Kenese

38 KO e vaha ia ne hifo ai a Iuta he hana tau matakainaga, kua afe atu ke he taha tagata Atulama, ko Haira hana higoa.

2 Ne kitia ai e Iuta e tama fifine he taha tagata Kanana, ko Sua hana higoa, kua ta mai e ia a ia kua hoana a ia kia ia.

3 Kua fatu a ia, ti fanau ai e tama tane, kua ui hana higoa ko Eru.

4 Kua liu foki fatu a ia, ti fanau ai e tama tane, kua ui hana higoa ko Onani.

5 Kua liu foki fanau e ia e tama tane, kua ui hana higoa ko Sila; na fanau mai a ia ha i Kasipa hana matua tane.

6 Kua uta hoana e Iuta ma Eru hana tama uluaki, ko e hana higoa ko Tamara.

7 Ka ko Eru ko e tama uluaki a Iuta, kua mahani kelea a ia ki mua a Iehova, ti keli ai e Iehova a ia.

8 Ti pehe atu a Iuta kia Onani, Kia fano a koe ke he hoana he matakainaga hau, mo e hoana ki ai, kia fakatupu mai e fanau mo e matakainaga hau.

9 Kua iloa ni e Onani ko e mena nakai eke māna e fanau; kua fina atu a ia ke he hoana he hana matakainaga, ti moumou e ia ke he kelekele, neke fakatupu e ia e fanau mo e hana matakainaga.

10 Ka e kelea ki mua a Iehova e mena ne eke e ia; ti keli ai foki a ia.

11 Ti pehe a Iuta kia Tamara hana figona fifine, Kia nofo takape a koe ke he faoa he hau a matua tane ato lahi a Sila haku tama; ha kua pehe a ia, Neke mate a ia tuga hana tau matakainaga. Ti fano ai a Tamara kua nofo ke he faoa he hana matua tane.

12 Kua hoko ke he taha aho, ti mate ai e tama fifine a Sua ko e hoana a Iuta; kua mafanatia a Iuta, ti hake ai a ia kia lautolu ne hifi hana tau mamoe i Timenata, ko laua ni mo Haira e tagata Atulama ko e kapitiga hana.

13 Ti talahaua ni kia Tamara kua pehe, Kitiala, ko e matua fugavai hau kua hake ki Timenata ke hifi ai hana tau mamoe.

14 Ti tuku kehe e ia e tau tapulu he hana takape ia ia, kua ufiufi a ia he ie ufiufi, kua tapulu a ia, ti nofo a ia ke he gutuhala a Ainaima ha he puhala ki Timenata, ha kua kitia e ia kua lahi tuai a Sila, ka e nakai age a ia kia ia mo hoana hana.

15 Kua kitia e Iuta a ia, piko na ia ko e fifine fakataka a ia, ha kua ufiufi e ia hana mata.

16 Kua afe atu a ia kia ia ke he kauhala, mo e pehe atu, To fina atu nakai au kia koe? ko e mena nakai iloa e ia ko e hana figona fifine a ia. Kua pehe mai a ia, Ko heigoa e mena ke ta mai e koe kia au, kia hau ai a koe kia au?

17 Ti pehe atu a ia, To ta atu e au kia koe e punua koti mai he fuifui. Kua pehe mai a ia, To ta mai nakai e koe ha mena mo fakamoli ato ta mai ai e mena?

18 Ti pehe atu a ia, To ta atu heinoa e au kia koe mo fakamoli? Kua pehe mai a ia, Ko e hau a fakamau fakamailoga, mo e hau a kahoa, mo e hau a tokotoko ha ha he lima hau. Kua age ai e ia kia ia, ti fina age ai a ia kia ia; ti fatu ai a ia ia ia.

19 Ti matike e fifine mo e fano, kua tuku kehe e ie ne ufiufi aki a ia, kua tapulu foki ke he tau tapulu he hana takape.

20 Kua fakafano atu e Iuta e punua koti ke he lima he hana kapitiga ko e tagata Atulama, ke ta mai ai he lima he fifine e mena ne toka ai mo fakamoli; ka e nakai kitia e ia.

21 Ti huhu a ia ke he tau tagata he mena ia, kua pehe, ko fe e fifine fakataka ia ne nofo i Ainaima ke he kauhala? Ti pehe mai a lautolu. Nakai fai fifine fakataka ke he mena nai.

22 Ti liu a ia kia Iuta, mo e pehe age a ia, Nakai kitia e au a ia, ti tala mai foki e tau tagata he mena ia, nakai fai fifine fakataka ke he mena ia.

23 Ti pehe mai a Iuta, Tokai ke uta māna, neke fakalialia a taua; kitiala, kua fakafano atu tuai e au e punua koti, ka e nakai ni kitia e koe a ia.

24 Kua mole e mena ia tokai ko e tolu e mahina, ti talahau atu kia Iuta, kua pehe, Kua feuaki a Tamara e figona fifine hau, kitiala, kua fatu tuai a ia he hana a feuaki. Ti pehe atu ai a Iuta, Takitaki mai la a ia ke huhunu.

25 Kua takitaki mai a ia, ti fekau atu ai a ia ke he hana matua fugavai, kua pehe atu, Ko e tagata hana e tau mena ē ne fatu ai au; kua pehe foki a ia, Kikite la e koe po ko hai hana e tau mena ē, ko e fakamau fakamailoga, mo e kahoa, mo e tokotoko.

26 Kua kitia ni e Iuta, ti pehe atu ai, Kua mua hana tututonu ke he haku, ha kua nakai age e au a ia kia Sila haku tama; nakai liu foki iloa e ia e fifine ia.

27 Kua hoko ke he vaha ke fanau ai, kitiala, ko e mahaga ha he manava hana.

28 Kua hoko ke he hana a fanau mai, kua fakaolo mai e lima tama, ti toto ai he fifine fakafanau mo e pipi kula hana a lima, kua pehe age, Ko ia nai ne hau mua.

29 Kua liuaki hana a lima, kitiala, kua hau ai hana matakainaga; ti pehe atu ai a ia, Ne oho mai fefe a koe? ko e hau ni a oho mai nai; ti ui ai e ia hana higoa ko Faresa.

30 Ti hau fakamui hana matakainaga, ha he lima hana e pipi kula; ti ui ai e ia hana higoa ko Siraha.