Tau Salamo

37 AUA neke fakamamahi e koe a koe ha ko e tau tagata mahani kelea; aua foki neke mahekeheke kia lautolu kua eke mena kelea.

2 Ha ko e mena helehele vave a lautolu tuga ne motietie; to fifigo foki a lautolu tuga ne tau lau kou mui.

3 Kia tua a koe kia Iehova, mo e eke e mahani mitaki, kia nofo ai a koe ke he motu, mo e kai e fakamoli.

4 Kia fiafia a koe kia Iehova, ti foaki mai ai e ia kia koe e tau mena kua manako ki ai hāu a loto.

5 Kia tuku atu hāu a puhala kia Iehova, kia tua foki a koe kia ia, ti eke ai e ia.

6 To fakakite e ia hāu a tututonu tuga ne maama, mo e hāu a fakafiliaga tuga ne tupou la.

7 Kia fakamate kia Iehova, mo e talifaki; aua neke fakamamahi e koe a koe ha ko ia ne monuina ke he hana tau puhala, ko e tagata kua eke lagatau kelea.

8 Kia toka e ita mo e tiaki e vale; aua neke fakamamahi e koe a koe, neke eke e koe ha mena kelea.

9 Ha ko e mena fakaotioti a lautolu kua mahani kelea; ka ko lautolu kua talifaki kia Iehova, to eke ma lautolu e motu.

10 Toe tote, ti nakai ha i ai e tagata mahani kelea; ka manamanatu foki a koe ke he mena hana ne nofo ai, nakai ha i ai a ia.

11 Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.

12 Kua fatuakiloto e tagata mahani kelea ke kelea ai e tagata tututonu; kua konoi foki hana tau nifo kia ia.

13 To kata e Iki kia ia, ha kua fioia e ia ha ne hau hana aho.

14 Kua aki e tau tagata mahani kelea e tau pelu, kua loloku e lautolu e tau kaufana ha lautolu, kia mamate ai e tau tagata matematekelea,mo lautolu ne nonofogati, kia tamate e lautolu e tau tagata mahani hako.

15 To hoko ha lautolu a tau pelu ke he tau atefua ha lautolu, to fatifati foki ha lautolu a tau kaufana.

16 Ko e mena tote ha he tagata tututonu, kua mua hana mitaki ke he koloa lahi he tau tagata mahani kelea tokologa.

17 Ha ko e mena fati ni e tau lima he tau tagata mahani kelea; ka e tokotu e Iehova a lautolu ne tututonu.

18 Kua fioia e Iehova e tau aho he tau tagata mahani hakohako; to tukulagi ni ha lautolu a tau mena kua moua.

19 Nakai ma a lautolu ke he vaha kelea; to mamakona foki a lautolu ke he vaha hoge.

20 Ha ko e mena mahakava ni e tau tagata mahani kelea; ko lautolu foki kua ita kia Iehova, to mole atu a lautolu tuga ne mena uho he tau punua mamoe; to mole atu a lautolu, tuga ne ahua.

21 Kua ogo mena he tagata mahani kelea, ka e nakai liuaki atu e ia; ka ko e tagata tututonu, kua mahani fakaalofa a ia, mo e foaki noa atu.

22 Ha ko lautolu kua fakamonuina e ia, to eke ma lautolu e motu; ka ko lautolu kua kaialu e ia, to fakaotioti a lautolu.

23 Ko Iehova ne kotofa e fanoga he tagata; to fiafia foki a ia ke he hana puhala.

24 Kaeke ke veli a ia, ti nakai takaveli ni; ha kua toto e Iehova hana lima.

25 Ne fuata au, ka kua motua tuai au ainei; ka e nakai kitia e au ha tagata tututonu kua tiaki, po ke hana fanau kua ole mena kai.

26 Kua mahani fakaalofa a ia ke he tau aho oti; kua foaki noa atu e ia hana tau mena; kua monuina foki hana fanau.

27 Kia kalo kehe a koe mo e tau mena kelea, ka e eke e mahani mitaki; ti nofo muatua ai a koe.

28 Ha kua fiafia a Iehova ke he fakafiliaga; nakai tiaki foki e ia hana tau tagata tapu; kua leoleo e ia a lautolu tukulagi; ka e fakaotioti ni e fanau he tau tagata mahani kelea.

29 To eke ni e motu ma e tau tagata tututonu, to nonofo muatua ai a lautolu.

30 To talahau iloilo he gutu he tagata tututonu, ti vagahau mai foki e fakafiliaga he hana alelo.

31 Ha he loto hana e fakatufono he hana Atua, nakai hapelua foki hana hui.

32 Kua takahao he tagata mahani kelea ke he tagata tututonu, kua kumi foki e ia ke keli a ia.

33 Nakai toka e Iehova a ia ke he hana lima; ti nakai fakahala foki e ia a ia ka fakafili a ia.

34 Kia talifaki a koe kia Iehova, mo e tumau ke he hana puhala; ti fakamatalahi e ia a koe ke eke māu e motu; to kitia e koe e tau tagata mahani kelea kua mahakava.

35 Ne kitia atu e au e tagata mahani kelea kua favale, kua fakalahi foki a ia tuga ne akau kua tupu ke he hana ni a kelekele, kua tupuolamoui.

36 Ka kua mole atu a ia, kitiala, kua nakai ha i ai; ne kumi foki e au a ia ka e nakai fakai ke kitia.

37 Kia manamanatu kia ia kua mahani hakohako, mo e kitekite kia ia kua mahani tonu; ha ko e fakahikuaga he tagata ia ko e monuina haia.

38 Ka e mahaikava fakalataha e tau holifono; ko e fakahikuaga foki he tau tagata mahani kelea ko e malaia haia.

39 Mai ia Iehova e fakamouiaga he tau tagata tututonu; ko ia ni ko e taue ha lautolu ke he vaha matematekelea.

40 Kua lagomatai foki a Iehova kia lautolu, mo e laveaki a lautolu; to laveaki e ia a lautolu mai he tau tagata mahani kelea, to fakamoui foki a lautolu, ha kua tua a lautolu kia ia.