1 Korinito

16 KA ko e tanakiaga he koloa ke uta ke he tau tagata fakatapu, tuga he poaki atu au ke he tau ekalesia i Kalatia, kia eke pihia foki a mutolu.

2 Ko e aho fakamua he taha fahi tapu mo e taha fahi tapu, kia takitokotaha mo e tuku age ai hana mena, ke fakalata hana mena ke taute mo e monuina hana; neke eke e tau tanakiaga ke he vaha ka fina atu ai au.

3 Ka fina atu au, ti fakafano atu ai e au mo e tau tohi a lautolu kua fifili e mutolu, ke uta ai ha mutolu a tau mena fakaalofa ki Ierusalema.

4 Kaeke foki kua lata ke fano au, to o a mautolu fakalataha mo au.

5 To fina atu au kia mutolu ke he vaha ke fano ai au ki Maketonia; ha ko e mena fano au ki Maketonia.

6 Ligaliga nonofo foki a tautolu mo mutolu, tokai ko e nonofo ato mole mai e tau makalili heute he pihia; kia fakafano atu ai e mutolu haku a fenoga ke he mena ke fano au ki ai.

7 Ha ko e mena nakai loto au ke he vaha nai ke afe atu ai kia mutolu ke he magahehala; ka e amaamanaki au ke fakaleva haku a nofo ia mutolu kaeke ke finagalo ki ai e Iki.

8 Ka e nofo au i Efeso ato hoko ke he Penetekoso.

9 Ha kua hafagi kia au e pa gutuhala kua lahi mo e aoga lahi, tokologa foki a lautolu kua totoko mai.

10 Kaeke ke fina age a Timoteo kia mutolu, kia fakaeneene a mutolu kia ha ha i ai a ia ia mutolu mo e nakai matakutaku; nukua eke e ia e gahua he Iki tuga ni au nai.

11 Ko e mena ia aua neke fakateaga ai taha kia ia; ka kia fakafano mai e mutolu a ia mo e monuina, kia hoko mai a ia kia au; ha ko e mena tatali atu au kia ia mo e tau matakainaga.

12 Ko e matakainaga foki, ko Apolo, ne lahi haku a ole kia ia ke o a lautolu mo e tau matakainaga kia mutolu; ka e nakai loto ni a ia ke fina atu kia mutolu ke he vaha nai, ka e fina atu a ia ka hoko mai ai e vaha ke lata ai.

13 Kia mataala a mutolu, kia tumau a mutolu ke he tua, kia eke a mutolu mo tau tagata toa, kia fakamalolo a mutolu.

14 Kia eke e mutolu e tau mena oti ha mutolu mo e fakaalofa.

15 Ko e tau matakainaga na e, kua iloa e mutolu e magafaoa a Setefana, ko e fua uluaki ia lautolu i Akaia, kua hagaaki fekafekau a lautolu ke he tau tagata fakatapu, kua ole atu au kia mutolu.

16 Kia omaoma a mutolu kia lautolu kua pihia, katoa mo lautolu oti kua felagomataiaki mo e fakafitā.

17 Kua fiafia au he hohoko mai a Setefana mo Fotunato, mo Akaiko nukua fakakatoatoa mai e lautolu e tau mena ha mutolu ne toe;

18 Ha ko e mena fakamafanatia e lautolu haku a loto katoa mo e ha mutolu; ko e mena ia kia talia fakamitaki ai e mutolu a lautolu kua pihia.

19 Kua fakaalofa atu e tau ekalesia i Asia kia mutolu. Kua fakaalofa lahi atu kia mutolu ke he Iki, a Akula mo Pisila, mo e ekalesia ha ha he fale ha laua.

20 Kua fakaalofa atu kia mutolu e tau matakainaga oti. Kia feofanaki a mutolu ke he figita tapu.

21 Ko au ko Paulo, ko e haku a fakaalofa kia mutolu kua tohi ke he lima haku.

22 Kaeke kua nakai fakaalofa ha tagata ke he Iki, ko Iesu Keriso, kia anatema a ia. Maranata.

23 Kia ha ha ia mutolu e fakaalofa noa he Iki ko Iesu Keriso.

24 Kia ha ha ia mutolu oti kana haku a fakaalofa kia Keriso Iesu. Amene.