Iakopo

4 MAl fe kia e tau tau mo e tau latau ha ia mutolu? nakai kia ko e mena hanai, mai he tau manako kelea ha mutolu kua tau ke he tau tino oti ha mutolu?

2 Kua manako lahi a mutolu, ka e nakai moua; kua kelipopo e mutolu mo e mahekeheke, ka e nakai maeke ia mutolu ke moua; kua latau mo e tau, ka kua nakai moua, he nakai ole atu.

3 Kua ole atu a mutolu, ka e nakai moua, ha kua ole atu mo e nakai lata, kia fakaoti e tau mena ia ke he tau manako kelea ha mutolu.

4 Ko mutolu, ko e tau tane faivao na e, mo e tau fifine faivao na e, kua iloa nakai e mutolu ko e kapitiga mo e lalolagi ko e faitaua haia ke he Atua? Hanai, kaeke ke fia kapitiga taha mo e lalolagi, kua eke a ia mo fi ke he Atua.

5 Poke manatu kia a mutolu kua talahaua noa e Tohi, Ko e loto ha ia mutolu kua manako lahi a ia ke he mahekeheke?

6 Ka kua foaki mai e ia e fakaalofa noa ke mua, ko e mena ia kua pehe mai ai a ia, Kua totoko atu he Atua ke he tau fakatokoluga, ka e foaki e fakaalofa noa ke he tau fakatokolalo.

7 Ko e mena ia kia omaoma ai a mutolu ke he Atua; kia totoko atu a mutolu ke he tiapolo, ti hola kehe ai a ia ia mutolu.

8 Kia fakatata atu a mutolu ke he Atua, ti fakatata mai ai a ia kia mutolu. Ko e tau tagata hala na e, kia holoholo a ha mutolu a tau lima, ko mutolu, ko e tau tagata lotolotoua kia fakamea ha mutolu a tau loto.

9 Kia fakaatukehe, mo e fakatutuku, mo e tagi a mutolu; kia liliu ha mutolu a kata ke he fakatutuku, mo e fiafia ha mutolu ke he fakaatukehe.

10 Kia fakatokolalo a mutolu ki mua he Iki, to fakamatalahi e ia a mutolu.

11 Ko e tau matakainaga na e, aua neke feamuamuaki a mutolu; ko ia kua amuamu ke he hana matakainaga, mo e fakafili ke he hana matakainaga kua amuamu a ia ke he fakatufono, mo e fakafili e fakatufono; kaeke kua fakafili e koe e fakatufono, nakai ko e tagata omaoma a koe ke he fakatufono ka ko e fakafili ki ai.

12 Ne tokotaha ni e eke fakatufono, kua maeke ia ia ke fakamomoui mo e tamate; ka ko hai kia a koe ke fakafili ke he taha?

13 Kitiala, ko mutolu na kua pehe age, Ko e aho nai, po ke a pogipogi, to o atu ai a tautolu ke he taha māga po ke taha maga, mo e nonofo ai e taha tau, mo e fefakafuāki, mo e moua ai e tau koloa;

14 Ka e nakai iloa e mutolu e mena ke tupu mai a pogipogi Ha ko e heigoa ha mutolu a moui? Ko e aolu kua fakakite mai ke he magaaho tote, ti galo ai ni.

15 Ka e lata ni ke pehe mai a mutolu, Ka finagalo e Iki ki ai, to momoui a tautolu, to eke e tautolu e mena ia mo e mena ia.

16 Ka ko e hanai, kua hula a mutolu ke he tau kupu fakatokoluga ha mutolu; ka kua kelea ni e tau hula oti kana pihia.

17 Hanai, ko ia kua iloa ke eke e mena mitaki, ka e nakai eke, ko e hala haia kia ia.