Fakamatalaaga

8 KO hai kia kua tuga ne tagata iloilo? Ko hai foki kua iloa e fakamatalaaga he mena? Ko e iloilo he tagata kua kikila ai hana mata; kua faliu ai foki hana mata favale.

2 Kua pehe atu au, kia omaoma a ke he poaki he patuiki, ha ko e omonuo foki he Atua.

3 Aua neke fano kehe fakatepetepe a koe mai mua hana; ua fakamakamaka atu a koe ke he mena kelea; ha ko e mena eke ni e ia e tau mena oti ne finagalo ki ai a ia.

4 Ko e mena toka ai e pule ke he poaki he patuiki; ko hai foki ke pehe age kia ia, Ko e heigoa kua eke e koe?

5 Ko ia kua omaoma ke he fakatufono nakai iloa e ia ha mena kelea; kua iloa foki he loto he tagata e vaha ke lata ai mo e mena kua tonu.

6 Ha ko e takitaha e mena mo e hana vaha mo e mena ne tonu ai; ha kua lahi e matematekelea he tagata i luga hana;

7 Ha kua nakai iloa e ia e tau mena ke tutupu; ha ko hai ke fakailoa atu kia ia po ke heigoa ke tutupu mai?

8 Nakai fai tagata kua pule ke he agaga ke taofi ai e agaga; nakai pule foki a ia ke he aho ke mate ai a ia; to nakai fakafano kehe foki taha he tau ia; ko e mahani kelea foki nakai laveaki e ia a ia ne eke ai.

9 Ne kitia e au e tau mena oti na, ne manatu foki e au ke he haku loto ke he tau gahua oti kua eke i lalo he lā; ha ha i ai e vaha kua pule ai e taha tagata ke he taha, ke kelea ai e ia ni.

10 Ti kitia e au e tau tagata mahani kelea kua tanu, ne hohoko atu a lautolu ke he tukuaga; ko lautolu foki ne eke e mahani tonu ne o kehe a lautolu he mena tapu; ti nimo ai foki a lautolu ke he maga; ko e mena fakateaga foki ia.

11 Kua nakai hoko vave e fakahala ke he mahani kelea, ko e mena ia kua manako lahi ai e tau loto he tau tagata ke eke mena kelea.

12 Pete ni he laga teau he eke mena kelea he tagata hala, mo e fakatuleva ai hana moui; ka kua iloa ni e au to monuina a lautolu kua matakutaku ke he Atua, ko lautolu kua matakutaku ki mua hana.

13 Ka e nakai monuina a ia ne mahani kelea, nakai fakatuleva foki hana tau aho, kua tuga ne ata; ha kua nakai matakutaku a ia ki mua he Atua.

14 Ha ha i ai e mena fakateaga kua eke ke he lalolagi hanai; ha ha i ai e tau tagata tututonu kua hoko kia lautolu e tau mena kua lata mo e gahua he tau tagata mahani kelea; ha ha i ai foki e tau tagata mahani kelea kua hoko kia lautolu e tau mena kua lata mo e gahua he tau tagata tututonu; kua pehe hifo au, Ko e mena fakateaga foki haia.

15 Ti fakaheke atu au ke he fiafia; ha kua nakai fai mena mitaki ke he tagata i lalo he lā, ka kia kai a ia, mo e inu, mo e fiafia; ha kua tumau ia kia ia mai hana tau gahua, ke he tau aho oti he hana moui, kua foaki mai he Atua kia ia i lalo he lā.

16 Ne haga atu e au haku loto ke moua ai e iloilo, kia kitia foki e au e tau gahua kua eke ke he lalolagi; ha ko e mena ha ha i ai foki kua nakai maeke ke mohe hana tau mata ke he aho katoa mo e po;

17 Ti kitia ai e au e tau gahua oti he Atua, kua nakai maeke ke he tagata ke iloa e gahua kua eke i lalo he lā; ha ko e mena pete he mamahi e tagata he kumi, ka e nakai iloa e ia; ko e mena foki, pete he pehe hifo e tagata iloilo, ko e iloa ne fai e ia, ka e nakai ni maeke ke iloa e ia.