1 Korinito

10 KO e tau matakainaga na e, ne loto au ke iloa e mutolu, ha ha i lalo he aolagi e tau tupuna oti ha tautolu, mo e o age a lautolu oti ke he tahi,

2 Mo e papatiso a lautolu oti kia Mose ke he aolagi mo e tahi,

3 Mo e kai e lautolu oti ni ke he mena kai ne taha kua lata mo e agaga,

4 Mo e inu e lautolu oti ni ke he vai ne taha kua lata mo e agaga; nukua inu e lautolu ke he maka kua lata mo e agaga ne mui atu kia lautolu, ko e maka ia ko Keriso haia;

5 Ka e nakai fiafia e Atua ke he falu ia lautolu ne tokologa; ha ko e mena ne tafola ai ha lalu tau tino ke he tutakale.

6 Ne eke e tau mena ia mo tau fakamailoga kia tautolu, neke foli a tautolu ke he tau mena kelea, tuga ne foli e lautolu.

7 Aua foki neke hufeilo ke he tau tupua, tuga e falu ia lautolu; tuga he tohi mai, Ne nonofo e motu o tagata ki lalo ke kai mena, mo e inu, ti tutu ai a lautolu ke koli.

8 Aua foki neke feuaki a tautolu, tuga ne falu ia lautolu ne feuaki, mo e mahaikava ke he aho taha ne uafulu e afe, ti tolu e afe.

9 Aua foki neke fakahogohogo e tautolu a Keriso, tuga ne fakahogohogo he falu ia lautolu, ti mamate ai he tau gata.

10 Aua foki neke loma a tautolu, tuga ne loma e falu ia lautolu, ti mamate kia ia ne pule ke kelipopo.

11 Ne hohoko e tau mena oti ia kia lautolu ke eke mo tau fakamailoga; kua tohi foki ke eke mo tomatomaaga ma tautolu kua hohoko mai ke he vaha ke fakahiku ai.

12 Hanai, ko ia kua manatu kua tu a ia, kia fakaeneene a ia neke veli.

13 Nakai moua a mutolu he kamatamata kua kehe mo e tau tagata auloa; ha kua fakamoli e Atua, he nakai tuku atu e ia a mutolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.

14 Ko e mena ia, haku a tau fakahelehele na e, kia fehola kehe ai a mutolu he hufeilo ke he tau tupua.

15 Kua vagahau atu au ke he tau tagata loto matala; kia manamanatu e mutolu haku ne tala atu.

16 Ko e kapiniu he fakaaue kua fakaaue ai a tautolu nakai kia ko e fakafetui fakalataha ia mo e toto a Keriso? ko e areto kua tofitofi e tautolu, nakai kia ko e fakafetui fakalataha ia mo e tino a Keriso?

17 Ha ko tautolu kua tokologa ko e areto e taha mo e tino e taha a tautolu; nukua igatia a tautolu oti kana ke he areto taha.

18 Kitiala, ko Isaraela ha ha he tino; ko lautolu kua kai e tau poa, nakai kia fakafetui a lautolu fakalataha mo e fatapoa?

19 To tala atu ha ha e au? Ko e mena aoga kia e tupua? Po ke mena aoga kia e mena kua keli mo poa ke he tupua?

20 Nakai; ka ko e tau mena kua keli mo poa he tau motu kehe, kua keli mo poa ai e lautolu ke he tau temoni, ka e nakai ke he Atua; nakai loto foki au ke fakafetui fakalataha a mutolu mo e tau temoni.

21 Mena nakai maeke ia mutolu ke inu ke he kapiniu he Iki katoa mo e kapiniu he tau temoni; ti nakai maeke ke fai tufaaga he laulau he Iki katoa mo e laulau he tau temoni.

22 To fakahogohogomanava kia a tautolu ke he Iki? Kua homo kia ha tautolu a malolo ke he hana ni?

23 Kua pule e au ke he tau mena oti ke eke e au, ka e nakai aoga e tau mena oti; kua pule e au ke he tau mena oti ke eke e au, ka e nakai fakamafana he tau mena oti.

24 Aua neke kumi e taha e mitaki hana ni, ka kia takitokotaha mo e kumi e mitaki he falu.

25 Ko e tau mena oti kua fakatau ke he mena fakatau ai mena kai, kia kai ai a mutolu aua neke huhu ha mena ha ko e loto manamanatu;

26 Ha ko e lalolagi, ko e mena he Iki haia, katoa mo e tau mena kua puke ai.

27 Kaeke foki ke tala age a mutolu he taha kua nakai liogi ke o age ke kai, ti loto a mutolu ke o ki ai, kia kai a mutolu e tau mena oti kua fakatokatoka ki mua ha mutolu; aua neke huhu ha mena ha ko e loto manamanatu.

28 Kaeke ke pehe mai taha kia mutolu, Ko e mena nai kua keli mo poa ke he tupua; ua kai ai, ha ko ia ni ne fakakite mai ai, ha ko e loto manamanatu foki; ha ko e lalolagi ko e mena he Iki haia, katoa mo e tau mena kua puke ai.

29 Ko e loto manamanatu kua tala atu ai e au, nakai ko e hāu ia, ka ko e loto manamanatu he taha ha ko e ha kia kua fakafili ai haku a pule ke he loto manamanatu he taha?

30 Ko au foki, kaeke kua kai au mo e fakaaue, ko e ha he vagahau kelea ai kia au ha ko e mena ia kua fakaaue ai au?

31 Hanai, po ke kai mena a mutolu, po ke inu a mutolu, po ke eke e mutolu taha mena, kia eke e mutolu e tau mena oti kana ke fakaheke ai ke he Atua.

32 Aua neke eke a mutolu mo mena ke fakatupetupe ai e tau tagata Iutaia, po ke tau tagata Heleni, po ke ekalesia he Atua;

33 Tuga foki au, kua fakafiafia atu e au e tau tagata oti ke he tau mena oti kana, nakai kumi e au haku a mitaki, ka ko e mitaki he tokologa, kia fakamomoui ai a lautolu.