2 Nofoaga he Tau Patuiki

24 NE fitu e tau a Ioasa he eke a ia mo patuiki; ti fagofulu e tau ne patuiki ai a ia i Ierusalema. Ko e higoa foki he hana matua fifine ko Tivia ko e tagata Peresepa.

2 Ne eke foki e Ioasa e tau mena tonu ki mua a Iehova ke he tau tau oti he ekepoa ko Iehoiata.

3 Ne ta mai e Iehoiata e tau hoana tokoua māna, ti fanau ai e ia e tau tama tane mo e tau tama fifine.

4 Kua mole atu e tau mena ia ti loto a Ioasa ke liu taute foki e fale a Iehova.

5 Ti fakapotopoto ai e ia e tau ekepoa mo e tau tagata Levi, kua pehe atu a ia kia lautolu, Kia o atu a a mutolu ke he tau maga i Iuta, mo e tatanaki mai i Isaraela oti e tau ario, ke liu taute ai e fale he Atua ha mutolu ke he taha tau mo e taha tau, kia eke fakaave foki e mutolu e mena na. Ka e nakai ni alumaki e tau tagata Levi.

6 Ti ui ai he patuiki a Iehoiata, ko e tagata ne mua he tau ekepoa a ia, mo e pehe age kia ia, Ko e heigoa e mena kua nakai pehe age a mutolu ke he tau tagata Levi ke ta mai i Iuta mo Ierusalema e tau poa ke lata mo e poaki a Mose ko e fekafekau a Iehova, mo e fakapotopotoaga a Isaraela, mo e fale uta fano he fakatufono.

7 Ha kua moumou he tau tama tane a Atalia ko e fifine mahani kelea e fale he Atua; mo e ta age e lautolu kia Paala e tau mena fakatapu oti he fale a Iehova.

8 Ne vagahau atu e patuiki, ti taute e lautolu e puha, mo e tuku ai e lautolu ki tua he gutuhala he fale a Iehova.

9 Ti fakamatala ai e lautolu i Iuta mo Ierusalema ke ta mai kia Iehova e poa ne poaki mai ai he fekafekau he Atua ko Mose kia Isaraela ke he tutakale.

10 Ti fiafia ai e tau iki oti mo e motu oti, ne ta mai e lautolu ha lautolu a tau poa, mo e liti ai ke he puha, ato katoatoa ai.

11 Ko e aho ne ta mai he tau tagata Levi e puha ke he tau tagata leveki mena he patuiki, mo e kitia e lautolu kua loga ai e tau tupe, ti o mai ai e tohikupu he patuiki, mo e fekafekau he ekepoa ne mua mo e liligi e puha mo e liu aki atu ke he mena ne toka ai. Ne eke pihia e lautolu ke he taha aho, mo e taha aho, mo e tatanaki ai e tau tupe loga.

12 Ti ta age ai he patuiki mo Iehoiata kia lautolu ne eke e gahua ke he tau fekafekauaga he gahua he fale a Iehova, mo e palepale ai e laua e tau tagata talai maka, mo e tau tufuga, ke liu taute ai e fale a Iehova, mo lautolu foki ne gahua ke he lapatoa, mo e apa kula, ke liu taute ai e fale a Iehova.

13 Ne gahua he tau ekegahua, kua oti e gahua he eke e lautolu, ne liu taute e lautolu e fale he Atua tuga hana tauteaga tuai, mo e fakamau ai e lautolu.

14 Kua oti e gahua ha lautolu, ti ta mai e lautolu e tau tupe ne toe ki mua he patuiki mo Iehoiata, ti eke aki e lautolu e tau kapiniu ma e fale a Iehova, ko e tau kapiniu ke fekafekau ai, mo e tau kapiniu ke eke aki e tau poa, mo e tau aku, ko e tau kapiniu auro, mo e tau kapiniu ario. Ti eke mau ai e lautolu e tau poa huhunu ke he fale a Iehova he tau aho oti a Iehoiata.

