Tau Salamo

59 HAKU Atua na e, kia laveaki e koe au mai ia lautolu kua fai fi kia au; kia leveki e koe au ki mua ha lautolu ne tutu mai kia au.

2 Kia laveaki e koe au mai ia lautolu kua eke mena kelea; kia fakamoui e koe au mai he tau tagata lima toto.

3 Ha ko e mena, kitiala, kua takahao a lautolu ke keli au; kua fakapotopoto mai e tau tagata malolo ke mahani kelea mai kia au; Iehova na e, nakai ko e tau holifono haku, po ke haku a tau hala.

4 Kua nakai fai matahavala au, ka e tafepoi a lautolu, mo e tauteute a lautolu. Kia ala mai a koe, mo e fonofono au, mo e kitekite mai.

5 Ko koe Iehova na e, ko e Atua Sapaota, ko e Atua a Isaraela, kia tu mai a koe, mo e ahiahi e tau motu kehe oti kana; aua neke fakaalofa a koe ke he taha ia lautolu kua mahani kelea mo e pikopiko. Sila.

6 To liliu mai a lautolu ke he magaaho afiafi, ti tagi ni a lautolu tuga ne kuli, mo e takai e lautolu e maga.

7 Kitiala, kua fakalua mai he tau gutu ha lautolu e tau kupu kelea; ha ha he tau laugutu ha lautolu e tau pelu; ha ko hai kia ne fanogonogo atu.

8 Ka ko koe Iehova na e, to kata a koe kia lautolu; to va a koe ke he tau motu kehe oti kana.

9 To talifaki au kia koe ha ko e hana malolo; ha ko e Atua ko e haku a kolo fakatokoluga ia.

10 Ha ha i mua haku e Atua fakaalofa; ko e Atua ke kitia ai e au haku a manako kia lautolu ne fai fi kia au.

11 Ua kelipopo e koe a lautolu, neke nimo he motu haku; kia eke la e koe ke o fano a lautolu he hāu a malolo; ti palu hifo e koe a lautolu, ma Iki na e, ha mautolu a akau punuti.

12 Ko e hala he tau gutu ha lautolu, ko e kupu ia mai he tau laugutu ha lautolu; kia tapaki ni a lautolu ke he ha lautolu a fakatokoluga; ha ko e tau kaialu mo e tau pikopiko kua vagahau ai e lautolu.

13 Kia fakaotioti e koe a lautolu ke he ita, kia fakaotioti e koe, kia nakai toe taha ia lautolu; kia iloa e lautolu ha ha ne pule e Atua kia Iakopo, ato hoko ke he tau kala he lalolagi. Sila.

14 To liliu mai foki a lautolu ke he magaaho afiafi, ti tagi ni a lautolu tuga ne kuli, mo e takai e lautolu e maga.

15 To o fano a lautolu ni he fia kai; ka e nakai makona, ti nonofo ai a lautolu ke he po ia.

16 Ka ko au, to lologo au ke he hāu a malolo; to kalaga fiafia au ke he magaaho pogipogi ha ko e hāu a fakaalofa mai; ha kua eke a koe mo kolo tokoluga maku, mo e haku a taue ke he aho he haku a matematekelea.

17 Haku a malolo na e, to uhu lologo au kia koe; ha ko e Atua ko e haku a kolo tokoluga ia, Ko e Atua kua fakaalofa mai kia au.