Fakakiteaga

3 KIA tohi foki e koe ke he agelu he ekalesia i Sarataisa, Ko e tau mena nai kua tala mai a ia ha ha i ai e tau Agaga ne tokofitu he Atua, mo e tau fetu ne fitu, Kua iloa e au hau a tau gahua, he ha ia koe e higoa kua moui a koe, ka kua mate ni.

2 Kia mataala a koe, mo e fakamau e tau mena kua toe ko e mamate ha ne fai; ha kua nakai iloa e au hau a tau gahua kua katoatoa ki mua he Atua.

3 Hanai, kia manatu a koe ke he tau mena ne moua ai e koe, mo e fanogonogo a koe ki ai, kia taofi foki e koe ki ai, mo e tokihala. Kaeke foki ke nakai mataala a koe, ti fina atu au kia koe tuga e kaiha, ti nakai iloa foki e koe po ke magaaho fe ke fina atu ai au kia koe.

4 Kua ha ha ia koe e falu a tagata tokogaogao i Sarataisa ni, kua nakai fakakelea e lautolu ha lautolu a tau tapulu; to o fano foki a lautolu mo au ke he tau tapulu hina, ha kua lata ai a lautolu.

5 Ko ia kua kautu to fakatapulu a ia ni ke he tau tapulu hina; ti nakai tamate foki e au hana higoa ke he tohi he moui, ka e totoku e au hana higoa ki mua haku Matua, ki mua foki he hana tau agelu.

6 Ko ia kua fai teliga, kia fanogonogo a a ia ke he mena kua talahau mai he Agaga ke he tau ekalesia.

7 Kia tohi foki e koe ke he agelu he ekalesia i Filatelefaia, Ko e tau mena nai kua tala mai a ia kua tapu, ko ia kua fakamoli, ko ia ha i ai e tau kei a Tavita, ko ia kua hafagi, ka e nakai pa e taha; ko ia foki kua pa, ka e nakai hafagi e taha;

8 Kua iloa e au hau a tau gahua; kitiala, kua tuku atu tuai e au ki ho mua e pahala kua hafagi ti nakai maeke ia taha ke pa ai; ha ko e mena tote hau a malolo kua taofi foki e koe haku a kupu, mo e nakai fakatikai e koe haku a higoa.

9 Kitiala, to uta e au mo tau tagata he sunako a Satani a lautolu, kua tala mai ko e tau tagata Iutaia a lautolu, ka e nakai fakai, ka kua pikopiko a lautolu; kitiala, to takitaki e au a lautolu kia o atu a lautolu ki ho mua, mo e hufeilo ke he na ve hau; ti iloa foki e lautolu kua fakaalofa atu au kia koe.

10 Kua taofi e koe e kupu he haku a fakauka, ko e mena ia ke taofi ai foki e au a koe ke he magaaho kamatamata ko e hoko mai ne fai ke he lalolagi oti, ke kamatamata ai a lautolu kua nonofo ke he lalolagi.

11 Kitiala, to fina atu vave au; kia taofi mau e tau mena ha ha ia koe, neke uta he taha hau a foufou.

12 Ko ia kua kautu to eke e au a ia mo pou he faituga he Atua haku, ti nakai tuai hu atu a ia ki fafo, ti tohi foki e au ki ai e higoa he Atua haku, mo e higoa he māga he haku a Atua, ko Ierusalema fou ia ne hifo mai he lagi mai he haku a Atua, katoa foki mo e haku a higoa fou.

13 Ko ia kua fai teliga, kia fanogonogo a a ia ke he mena kua talahau mai he Agaga ke he tau ekalesia.

14 Kia tohi foki e koe ke he agelu he ekalesia i Laotikaia, Ko e tau mena nai kua tala mai e Amene, ko e talahau kua fakamoli mo e moli, ko ia ko e kamataaga he tau mena ne eke he Atua;

15 Kua iloa e au hau a tau gahua, kua nakai momoko a koe, ti nakai vevela foki; na loto au kia momoko a koe po ke vevela;

16 Hanai, kua mafana a koe, ka e nakai momoko, ti nakai vevela foki, ko e mena ia kua teitei fakalua atu ai e au a koe mai he gutu haku.

17 Ha kua tala mai e koe, Kua maukoloa au, kua fakaloga mai haku a tau mena, kua nakai nofogati foki au he taha mena taha; ka e nakai iloa e koe kua malaia a koe, mo e matematekelea, mo e nofogati, mo e matapouli, mo e nakai fai felevehi;

18 Kua tala atu ai au kia koe ke fakafua atu ia au e auro kua fakamea ke he afi, kia maukoloa ai a koe; mo e tau tapulu hina kia fakatapulu ai a koe, neke kitia foki e mā he hāu a nakai fai felevehi; mo e vaimata ke goigoi aki hau a tau mata, kia kitia ai e koe.

19 Kua akonaki atu mo e fahi e au a lautolu oti kua fakaalofa au ki ai; hanai, kia eke taha a koe, mo e tokihala.

20 Kitiala, kua tu atu au ke he pahala mo e tukituki atu; kaeke ke fanogonogo e taha ke he haku a leo, mo e hafagi mai e pahala; to hu atu au kia ia, ti kai mena foki au mo ia, ko ia foki mo au.

21 Ko ia kua kautu, to foaki e au kia ia ke nonofo mo au ke he haku a nofoaiki, tuga na au foki kua kautu au mo e nonofo foki mo e Matua haku ke he hana nofoaiki.

22 Ko ia kua fai teliga, kia fanogonogo a a ia ke he tau mena kua talahau mai he Agaga ke he tau ekalesia.