15 Ka kua motua tuai a Iehoiata, mo e leva ni hana moui, ti mate a ia. Ko e taha e teau ti tolugofulu e tau tau hana he mate a ia.

16 Ti tanu e lautolu a ia ke he maga a Tavita fakalataha mo e tau patuiki, he eke e ia e tau mena mitaki i Isaraela ke he Atua, katoa foki mo e hana fale.

17 Kua mole e mate a Iehoiata, ti o age ai e tau iki a Iuta, mo e fakaveveli fakafohifo ai a lautolu ke he patuiki. Ti fanogonogo ai e patuiki kia lautolu.

18 Ne tiaki foki e lautolu e fale a Iehova ko e Atua he tau matua ha lautolu, mo e fekafekau a lautolu ke he tau tupua Asaira, mo e falu a tupua. Ti hoko mai ai e ita kia Iuta mo Ierusalema, ha ko e tau hala ia ha lautolu.

19 Ne fakafano atu foki e ia e tau perofeta kia lautolu ke liuaki mai a lautolu kia Iehova; ti akonaki atu a lautolu kia lautolu; ka e nakai fanogonogo mai ai a lautolu.

20 Ti hoko mai ai e Agaga he Atua kia Sakaria ko e tama he ekepoa ko Iehoiata, ti tu ai a ia ki luga he motu o tagata, mo e pehe atu a ia kia lautolu. Kua pehe mai e vagahau he Atua, Ko e ha kua holi e mutolu e tau poaki a Iehova, ke nakai monuina ai e mutolu? Kua tiaki e mutolu a Iehova, ko e mena ia kua tiaki ai e ia a mutolu.

21 Ti fakafualoto a lautolu kia ia, mo e pini e lautolu a ia ke he tau maka ke he lotopa he fale a Iehova, ha poaki atu ai he patuiki.

22 Nakai manatu e patuiki ko Ioasa ke he fakaalofa he matua tane hana ko Iehoiata kia ia, ka e kelipopo e ia hana tama. Ne pehe mai foki a ia he mate a ia, Kia fofoga mai e Atua, mo e taui ai e ia.

23 Kua oti e tau, ti hake mai ai e kau a Suria ke tau mo ia; ne o mai a lautolu ki Iuta mo Ierusalema, mo e fakaoti ai e tau iki he motu, mai he motu, mo e fakafano age ke he patuiki a Tamaseko ha lautolu a tau mena oti ne moua he tau.

24 Ko e mena o mai e ka a Suria mo e tau tagata tokogahoa, ka e tuku atu ni e Iehova e kau lahi mahaki ke he tau lima ha lautolu he tiaki e lautolu a Iehova ko e Atua he tau matua ha lautolu. Ti fakahoko ai e lautolu e fakahala kia Ioasa.

25 Kua o kehe a lautolu ia ia (ha kua loga hana tau gagao he toka e lautolu a ia), ti fakafualoto kia ia hana tau fekafekau ha ko e toto he tau tama tane a Iehoiata ko e ekepoa, mo e kelipopo e lautolu a ia ke he hana mohega ti mate ai a ia; ti tanu e lautolu a ia ke he maga a Tavita, ka e nakai tanu e lautolu a ia ke he tukuaga he tau patuiki.

26 Ko e tau tagata hanai ne fakafualoto kia ia; ko Sapata ko e tama tane a Simeata ko e fifine Amoni, mo Iosapa ko e tama tane a Someri ko e fifine Moapi.

27 Ko e tala foki ke he hana tau tama tane, mo e tau kavega lalahi ne tuku atu kia ia, mo e liu taute ai e fale he Atua, kitiala, kua tohi ke he tala ha ha he tohi ke he tau patuiki. Ti eke e tama hana ko Amasia mo patuiki ke hukui aki a ia.