5 Kua fakavihia he tagata tututonu e tau kupu pikopiko; ka ko e tagata mahani kelea kua vihiatia a ia mo e mā ai a ia.

6 Ko e tututonu kua leveki ai a ia ne mahani hakohako; ka ko e mahani kelea kua liti hifo ai e tagata hala.

7 Ha ha i ai taha kua eke ko e maukoloa a ia ka e nakai ni fai mena a ia; ha ha i ai kua eke ko e tagata nofogati a ia, ka e loga ni hana tau koloa.

8 Ko e palepale he moui he tagata, ko e hana koloa haia; ka ko e tagata nofogati, nakai fanogonogo a ia ke he akonakiaga.

9 Kua fiafia e maama he tau tagata tututonu; ka ko e lamepa he tau tagata mahani kelea, to tamate ia.

10 Ko e taufetoko hokoia ni kua tupu mai he mahani fakatokoluga; ka kua iloilo a lautolu kua omaoma ke he pule.

11 To fakagahoa e koloa kua moua ai he eke e tau mena fakateaga; ka ko ia kua tatanaki e tau mena ke he gahua, to fakaloga ai hana tau mena.

12 Kua mule e amaamanaki ti mamahi ai e loto; ka ko e manako kua hoko, ko e akau he moui haia.

13 Ko ia kua fakavihia e kupu, to malaia a ia ia ia; ka ko ia ne matakutaku ke he poaki, to monuina ni a ia.

14 Ko e fakatufono he tagata iloilo ko e puna he moui haia, ke fano kehe ai mo e tau hele ke mate ai.

15 Ko e loto manamanatu mitaki kua tupu mai ai e fakaalofa; ka ko e puhala he tau tagata mahani fakavai, ko e puhala tule haia.

16 Ko e tau tagata lotomatala oti, kua takitaha a lautolu mo e eke mena mo e iloilo; ka ko e tagata goagoa, kua fofola ai e ia hana goagoa.

17 Ko e fekau mahani kelea, kua veli ai a ia ke he kelea; ka ko e tagata ogo kua fakamoli kua malolo a ia.

18 To ha i ai e mā mo e nofogati kia ia kua tiaki e tau mena ne fakaako atu ai; ka ko ia kua omaoma ke he akonakiaga, to lilifu ni a ia.

19 Ko e manako kua hoko ko e mena humelie ke he loto haia; ka ko e mena vihiatia ke he tau tagata goagoa ke o kehe mo e kelea.

20 Ko ia kua feoaki mo e tau tagata iloilo, kua iloilo ni a ia; ka ko ia kua kapitiga mo e tau tagata goagoa, to matematekelea ai a ia.

21 Kua tutuli ai e tau tagata hala he matematekelea; ka e taui ai e tau tagata tututonu ke he tau mena mitaki.

22 Kua tufatufa he tagata mahani mitaki hana tau mena ke he fanau he hana fanau; ka ko e koloa he tagata hala, kua tanaki ia ma e tagata tututonu.

23 Ha ha he tau fonua he tau tagata nonofogati e tau mena kai loga; ka e ha ha i ai e tau mena kua maona he nakai fai fakafiliaga.

24 Ko ia kua toka hana akau, kua fakavihia e ia hana tama tane; ka ko ia kua fakaalofa kia ia, kua akonaki tuai e ia a ia.

25 Kua kai e tagata tututonu mo e makona a ia; ka ko e tau manava he tau tagata mahani kelea, kua hoge haia.