Fakakiteaga

16 NE logona foki e au e leo lahi mai he faituga, kua pehe atu ke he tau agelu tokofitu, Ati o a mutolu mo e liligi atu e tau kapiniu he ita he Atua ke he lalolagi.

2 Ti fina atu ai a ia kua fakamua, kua liligi hifo hana kapiniu ke he fonua, ti hoko ai e popo kelea mo e mamahi ke he tau tagata ne toka ai e fakamailoga he manu favale, katoa mo lautolu kua hufeilo ke he hana fakatino.

3 Kua liligi foki he agelu kua tokoua aki hana kapiniu ke he tahi; ti faliu ai tuga ne toto he tagata mate; ti mamate ai e tau mena momoui oti ha ha he tahi.

4 Kua liligi foki he agelu kua tokotolu aki hana a kapiniu ke he tau vailele mo e tau vaipuna; ti faliu toto ai.

5 Ne logona foki e au e agelu kua pule ke he tau vai, kua pehe atu, Ko e Iki na e, kua tututonu a koe, ko koe kua moui ni, ne moui tuai, to mitaki a koe ha kua fakahala pihia e koe.

6 Ha kua fakamaligi e lautolu e toto he tau tagata tapu mo e tau perofeta, kua age foki e koe kia lautolu e toto ke inu ai; ha ko e mena lata ia ma lautolu.

7 Ne logona foki e au e taha mai he fatapoa, kua pehe atu, Haia, ko e Iki na e, ko e Atua mana kua moli mo e tonu hau a tau fakafiliaga.

8 Kua liligi foki he agelu kua tokofa aki hana a kapiniu ke he la; kua tuku age foki kia ia ke fakavela e tau tagata ke he afi;

9 Kua velagia foki e tau tagata ke he vela lahi; ti vagahau kelea ai a lautolu ke he higoa he Atua hana e pule ke he tau malaia ia, ka e nakai tokihala a lautolu ke tuku atu ai e fakahekeaga kia ia.

10 Kua liligi foki he agelu kua tokolima aki hana kapiniu ki luga he nofoaiki he manu favale; ti kua pouligia ai hana kautu; ti gau ai e lautolu ha lautolu a tau alelo he mamahi;

11 Kua vagahau kelea foki a lautolu ke he Atua he lagi, ha ko e tau mamahi ha lautolu mo e tau popo ha lautolu, kua nakai tokihala foki a lautolu he tau mahani ha lautolu.

12 Kua liligi foki he agelu kua tokoono aki hana kapiniu ke he vailele lahi ko Eufirate; ti mamiti ai hana a vai, kia tauteute ai e puhala he tau patuiki mai he fahi kua hake ai e la.

13 Ti kitia ai e au tokotolu e agaga kelea tuga ne tau rane, kua o mai he gutu he tarako, mo e gutu he manu favale, katoa mo e gutu he perofeta pikopiko.

14 Ha ko e tau agaga ia he tau temoni kua eke e tau fakamailoga, kua o atu a lautolu ke he tau patuiki he lalolagi, mo e lalolagi oti kana, kua fakapotopoto a lautolu ke tau ke he aho lahi he Atua mana.

15 (Kitiala, kua fina atu au po ke tagata kaiha; uhoaki a ia kua mataala, mo e leveki hana tau tapulu, neke fai fano a ia mo e nakai felevehi, ti kitia ai e lautolu hana a mā.)

16 Ne fakapotopoto foki e ia a lautolu ke he mena kua higoa ke he vagahau Heperu ko Amaketo.

17 Kua liligi foki he agelu kua tokofitu aki hana a kapiniu ke he pulagi likoliko; ti fina atu ai e leo lahi mai he faituga ha he lagi, mai he nofoaiki, kua pehe atu, Kua oti tuai he eke.

18 Ti tutupu ai e tau leo, mo e tau pakulagi, mo e tau uhila, ha i ai foki e mafuike lahi, nakai lahi pihia ha mafuike tali mai he nofo e tau tagata ke he lalolagi, kua mahaki ni.

19 Kua vevehe tolu foki e maga lahi, kua veveli foki e tau māga he tau motu; ti manatu ai e Atua e maga lahi ko Papelonia, ke ta age ki ai e kapiniu he uaina he hana ita kaka.

20 Kua fehola foki e tau motu oti kana, ko e tau mouga foki kua nakai kitia.

21 Kua to mai foki mai he lagi ki luga he tau tagata e uha tuli mahaki tuga ne taleni hana mamafa; ti vagahau kelea ai e tau tagata ke he Atua, ha ko e malaia he uha tuli, ha kua lahi ue atu e malaia ia.