Tau Salamo

20 KIA fanogonogo mai a Iehova kia koe ke he aho matematekelea, kia fakamatalahi a koe he higoa he Atua a Iakopo.

2 Kia tuku mai e ia kia koe e lagomatai mai he faituga, mo e tokotu e ia a koe mai ia Siona.

3 Kia manatu e ia hau a tau poa oti ke he tau mena kai, mo e talia foki e ia hau a tau poa huhunu. Sila.

4 Kia foaki e ia kia koe ke lata mo e hāu a loto, mo e fakahoko mai hau a tau fatuakiloto oti kana.

5 Kia fiafia a mautolu ke he hāu a fakamouiaga; kia nikiti ki luga foki e matini ke he higoa he Atua ha tautolu; kia fakahoko mai a Iehova e tau mena oti kua ole e koe.

6 Hanai, kua iloa tuai e au kua fakamoui e Iehova a ia ne fakauku e ia; to fanogonogo mai a ia kia ia mai he hana lagi tapu ke he malolo he hana lima matau ke momoui ai.

7 Kua pola kariota e falu, mo e pola solofonua e falu, ka ko tautolu to pola e tautolu e higoa a Iehova ha tautolu a Atua.

8 Kua tukutuku hifo a lautolu, ti kua veveli ni; ka ko tautolu kua mamatike a tautolu, ti tutu hake ni.

9 Iehova na e, kia fakamoui mai ā; kia fanogonogo mai e Patuiki ke he aho ka tauui atu ai a mautolu.