Roma

5 HANAI, ha kua talahaua tututonu a tautolu ke he tua, kua ha ha ia tautolu e mafola mo e Atua ha ko e Iki ha tautolu, ko Iesu Keriso;

2 Ko ia foki kua moua mai ai e tautolu e takitakiaga ke he fakaalofa noa nai, kua tutu ai a lautolu ke he tua; ha ha ne hula foki a tautolu mo e amaamanaki ke he monuina mai he Atua.

3 Ka e nakai kuenaia foki ia, ka kua hula foki a tautolu ke he tau mena matematekelea, ha kua iloa ni ko e matematekelea kua tupu mai ai e fakauka.

4 Ko e fakauka kua tupu ai e fakamoli, ko e fakamoli kua tupu ai e amaamanaki,

5 Ko e amaamanaki foki kua nakai fakamā ai, ha kua fakamaligi mai e fakaalofa he Atua ke he tau loto ha tautolu ke he Agaga Tapu kua foaki mai kia tautolu.

6 Ha ko e mena ne matulei a Keriso ke he vaha ne lata ai, ka kua lolelole gaia a tautolu, ko e hukui he tau tagata matahavala.

7 Ha kua nakai ligaliga maeke ia taha ke mate ke hukui aki e tagata tututonu; ka ko e tagata mahani mitaki, na kua fakamalolo taha ke mate ke hukui aki a ia heute he pihia;

8 Ka kua fakakite mai he Atua hana fakaalofa kia tautolu he matulei a Keriso ke hukui aki a tautolu, ka ko e tau tagata hala agaia a tautolu.

9 Hanai, ha kua talahaua tututonu ainei a tautolu ke he hana toto, ti nakai kia fakamoui he ha e ia a tautolu mai he ita?

10 Ha ko e mena kaeke kua fakafeilo a tautolu mo e Atua ke he matulei he Tama hana, ka ko e tau fi a tautolu, ti nakai kia fakamomoui he ha a tautolu ke he moui hana, ka kua fakafeilo tuai a tautolu mo ia?

11 Ka e nakai kuenaia ia, ka kua hula foki a tautolu ke he Atua ha ko e Iki ha tautolu ko Iesu Keriso, ko ia kua moua ai ainei e tautolu e fakafeiloaga.

12 Hanai, tuga ni he hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana;

13 Nukua ha ha he lalolagi e hala kua hoko ke he vaha he fakatufono; ka e nakai talahaua e hala ka nakai fai fakatufono;

14 Ka kua kautu e mate, kua kamata ia Atamu ato hoko kia Mose, kua hoko ni kia lautolu kua nakai hala po ke holifono a Atamu, ko ia ko e fakatai kia ia nakai la haele mai.

15 Ka e nakai tuga e hula e mena kua foaki noa mai; ha ko e mena kaeke kua mamate tokologa ke he hala he tokotaha, ti kua au atu he fakalahi kia tokologa e fakaalofa noa he Atua mo e mena foaki noa ke he fakaalofa noa, ha ha he tagata tokotaha ko Iesu Keriso haia.

16 Ka e nakai tuga e tokotaha ne hala, e mena foaki noa mai; ha ko e hala e taha ne fakahala, kua hoko ai e fakahala; ka ko e tau hala loga e mena foaki noa mai kia taiahaua tututonu ai.

17 Ha ko e mena kaeke ko e tokotaha kua kautu ai e mate ha ko e hala he tokotaha, ti au atu ai he kautu mo e momoui a lautolu kua moua e lahi ue atu he fakaalofa noa katoa mo e tututonu kua foaki noa mai, ha ko e tokotaha ko Iesu Keriso haia.

18 Hanai foki, tuga he hoko ke he tau tagata oti kana e fakahala ha ko e hala ne taha; ti pihia foki he hoko ke he tau tagata oti kana e talahaua tututonu ha i ai e moui, ha ko e tututonu ne taha.

19 Ha ko e mena, tuga he uta mo tau tagata hala e tokologa ha ko e liuliu he tokotaha, to uta pihia foki mo tau tagata tututonu e tokologa ha ko e omaoma he tokotaha.

20 Ka kua lafilafi mai e fakatufono kia loga ai e tau hala; ka ko e mena ne fakaloga ai e tau hala ne fakalahi ue atu i ai e fakaalofa noa.

21 Kua tuga he kautu e hala kua hoko ke he mate, kia kautu pihia foki e fakaalofa noa ke he tututonu ke hoko ke he moui tukulagi, ha ko Iesu Keriso ha tautolu a Iki.