Tau Salamo

5 IEHOVA na e, kia fakateliga mai a koe ke he haku a vagahau, kia kitekite mai a koe ke he oi he haku a loto.

2 Haku a Patuiki na e, mo e haku a Atua, kia hagao mai hau a na teliga ke he leo he haku a kalaga, ha ko koe ni ke liogi au ki ai.

3 Iehova na e, to logona e koe haku a leo ke he magaaho pogipogi; ko e magaaho pogipogi ke taute ai au haku a liogi kia koe, mo e kitekite atu au.

4 Ha ko koe, nakai ko e Atua ke fiafia ke he mahani kelea; nakai nofo fakalataha mo koe ha tagata mahani kelea.

5 Nakai tuku ki mua hāu a lautolu kua fakatokoluga; kua vihiatia e koe a lautolu oti kua mahani hepehepe.

6 To moumou e koe a lautolu kua vagahau pikopiko; to vihiatia lahi e Iehova e tagata lima toto mo e fakavai.

7 Ka ko au nai, ko e lahi he fakaalofa hāu, ke fina atu ai au ke he hāu, a fale; to hufeilo au ke he faituga tapu hāu mo e matakutaku kia koe.

8 Iehova na e, kia takitaki mai e koe au ke he hau a tututonu ha ko lautolu kua fai fi kia au; kia fakahako e koe hāu a puhala ki mua haku.

9 Ha ko e mena nakai fai fakamoli ke he tau gutu ha lautolu; kua kelea lahi ni e tau loto ha lautolu; ko e tau pu ua ha lautolu, ko e tau tukuaga takoko haia; kua fakavai ke he tau alelo ha lautolu.

10 Ko e Atua na e, kia fakahala e koe a lautolu, kia veveli a lautolu ke he tau pulega ha lautolu; kia tutuli kehe e koe a lautolu he loga e tau holifono ha lautolu; ha kua fakafualoto a lautolu kia koe.

11 Ka kia fiafia a lautolu oti kua tua kia koe; kia kalaga fiafia tukulagi a lautolu, ha ko e mena fakamalu e koe a lautolu; kia fiafia foki kia koe a lautolu kua fakaalofa ke he hāu a higoa.

12 Ha ko koe, Iehova na e, kua fakamonuina a ia kua tututonu; to puipui e koe a ia ke he fakaalofa, tuga ne akau punuti.