Roma

3 HANAI, ko e ha kia e mena kua mua ai e tagata Iutaia? po ke aoga ha ha e peritome?

2 Kua lahi ni ke he tau mena oti; ka e fakamua hanai, ha kua tuku atu kia lautolu e tau kupu he Atua.

3 Ti kua fefe kia? kaeke kua nakai fakamoli e falu, to eke kia e fakamoli he Atua mo mena nakai aoga ha ko e nakai fakamoli ha lautolu?

4 Aua ia; ka kia talahaua e fakamoli ke he Atua, ka ko e pikopiko ke he tau tagata oti; tuga ne tohi, Kia talahaua tututonu a koe ke he hāu a tau kupu, mo e kautu a koe ka kua fakafili a koe.

5 Kaeke kua fakailoa mai e tututonu he Atua ke he mahani hepehepe ha tautolu, to tala atu ha ha e tautolu? Kua mahani hepehepe kia e Atua, ko ia kua hoko mai ai e ita? (Ko e kupu he tau tagata kua tala atu ai nai e au.)

6 Aua ia; ane mai ke pihia po ke fakafili fefe he Atua e lalolagi?

7 Ha ko e mena, kaeke ko e haku a pikopiko kua fakalahi ai e fakamoli he Atua ke tupu ai hana fakahekeaga, kua fakahala he ha au, tuga ne tagata hala?

8 Ka e nakai kia pehe atu, (tuga he eke fakakelea mai a mautolu, tuga foki he talahau e falu kua pehe ha mautolu a tau kupu,) Kia eke e tautolu e tau mena kelea, kia tutupu mai ai e tau mena mitaki? Kua tonu ha lautolu a fakahala.

9 Hanai, po ke fefe? Kua mua kia a mautolu? Nakai fakai, ha kua oti he fakamoli e tautolu ko e tau tagata Iutaia katoa mo e tau tagata Heleni kua nonofo a lautolu oti kana mo e hala;

10 Tuga he tohi mai, Kua nakai fai tagata tututonu, nakai fakai ni taha,

11 Nakai fai tagata kua logona, nakai fai tagata kua kumi ke he Atua.

12 Kua o kehe a lautolu oti kana, kua kelea fakalataha a lautolu, kua nakai fai tagata mahani mitaki, nakai fakai ni taha.

13 Ko e tau tukuaga takoko e tau pu ua ha lautolu, kua fakavai e tau alelo ha lautolu; ha ha he tau laugutu ha lautolu e mena kona he tau asipi.

14 Kua puke namo e tau gutu ha lautolu ke he kaialu, mo e kupu fakafiufiu.

15 Kua mafiti ni e tau hui ha lautolu ke fakamaligi ai e toto.

16 Ha ha i ai e moumou mo e matematekelea ke he tau puhala ha lautolu;

17 Kua nakai iloa e lautolu e puhala he mafola.

18 Nakai fakai a lautolu ke matakutaku ke he Atua.

19 Kua iloa foki e tautolu ko e tau mena oti kua talahau he fakatufono, kua vagahau ia kia lautolu ha ha i ai e fakatufono; kia ponotia ai e tau gutu oti kana, kia iloa ai foki, ko e lalolagi oti kua hala a ia ki mua he Atua.

20 Ha kua nakai talahaua tututonu he tagata tokotaha ki mua hana ke he tau gahua he fakatufono; ha ko e fakatufono kua iloa tonuhia ai e hala.

21 Ka ko e hanai, kua fakakite mai e tututonu he Atua, ka e nakai ha i ai e fakatufono, kua talahau ki ai e fakatufono katoa mo e tau perofeta;

22 Ko e tututonu haia he Atua ke he tua kia Iesu Keriso, ke hoko ke he tau tagata oti, mo lautolu oti foki kua tua, ha ko e mena nakai kehekehe ni.

23 Nukua hala e tau tagata oti kana, to nakai hoko ke he fakahekeaga mai he Atua;

24 Kua talahaua tututonu noa ke he hana fakaalofa noa, ha ko e lukutoto a Keriso Iesu;

25 Ko ia ne tuku mai i mua he Atua mo poa ke fakalotomafola ai ke he tua, ke he hana toto; kia fakakite mai ai hana tututonu he nakai taui atu e ia e tau hala kua mole atu, ha ko e fakauka he Atua;

26 Kia fakakite mai foki e tututonu hana ke he vaha nai, kia iloa ai a ia ko e tututonu, mo e talahaua tututonu e ia e tagata kua tua kia Iesu.

27 Hanai, ko fe kia e hula ia? Kua fono tuai. Ko e fakatufono fe ia? ko e fakatufono ha he tau gahua kia? Nakai, ka ko e fakatufono ha ha he tua.

28 Ko e hanai, kua taofi e tautolu kua talahaua tututonu e tagata ha ko e tua, ka e nakai ha i ai e tau gahua he fakatufono.

29 Ko e tau tagata Iutaia hokoia kia kua atua ke he Atua? ka e nakai kia katoa foki mo e tau motu kehe? E ka e ha, katoa foki mo e tau motu kehe.

30 Ha ko e mena tokotaha ni e Atua, ko ia kua talahaua tututonu, ke he tua a lautolu kua peritome, katoa mo lautolu kua nakai peritome, ha ha i ai e tua.

31 Ko e hanai, kua eke kia e tautolu e fakatufono mo mena nakai aoga ha ko e tua? aua ia; ka kua fakatumau e tautolu e fakatufono.