1 Samuela

26 KUA o age e tau tagata Sifi kia Saulo ki Kipea, kua pehe age. Nakai kia fakamumuli ai a Tavita ke he mouga ko Hakila ki mua a Iesimoni?

2 Ti matike a Saulo ti hifo a ia ke he tutakale ko Sifi; ha ha ia ia foki e tau tagata Isaraela ne fifili ne tolu e afe, ke kumi a Tavita ke he tutakale ko Sifi.

3 Ti heapi ai a Saulo ke he mouga ko Hakila, ha ha i mua a Iesimoni ke he puhala, ka e nofo a Tavita ke he tutakale, kua kitia e ia kua mui mai a Saulo kia ia ke he tutakale.

4 Ti fakafano atu e Tavita e tau toko, ti iloa ai e ia kua hau moli ni a Saulo.

5 Ti matike atu ai a Tavita ti fano a ia ke he mena ne heapi ai a Saulo; ti kitekite atu a Tavita ke he mena ne takoto ai a Saulo, ko Apineru foki, ko e tama a Neru, ko e takitaki a ia he hana kau, kua takoto ai a Saulo ke he mena ne toka ai e tau nofoa fakataveli, ka ko e motu kua heapi a lautolu kua agaagai kia ia.

6 Ti vagahau ai a Tavita, kua pehe age kia Ahimeleke ko e tagata Heti, mo Apisai ko e tama a Seruia, ko e matakainaga a Ioapo, kua pehe age, Ko hai kia ke hifo mo au kia Saulo ke he heaga api? Ti pehe age a Apisai, Ko au to o hifo a taua mo koe.

7 Ti o atu ai a Tavita mo Apisai ke he motu he po; kitiala kua takoto a Saulo, ti mohe ai a ia ke he mena ne toka ai e tau nofoa fakataveli, mo e hana tao kua hoka ai ke he kelekele ke he tapa he hana ulu; ko Apineru foki mo e motu kua tatakoto a lautolu kua agaagai a lautolu kia ia.

8 Ti pehe age a Apisai kia Tavita, Kua tuku mai he Atua ke he lima hau, ke he po nai a ia kua fai fi kia koe; hanai, toka au ke hoka lagataha e au a ia ke he tao ke ati ke he kele kele, ti nakai hoka lagaua e au a ia,

9 Ti pehe a Tavita kia Apisai, Aua neke keli e koe a ia; ha ko hai ke fakaolo atu hana lima kia ia ne fakauku e Iehova ka e noa a ia mo e hala?

10 Kua pehe age foki a Tavita, Kua moui a Iehova, to ta ni e Iehova a ia, po ke hoko hana aho ke mate ai, po ke hifo a ia ke he tau, ti mate ai a ia.

11 Kia fakamamao e Iehova ia au, ke fakaolo atu e au haku lima kia ia kua fakauku e Iehova; ka e toto ā e koe e tao ha ha he tapa he ulu hana, mo e lupo ne tokai e maga vai, ti o ni a taua.

12 Ti uta e Tavita e tao mo e lupo ne tokai e maga vai ha ha he tapa he ulu a Saulo ti o ai a laua; nakai kitia he taha, ti nakai iloa, ti nakai ala ai e taha, ha kua momohe a lautolu oti, ha ko e pulumohea mai ia Iehova kua hoko kia lautolu.

13 Ti fano ai a Tavita ke he taha fahi, ti tu ai a ia ke he tapunu ha mouga, ne mamao atu, kua lahi e mena ke he vaha ha lautolu.

14 Ti ui age a Tavita ke he motu katoa mo Apineru ko e tama a Neru, kua pehe age, Apineru na e! nakai kia tali mai a koe? Ti tali age ai a Apineru, kua pehe age, Ko hai kia a koe, kua ui mai ke he patuiki?

15 Ti pehe age a Tavita kia Apineru, Nakai kia ko e toa a koe? ko hai taha ke tatai mo koe i Isaraela? ti nakai leveki e koe he ha e iki hau, ko e patuiki? ha ko e mena fina atu ni e taha tagata ke keli e iki hau ko e patuiki.

16 Nakai mitaki e mena nai kua eke e koe; kua moui a Iehova, ko e tau tagata kua lata ke mamate a mutolu ha kua nakai leveki e mutolu ha mutolu a iki ne fakauku e Iehova; hanai, kia kitekite ā po ko fe e tao he patuiki, mo e lupo ne tokai e magavai ne ha i ai ke he tapa he hana fufuga.

17 Kua iloa e Saulo e leo a Tavita, ti pehe age a ia, Ko e leo hau kia hanā haku tama na e ma Tavita? Ti pehe age a Tavita, Ko e haku a leo ni, haku iki na e ko e patuiki.

18 Ti pehe age a ia, Haku iki na e; ko e ha ne tutuli mai ai e koe hau a fekafekau? ko e heigoa kia kua eke e au? po ko heigoa e mahani kelea ha ha ia au?

19 Hanai, kia fanogonogo mai a koe haku iki na e, ko e patuiki, ke he tau kupu he hau a fekafekau; kaeke kua fakalagalaga atu e Iehova a koe ke tau kia au, kia fakalotomafola ai hana finagalo ke he poa; ka ko e mena kaeke ko e tau tagata, kia malaia a lautolu mai mua a Iehova, ha kua vega kehe e lautolu au ke he aho nai, ke aua neke fakalataha atu au ke he tufaaga a Iehova, kua pehe mai a lautolu, Fano ā, kia fekafekau atu a koe ke he tau atua kehe.

20 Hanai, aua neke maligi ai haku toto ke he kelekele mai mua a Iehova; ha kua haele mai e patuiki a Isaraela ke kumi e kutu, tuga ne tutuli ai he taha e korē ke he tau mouga.

21 Ti pehe age ai a Saulo, Kua hala tuai au; kia liu mai a a koe, haku tama na e, ma Tavita, ha ko e mena nakai tuai ekefakakelea atu e au kia koe, ha kua fakahelehele e koe haku a moui ke he po nai; kitiala, kua mahani goagoa au, mo e hehe lahi ni au.

22 Ti tali age a Tavita, kua pehe age, Kitiala, ko e tao he patuiki, kia hau taha fuata ke ta atu.

23 Ka ko Iehova to taui atu e ia ke he tau tagata takitokotaha ha lautolu a tau mahani tututonu mo e ha lautolu a fakamoli; ha kua tuku mai e Iehova a koe ke he haku lima ke he po nai, ka e nakai mafai au ke fakaolo atu haku lima kia ia ne fakauku e Iehova.

24 Kitiala, tuga ne fakahelehele e au hau a moui ke he po nai, kia fakahelehele pihia e Iehova haku a moui, mo e laveaki e ia au mai he tau matematekelea oti.

25 Ti pehe mai ai a Saulo kia Tavita, Kia monuina a koe haku tama na e ma Tavita, to eke ai e koe e tau mena ne mua ue atu, mo e kautu ai ni a koe. Ti fano ai a Tavita ke he hana puhala, ka e liu atu a Saulo ke he mena kua nofo ai a ia.