1 Timoteo

3 KO e kupu moli hanai, kaeke kua foli e taha ke he feua he epikopo, kua manako a ia ke he gahua mitaki.

2 Hanai, kua lata ke he epikopo aua neke talahaua kelea a ia, kua fai hoana ke he fifine tokotaha, kua mataala, kua mahani fakalatalata, kua gali, kua fakaalofa ke he tau tagata kehe, kua aga ke fakaako atu,

3 Kua nakai vale he inu lahi e uaina, nakai keli tagata, nakai velevele koloa he tau lagatau kelea; ka e totonu, nakai fa taufetoko, nakai loto lahi ke he tau tupe.

4 Kua pule fakamitaki ke he hana ni a magafaoa, ha ha ia ia e tau fanau kua omaoma, mo e nonofo fakatekiteki ni.

5 (Ha ko e mena kaeke kua nakai iloa e taha ke pule ke he hana ni a magafaoa, to leveki fefe e ia e ekalesia he Atua?)

6 Nakai ko e tagata kito liogi, neke fakatokoluga hana loto, ti veli ai a ia ke he fakahala he tiapolo.

7 Kua lata foki ke talahaua mitaki a ia e lautolu i tua, neke ekefakakelea a ia mo e veli ke he hele he tiapolo.

8 Kua pihia foki e tau tiakono, kia fulumokoi a lautolu, nakai tala fakaua, nakai hagaaki inu uaina, nakai velevele koloa he lagatau kelea:

9 Kua taofi e lautolu e kupu galo ke he tua mo e loto manamanatu hifo kua mea.

10 Ka ko lautolu foki kia kamatamata fakamua a lautolu, ti eke ai e lautolu e feua he tiakono, ka nakai talahaua kelea a lautolu.

11 Pihia foki mo e tau fifine, kia mahani fulumokoi a lautolu, aua neke tauamuamu, ka kia mataala, kia fakamoli ke he tau mena oti.

12 Kia takitokotaha e tau tiakono mo e hana hoana ne tokotaha, kua pule fakamitaki ke he fanau mo e magafaoa ha lautolu.

13 Ha ko lautolu kua eke fakamitaki e feua he tiakono kua moua ma lautolu ni e lilifu mitaki, mo e fakamalolo lahi ke he tua ha ha ia Keriso Iesu.

14 Kua tohi atu e au e tau mena nai kia koe, ha ha ne amaamanaki au ke fina atu vave kia koe.

15 Kaeke ke mule atu au, kia iloa ai e koe po ke fefe e tonu he mahani hāu ke he fale he Atua, ko e ekalesia he Atua moui haia, ko e pou foki ia mo e fakaveaga he kupu moli.

16 Kua talahau oti ni kua lahi ni e kupu galo ke he mahani Atua; Kua fakakite mai e Atua ke he tino tagata, kua talahaua tututonu ke he Agaga, kua kitia he tau agelu, kua tuogo atu ke he tau motu kehe, kua tua ki ai a lautolu ha ha he lalolagi, kua ta hake ke he monuina.