Numera

25 KUA nonofo a Isaraela i Sitima; ti kamata ai he motu ke feuaki mo e tau fifine Moapi.

2 Ti ui atu e lautolu ke he motu ke o ke he tau poa ke he tau atua ha lautolu; ti kai ai he motu, mo e tukutuku hifo a lautolu ke he ha lautolu a tau atua.

3 Ne fakalataha a Isaraela mo Paala-peoro; ti tupu lahi ai e ita a Iehova kia Isaraela.

4 Ti pehe mai ai a Iehova kia Mose, Kia uta e koe e tau iki oti he motu, ti tautau ai e koe a lautolu ke he la ki mua a Iehova, kia mafoki kehe ai e ita lahi a Iehova mai Isaraela,

5 Ti pehe age a Mose ke he tau fakafili Isaraela, Kia taki taha a mutolu mo e keli hana tau tagata kua fakalataha mo Paala-peoro.

6 Kitiala foki, ko e taha tagata he fanau a Isaraela kua hau, ti ta mai ai e ia ke he hana tau matakainaga e fifine Mitiana, ki mua a Mose, ki mua foki he fakapotopotoaga oti he fanau a Isaraela, ha ha ne tagi ai a lautolu ke he gutuhala he fale uta fano he tutuutaga.

7 Kua kitia a ia e Fineaso ko e tama a Eleasaro, ko e tama a Arona ko e ekepoa; ti matike ai a ia mai loto he fakapotopotoaga, ti toto ai e ia e tao ke he hana lima.

8 Ti mui atu a ia ke he tagata Isaraela, ke he fale ie, ti hoka ai e ia a laua tokoua ti ati ai e tao ko e tagata Isaraela, mo e fifine ke he hana manava; ti motuhia ai e tatalu mai he fanau a Isaraela.

9 Ko lautolu foki ne mamate ai ke he tatalu ne uafulu e afe ti fa e afe tagata.

10 Ti vagahau mai a Iehova kia Mose, kua pehe mai,

11 Ko Fineaso ko e tama a Eleasaro ko e tama he ekepoa ko Arona, kua liu kehe ai e ia haku a ita ke he fanau a Isaraela, ke he haku a ita tafuā kia lautolu ti nakai fakaotioti ai e au e fanau a Isaraela ke he haku a ita tafuā.

12 Ko e mena ia, kia pehe atu a koe, Kitiala, kua tuku atu e au kia ia haku a maveheaga ke monuina ai;

13 Ti eke ia mana mo e hana fanau ka mole atu a ia, ko e maveheaga ke he feua he tau ekepoa tukulagi, ha ko e hana fakamalolo ha ko e hana Atua, ti eke ai foki e lukutoto ha ko e fanau a Isaraela.

14 Ko e higoa foki he tagata Isaraela ne keli, ne kelipopo ai fakalataha mo e fifine Mitiana, ko Semeri, ko e tama a Salu, ko e iki foki a ia he taha faoa he magafaoa a Simeona.

15 Ko e higoa foki he fifine Mitiana ne keli, ko Kosepi ko e tama fifine a Suro, ko e iki a ia he taha faoa he tau tagata Mitiana.

16 Ti vagahau mai a Iehova kia Mose, kua pehe mai,

17 Kia fakamamahi e mutolu a Mitiana mo e keli e mutolu a lautolu;

18 Ha ko e mena fakamamahi ai e lautolu a mutolu ke he ha lautolu a tau mena tauhele ne tauhele ai e lautolu a mutolu ke he mena a Peoro, mo e mena a Kosepi ko e tama fifine he taha iki i Mitiana, ko e ha lautolu a fifine ne keli ai ke he aho he tatalu ha ko e mena a Peoro.