Tau Salamo

138 TO fakaaue atu au kia koe mo e haku a loto katoa; to uhu lologo e au kia koe ki mua he tau atua.

2 To hufeilo au ke he hāu a faituga tapu, to fakaheke atu foki au ke he hāu a higoa ha ko e hāu a fakaalofa mo e hāu a fakamoli; ha kua fakahomo ni e koe hāu a vagahau ke he hāu a higoa oti.

3 Ko e aho ne ui atu ai e au kia koe, ne fanogonogo mai ai a koe kia au; ne fakalahi mai e koe e malolo kia au.

4 Iehova na e, to fakaaue kia koe e tau patuiki oti ni he lalolagi, ka fanogonogo a lautolu ke he vagahau he hāu a fofoga.

5 To lologo foki a lautolu ke he tau puhala a Iehova; ha kua lahi ni e lilifu a Iehova.

6 Ha kua tokoluga ni a Iehova, ka kua fioia e ia e tagata fakatokolalo; ka ko e tagata fakatokoluga, kua fioia fakamamao e ia.

7 Ka fano au ke he vaha loto he matematekelea, ti fakamalolo ai e koe au; to fakahoko hāu a lima ke he ita ha lautolu kua fai fi kia au; to fakamoui au he hāu a lima matau.

8 To fakakatoatoa e Iehova e tau mena oti maku; Iehova na e, to tukulagi hāu a fakaalofa; aua neke tiaki e koe e gahua he hāu a tau lima.