2 Nofoaga he Tau Patuiki

23 KA ko e tau fitu ne fakamalolo ai a Iehoiata, mo e eke e ia e maveheaga mo e tau iki he tau takiteau, ko Asaraia ko e tama a Ierohama, mo Isamaeli ko e tama a Iohanana, mo Asaraia ko e tama a Opeta, mo Maaseia ko e tama a Ataia, mo Elisafata ko e tama a Sikeri.

2 Ti takai ai e lautolu a Iuta, mo e fakapotopoto ai e lautolu e tau tagata Iuta mai he tau maga oti a Iuta, mo e tau tui ne mua a Isaraela; ti o mai ai a lautolu ki Ierusalema.

3 Ti eke ai he fakapotopotoaga oti e maveheaga mo e patuiki, ke he fale he Atua. Ne pehe atu foki a ia kia lautolu, Kitiala, to eke e tama he patuiki mo patuiki ke lata mo e mena ne vagahau mai ai e Iehova ke he fanau a Tavita.

4 Kia eke a e mutolu e mena nai, ko e taha veveheaga ne tolu aki ha mutolu, ko e tau ekepoa mo e tau tagata Levi, ko lautolu ke o mai ke he aho sapati, kia eke a lautolu mo tau leoleo he tau gutuhala;

5 To ha ha i ai foki taha veveheaga ke he fale he patuiki; mo e taha veveheaga ke he gutuhala he fakaveaga; ka ko e motu oti to ha ha i ai a lautolu ke he lotopa he fale a Iehova.

6 Ka e aua neke hu mai taha ke he fale a Iehova, ka ko e tau ekepoa ni hoko lautolu, mo lautolu kua fekafekau ai he tau tagata Levi; to huhu mai ai a lautolu ha kua fakatapu a lautolu, ka ko e motu oti to omaoma a lautolu ke he fekau a Iehova.

7 To agaagai foki e tau tagata Levi ke he patuiki ke takai ai, ko e tagata mo e hana kanavaakau ke he hana lima; kaeke ke hu mai taha ke he fale kia kelipopo a ia; ka kia ha ha i ai a mutolu mo e patuiki ke he hana hu mai ke he fale, mo e hana hu atu ki fafo.

8 Ti eke he tau tagata Levi mo Iuta oti ke lata mo e tau mena oti ne poaki atu ai he ekepoa ko Iehoiata, ne takitaha a lautolu mo e uta hana tau tagata ke huhu mai ki fale ke he aho sapati katoa mo lautolu ke huhu atu ke he sapati; he nakai fakatoka atu he ekepoa ko Iehoiata e tau vahega ke o.

9 Ti ta age he ekepoa ko Iehoiata ke he tau iki he tau takiteau e tau tao, mo e tau akau punuti, mo e tau akau pāpā he patuiki ko Tavita ne toka ai ke he fale he Atua.

10 Ti kotofa e ia e tau tagata oti ke tutu takai ai ke he patuiki, ko e tagata mo e hana kanavaakau ke he hana lima, ne kamata mai he fahi matau he fale, ke hoko atu ke he fahi hema he fale, ke he fahi he fatapoa o e fale.

11 Ti ta mai ai e lautolu e tama he patuiki, mo e tuku ai e lautolu ki luga hana e foufou, mo e ta atu kia ia e fakatufono, ti eke e lautolu a ia mo patuiki. Ne fakauku e Iehoiata mo e hana tau tama tane a ia, ti pehe age a lautolu, Kia moui ā e patuiki.

12 Kua logona e Atalia e go he motu ne tafepoi, mo e fakaheke atu ke he patuiki, ti hau ai a ia ke he motu ke he fale a Iehova;

13 Kua kitekite atu a ia, kitiala, kua tu ai e patuiki ke he tapa he hana pou ke he mena ne hu atu ai he gutuhala, mo e tau iki mo e tau pu ne ulo ne tata age ke he patuiki; mo e tau tagata oti he motu kua fiafia mo e ulo ai e tau pu, ko e tau tagata uhu lologo foki, ne ta e lautolu e tau e tau akau fakatagi, mo e takitaki e lautolu e tau lologo mo e fakaheke atu; ti hēhē ai e Atalia hana tau tapulu mo e pehe atu, Ko e fakafualoto, ko e fakafualoto.

14 Ti ta mai ki fafo he ekepoa ko Iehoiata e tau iki he tau takiteau, kua eke mo tau takitaki kau, mo e pehe age a ia kia lautolu, Kia uta e mutolu a ia ki tua he kau ne fakaatuatu; ko ia foki ke mui atu kia ia kia keli e mutolu a ia ke he pelu; ha kua pehe age e ekepoa, Aua neke keli e mutolu a ia ke he fale a Iehova.

15 Kua eke e lautolu e puhala māna, ti fano ai a ia ke he puhala ne o mai ai e tau solofanua ke he fale he patuiki; ti keli e lautolu a ia ke he mena ia.

16 Ti eke ai e Iehoiata e maveheaga, ko ia, mo e motu oti, mo e patuiki, ke eke a lautolu mo motu a Iehova,

17 Ti o age e motu oti ke he fale a Paala, mo e ulu moumou ai e lautolu, mo e tuki malipilipi ai e lautolu hana tau fatapoa mo e hana tau tupua, ti kelipopo e lautolu e ekepoa a Paala ko Matana ki mua he fatapoa.

18 Kua kotofa e Iehoiata e tau gahua he fale a Iehova ke eke he tau ekepoa ko e tau tagata Levi, ko lautolu ne kotofa e Tavita ke he fale a Iehova ke eke ai e tau poa huhunu kia Iehova, ke lata mo e mena kua tohi ke he fakatufono a Mose, mo e fiafia mo e lologo, tuga he eke e Tavita.

19 Kua kotofa foki e ia e tau leoleo gutuhala ke he tau gutuhala he fale a Iehova, neke hu mai ha tagata kua nakai mea ke he taha mena taha.

20 Kua uta foki e ia e tau iki he tau takiteau, mo e tau iki, mo e tau pule he motu, katoa mo e tau tagata oti he motu, ti o hifo a lautolu mo e patuiki he fale a Iehova; ti o mai a lautolu he gutuhala i luga ke he fale he patuiki, mo e fakanofo e lautolu e patuiki ke he nofoaiki he kautu.

21 Ti fiafia ai e tau tagata oti he motu, ti mafola e maga; ka kua keli e lautolu a Atalia ke he pelu.