Roma

13 KIA omaoma e tau tagata oti kana ke he tau tui ne mua; ha kua nakai fai pule kua nakai mai he Atua; ka ko lautolu ha ha i ai e pule ainei, kua kotofa he Atua a lautolu.

2 Hanai, ko ia kua totoko atu ke he pule kua totoko atu a ia ke he kotofaaga he Atua; ko lautolu foki kua totoko atu, to hoko kia lautolu e fakahala.

3 Ha ko e tau iki nakai ko e fakamatakutaku a lautolu ke he tau mahani mitaki, ka ko e tau mahani kelea. Ko e hāu a manako kia ke nakai matakutaku ke he pule? kia mahani mitaki a koe, ti talahaua mitaki ai a koe e ia.

4 Ha ko e fekafekau he Atua a ia kia koe, kia mitaki ai; kaeke foki ke mahani kelea a koe, kia matakutaku ai, ha ko e mena nakai eke noa e ia e pelu; ha ko e fekafekau a ia he Atua, ko ia ke taui atu e ita kia lautolu kua mahani kelea.

5 Hanai, kua lata ke omaoma, nakai kuenaia ha ko e ita, ka e pihia foki ha ko e loto manamanatu.

6 Ko e mena foki ia, kua ta atu ai e mutolu e poa, ha ko e tau fekafekau he Atua a lautolu, kua fakamakamaka ke he mena ia ni.

7 Hanai, kia ta atu ke he tau tagata oti kana ha lautolu a tau mena; ko e poa kia lautolu kua lata ki ai e poa; ko e telu kia lautolu kua lata ki ai e telu; ko e matakutaku kia lautolu kua lata ki ai e matakutaku; ko e lilifu kia lautolu kua lata ki ai e lilifu.

8 Aua neke toka ia mutolu ha mena taha he taha tagata, ka ko e feofanaki hokoia; ha ko ia kua fakaalofa atu kia taha, kua katoatoa kia ia e omaoma ke he fakatufono.

9 Ha ko e tau kupu nai, Ua faivao, Ua keli tagata, Ua kaiha, Ua fatipiko, Ua manako lahi, kaeke foki kua toe e poaki kua fakamaopoopo ia ke he kupu nai, Kia fakaalofa atu a koe kia ia ne katofia a mua, kia tuga foki na koe kia koe.

10 Kua nakai mahani kelea e fakaalofa kia ia ne katofia mo ia; hanai, ko e fakaalofa ko e katoatoa he omaoma ia ke he fakatufono.

11 Kia pihia foki, ha kua iloa e tautolu e vaha, kua hoko ke he magaaho ke ala mai ai he mohe; ha kua tata ainei kia tautolu e fakamouiaga ha tautolu, ka e mamao ke he vaha ne tua mua ai a tautolu.

12 Kua leva tuai e po, kua tata tuai e aho; ko e mena ia kia tuku kehe ai e tautolu e tau gahua he pouli, ka e fakatapulu a tautolu ke he tau tapulu tau he aho.

13 Kia mahani fakamitaki a tautolu kua lata mo e aho; aua neke tafeauhi mo e konahia, aua neke feuaki mo e matahavala, aua neke taufetoko mo e mahekeheke.

14 Ka kia fakatapulu a mutolu ke he Iki, ko Iesu Keriso; aua foki neke taute e tau mena he tino ke hoko ai hana tau manako lahi.