Mataio

4 TI kua ta hake he Agaga a Iesu ke he tutakale, kia kamatamata ai he tiapolo.

2 Kua fakamatehoge a ia ke he fagofulu a po mo e fagofulu e aho, kua mole ia, ti fia taumafa ai a ia.

3 Ko ia foki ne kamatamata, ne fina age kia ia kua pehe age, Kaeke ko e Tama he Atua a koe, ati tala age a ke he tau maka ē ke faliu mo tau areto.

4 Ti kua tala age ai a ia, kua pehe age, Kua tohi, Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.

5 Ati uta ai a ia he tiapolo ke he māga tapu, kua fakatu ai e ia a ia ke he tapitapi ki luga he faituga.

6 Kua pehe age a ia kia ia, Kaeke ko e Tama he Atua a koe, ati hopo hifo a a koe he mena nai; ha ko e mena kua tohi, To poaki a ia ke he hana tau agelu kia koe ke uta e lautolu a koe ke he tau lima ha lautolu, neke hakina ha hui he maka.

7 Kua tala age a Iesu kia ia, Kua tohi foki, Ua kamatamata a koe ke he Iki hau a Atua.

8 Ti liu foki uta a ia he tiapolo ke he taha mouga ne tokoluga ue atu, kua fakakite atu foki kia ia e tau kautu oti he lalolagi, mo e lilifu ha lautolu;

9 Ti tala age ai a ia kia ia, To ta atu e au e tau mena oti nai kia koe, kaeke ke fakaveli mo e hufeilo mai a koe kia au.

10 Ti tala age ai a Iesu kia ia, Ati fano kehe a a koe ma Satani; ha ko e mena kua tohi, kia hufeilo atu a koe ke he Iki hau a Atua, ko ia ni hokoia ke fekafekau atu a koe ki ai.

11 Ati toka ai he tiapolo a ia, kitiala, kua o mai e tau agelu mo e fekafekau mai kia ia.

12 Kua logona e Iesu kua tuku atu a Ioane ke he fale puipui, ati haele age ai a ia ki Kalilaia;

13 Kua toka e ia a Nasareta, ka e haele atu mo e nofo a ia i Kapanaumi he tapavai, ha ha e katofia a Sepulona mo Nafatali;

14 Kia fakamoli aki e kupu he perofeta ko Isaia, kua pehe mai,

15 Ko e fahi ko Sepulona, ko e fahi foki ko Nafatali ko e hala ke he vai ke he fahi atu a Ioritana, ko Kalilaia he tau tagata kehe;

16 Ko e motu ne nonofo he pouli, kua kitia e lautolu e maama lahi; ko lautolu foki ne nonofo he motu mo e ata he mate, kua hake mai e maama kia lautolu.

17 Ko e vaha ia ne kamata ai ke fakamatala atu e Iesu, kua pehe atu, Kia tokihala a a mutolu; nukua tata tuai e kautu he lagi.

18 Kua haele a Iesu ke he tapa vai i Kalilaia, kua fioia e ia e matakainaga tokoua, ko Simona ne fakahigoa ko Peteru, mo Aneterea ko e matakainaga hana, kua liti e laua e kupega ke he vai, ha ko e tau tagata takafaga a laua.

19 Kua tala age a ia kia laua, Kia mumui mai a kia au, to eke e au a mua mo takafaga ke he tau tagata.

20 Ati toka ai agataha e laua ha laua a tau kupega, ka e mumui atu kia ia.

21 Kua tolomaki foki a ia he mena ia, ti kitia ai e ia e taha matakainaga tokoua, ko Iakopo ko e tama a Sepetaio, mo Ioane ko e hana matakainaga, ha ha he foulua mo e matua ha laua ko Sepetaio, kua ono e lautolu ha lautolu a tau kupega; kua ui atu foki a ia kia laua.

22 Ati toka ai agataha e laua e foulua mo e matua ha laua, ka e mumui atu kia ia.

23 Kua takai e Iesu a Kalilaia oti, kua fakaako a ia ke he tau sunako ha lautolu, kua fakamatala atu foki e ia e vagahau mitaki he kautu, mo e fakamalolo e ia e tau tagata gagao oti, mo e tau tagata mamahi oti he motu.

24 Kua tuogo atu e tala kia ia i Suria oti, ati ta mai ai e lautolu kia ia e tau tagata oti kana kua mamahi ke he tau kafo kehekehe, mo e tau tagata kua matematekelea, mo e tau tagata kua heketia he tau temoni, mo e tau tagata kua gagao he vikoia, katoa mo e tau tagata kua gagao he pareluti, ti fakamalolo e ia a lautolu.

25 Ti mumui atu ai kia ia e lanu tagata tokologa mai Kalilaia, mo Tekapoli, mo Ierusalema, mo Iutaia, mo e fahi atu a Ioritana.