2 Tau Patuiki

24 KO e vaha ne patuiki ai a ia ne hake ai a Nepukanesa ko e patuiki a Papelonia, ti tolu e tau ne eke ai a Iehoakima mo fekafekau kia ia ti liu a ia mo e fakafualoto kia ia.

2 Ti fakafano ai e Iehova kia ia e tau kau a Kaletaia, mo e tau kau a Suria, mo e tau kau a Moapi, katoa mo e tau kau he fanau a Amoni, ne fakafano atu e ia a lautolu ki Iuta ke fakaoti aki a ia, tuga ne kupu a Iehova ne vagahau mai ai e ia ke he hana tau fekafekau ko e tau perofeta.

3 Ko e finagalo ni a Iehova ne hoko ai e tau mena ia ki Iuta, ke uta kehe ai a lautolu mai mua hana ha ko e tau hala a Manase, ke lata mo e tau mena oti ne eke e ia,

4 Ha ko e toto foki he tau tagata nakai hala ne fakamaligi ai e ia, ha kua fakapuke ai e ia a Ierusalema ke he toto he tau tagata nakai hala; ti nakai mafai a Iehova ke fakamagalo ai.

5 Ko e tau mena ne toe ne eke e Iehoakima, mo e tau mena oti ne eke e ia, nakai kia tohi e tau mena ia ke he tohi ne toka ai e tau tala ke he tau nofoaga he tau patuiki a Iuta?

6 Kua takoto foki a Iehoakima fakalataha mo e hana tau matua; ti eke e tama hana ko Iehoakina mo patuiki ke hukuiaki a ia.

7 Ti nakai tuai hau foki e patuiki a Aikupito, ke kamata mai he vailele a Aikupito ke hoko atu ke he vailele ko Eufirate.

8 Ne hogofulu ma valu e tau a Iehoakina he eke a ia mo patuiki, ti tolu e mahina ne patuiki ai a ia i Ierusalema. Ko e higoa he hana matua fifine ko Nehuseta ko e tama fifine a Elenatana ko e tagata Ierusalema.

9 Ne eke foki e ia e mahani kelea ki mua a Iehova, tuga ne tau mena oti ne eke he matua hana.

10 Ko e vaha ia ne o hake ai e tau fekafekau a Nepukanesa ko e patuiki a Papelonia ki Ierusalema, ti pa takai ai e maga.

11 Ti hau ni a Nepukanesa ke he maga ka kua pa takai ai he tau fekafekau hana.

12 Ti fina age ai e patuiki a Iuta ko Iehoakina ke he patuiki a Papelonia ko ia mo e hana matua fifine, mo e hana tau fekafekau, mo e tau iki ha ha ia ia, mo e hana tau fekafekau ne mua, ti uta he patuiki a Papelonia a ia ke he tau valu ne patuiki ai a ia.

13 Ne uta kehe foki e ia e tau koloa oti ha ha he fale a Iehova, mo e tau koloa oti ke he fale he patuiki; ti helehele ai e ia e tau mena auro oti ne eke e Solomona ko e patuiki a Isaraela ke he faituga a Iehova tuga ne vagahau mai ai e Iehova.

14 Ti uta kehe ai e ia a Ierusalema oti, ko e tau iki oti foki, katoa mo e tau toa oti, ko e hgofulu e afe e tagata ne uta kehe ai; ko e tau tufuga oti foki, katoa mo e tau tufuga ne eke e tau mena lapatoa nakai ni toe taha, ka ko e tau tagata nonofogati he motu hoko lautolu.

15 Ti uta kehe ai e ia a Iehoakina ki Papelonia, ko e matua fifine foki he patuiki, mo e tau hoana he patuiki, mo e hana tau fekafekau ne mua, katoa mo e tau iki ne mua he motu, ne uta ai e ia i Ierusalema ke he paeaaga i Papelonia.

16 Ko e tau toa oti ne fitu e afe tagata, mo e tau tufuga, mo e tau tufuga ne eke e tau mena lapatoa ne taha e afe tagata, ko e tau tagata malolo mo e mahani mo e tau a lautolu oti, ne uta ai he patuiki a Papelonia a lautolu ke he paeaaga i Papelonia.

17 Ti kotofa ai he patuiki a Papelonia a Matania ko e matakainaga he matua tane a Iehoakina ke eke mo patuiki ke hukuiaki a ia, ti ui ai e ia hana higoa ko Setekaia.

18 Ko e uafulu ma taha e tau tau a Setekaia he eke a ia mo patuiki, ti hogofulu ma taha e tau he patuiki ai a ia i Ierusalema. Ko e higoa he hana matua fifine ko Hamutala ko e tama fifine a Ieremia ko e tagata Lipena.

19 Ne eke ai e ia e mahani kelea ki mua a Iehova, tuga ne tau mena oti ne eke e Iehoakima.

20 Ha ko e ita a Iehova ki Ierusalema mo Iuta, ne hoko ai kia tiaki e ia a lautolu mai mua hana; ti fakafualoto ai e Setekaia ke he patuiki a Papaelonia.