Tau Fakatai

6 HAKU tama na e, kaeke kua eke a koe mo tagata ke fakamoli aki e mena he hāu a kapitiga; kaeke kua fetotoaki e tau lima ha mua mo e tagata kehe,

2 Kua hele a koe ke he tau kupu he gutu hāu; kua moua a koe ke he tau kupu he hāu a gutu.

3 Hanai, haku tama na e, kia eke la e koe e mena nai, kia laveaki ai e koe a koe, ha kua hoko mai e pule he kapitiga hāu kia koe; kia fano a, ti fakaveli fakafohifo ai a koe, mo e ole a koe ke he hāu a kapitiga;

4 Aua neke mohe hāu a tau mata, po ke fia mohe hāu a tau tuamata;

5 Kia laveaki e koe a koe, tuga ne sevi mai he lima he tagata ne tutuli a ia; tuga ne manu lele foki mai he lima he tagata hele manu.

6 Ko e tagata teva na e, kia fano a koe ke he lo, kia kitekite ā koe ke he hana mahani ke iloilo ai a koe;

7 Nakai fai takitaki a ia, po ke leoleo, po ke pule,

8 Kua taute ai e ia hana tau mena kai ke he tau mafana, mo e tanaki ai e ia hana tau mena kai ke he vaha ne helehele ai e tau saito.

9 Ko e tagata teva na e, to takoto a koe ato ha? To matike mai a fe a koe he mohe hāu?

10 Tokai ke fakapiki fakatote, tokai ke mohealafia fakatote, tokai ke tui fakatote e tau lima ke mohe,

11 Ka to hoko mai hāu a nofogati tuga ne tagata fofo mena; mo e hāu a hogeia mena tuga ne tagata kua tauteute mo e hana tau kanavaakau.

12 Ko e tagata kolokolovao, ko e tagata hala, kua fano a ia mo e gutu fakakeukeu mena;

13 Kua kemokemo e ia hana tau mata; kua vagahau ai a ia ke he hana tau hui; ne fakakite mena ke he hana tau matalima.

14 Ha ha he loto hana e mahani fakakeukeu; kua eke lagatau kelea a ia he tau aho oti; kua fakatupu ai e ia e feveheveheaki;

15 Ko e mena ia to hoko fakalutukia ai hana malaia; to tuki malipilipi fakalutukia a ia, ka e nakai maeke ke fakamalolo a ia.

16 Ko e ono la e mena kua fakavihia e Iehova, ti fitu foki kua vihiatia e ia.

17 Ko e tau mata fakatokoluga, ko e alelo pikopiko, mo e tau lima kua fakamaligi e toto he tagata nakai hala,

18 Ko e loto kua fatuakiloto e tau lagatau kelea, ko e tau hui ne mafiti he tafepoi ke he kelea,

19 Ko e tagata fakamoli mena fakavai, kua vagahau mo e pikopiko; mo ia kua fakatupu ai e feveheveheaki ke he tau matakainaga.

20 Haku tama na e, kia omaoma a koe, ke he tau poaki he hāu a matua tane; ti ua tiaki e koe e tau kupu fakaako atu he hāu a matua fifine;

21 Kia pipi ai nakai noa ke he hāu a loto; kia kahoa ai a koe ke he ua hāu.

22 Ka faifano a koe, to takitaki ai e ia a koe; ka mohe a koe, to leveki ai e ia a koe; ka ala a koe to vagahau a ia mo koe.

23 Ha ko e poaki ko e hulu haia; mo e kupu ne fakaako atu ko e maama haia; ko e tau akonakiaga foki ne akonaki ai, ko e puhala he moui haia,

24 Kia leveki ai a koe mai he fifine mahani kelea, mai he alelo vagahau fakamolemole he fifine kehe.

25 Aua neke manako e loto hāu ke he hana tino mitaki; aua neke moua a koe ke he hana tau tuamata.

26 Ha ko e mena fakanofogati e tagata ke toe ai e maga areto noa ha ko e fifine fakataka; ko e fifine faivao kua tutuli e ia e moui uho he tagata.

27 Ke uta kia he tagata e afi ke he hana fatafata, ka e nakai vela ai hana tapulu?

28 Kaeke ke fano e tagata ki luga he tau malala kaka, nakai kia vela ai hana tau hui?

29 Kua pihia foki a ia kua fina age ke he hoana he tagata ne katofia mo ia; ko ia kua piki atu kia ia nakai noa a ia mo e fakahala,

30 Nakai vihiatia e tagata kaiha kaeke kua kaiha e ia ke makona ai hana manava he fia kai a ia;

31 Ka ko e mena ka moua a ia, ti taui age ai lagafitu e ia; to ta age ai e ia e tau koloa oti he hana fale.

32 Ko ia kua faivao mo e fifine kua noa a ia mo e manamanatu; ko ia kua eke e mena ia, kua fakaoti ai e ia hana moui;

33 Ko e tau fahi mo e mā ke moua ai e ia; ko e hana mā foki nakai holoholo kehe ia.

34 Ha ko e ita tafuā ko e ita lahi he tagata haia; nakai fakahao foki e ia a ia ke he aho ke lalago ai.

35 Nakai hagao atu a ia ke he taui; nakai mafai foki a ia pete he fakaloga ai e tau mena ke age kia ia.