2 Nofoaga he Tau Patuiki

17 TI eke e tama hana ko Iehosafata mo patuiki ke hukui aki a ia, ti fakamalolo ai a ia ke totoko au kia Isaraela.

2 Ne kotofa foki e ia e tau kau ke he tau maga nonofo taue oti a Iuta ne kotofa foki e ia e tau kau leoleo ke he motu ko Iuta, mo e tau maga a Efaraimo ne fofo e Asa hana matua.

3 Ha ha i ai a Iehova mo Iehosafata, he fano a ia ke he tau puhala fakamua he hana matua ko Tavita, mo e nakai kumi e ia kia Paala;

4 He kumi e ia e Atua he hana tau matua, mo e fano ai a ia ke he hana tau poaki, ka e nakai tuga ne tau mena ne eke e Isaraela.

5 Ti fakamau ai e Iehova e kautu ke he hana lima; ne ta mai foki e Iuta oti e tau mena fakaalofa kia Iehosafata; ti ha ia ia e koloa mo e lilifu lahi.

6 Ne fakamalolo foki hana loto ke he tau puhala a Iehova; ne uta kehe foki e ia e tau mena tokoluga mo e tau tupua Asaira i Iuta.

7 Ko e tau tolu hana he eke a ia mo patuiki ne fakafano atu e ia e tau iki ha ha ia ia, ko Penehaila, mo Opetaia, mo Sakaria, mo Natanielu, mo Mikaio, ke fakaako atu ke he tau maga a Iuta.

8 Ne fakalataha mo lautolu e tau tagata Levi ko Semaia, mo Netanaia, mo Sepataio, mo Asaelu, mo Semiramotu, mo Ionatana, mo Atonia, mo Topaia, mo Topa-atonia, ko e tau tagata Levi haia; ne fakalataha foki mo lautolu e tau ekepoa ko Elisama mo Ioramo.

9 Ne fakaako atu e lautolu a Iuta, ha ha ia lautolu foki e tohi he fakatufono a Iehova, ti o takai ai a lautolu ke he tau maga oti a Iuta, mo e fakaako atu ke he motu.

10 Ha ha i ai e matakutaku ke he tau kautu oti he tau motu ne agaagai mai kia Iuta, ko e mena ia nakai tau mai ai a lautolu kia Iehosafata.

11 Ko e falu foki he tau tagata Filisitia ne ta mai kia Iehosafata e tau mena fakaalofa, mo e tau ario ke eke mo tau poa; ne ta mai foki he tau tagata Arapi e tau fuifui manu kia ia, ko e fitu e afe mo e fitu e teau e mamoe tane, ti fitu e afe mo e fitu e teau e koti tane.

12 Ne tupu lahi ni e lilifu a Iehosafata; ne ati foki e ia i Iuta e tau kolo, mo e tau maga ke tatanaki ai e tau koloa.

13 Ne eke e ia e tau gahua loga ke he tau maga a Iuta; ha ha i Ierusalema foki e tau tagata tau, ko e tau toa malolo.

14 Ko e totouaga ha lautolu hanai ke he tau magafaoa he tau matua ha lautolu; ko e tau iki he tau takiafe he tau tagata Iuta; ko Atana ko e iki ne mua a ia, ha ha ia ia tolu e teau afe tagata ko e tau toa malolo.

15 Ne mui age kia ia a Iohanana ko e iki ne mua haia, ha ha ia ia foki ua e teau afe ti valugofulu e afe tagata.

16 Ti mui age kia ia a Amasia ko e tama a Sikeri, ne tuku atu e ia a ia mo e fakamakai kia Iehova; ha ha ia ia foki ua e teau afe tagata ko e tau toa malolo.

17 Mai he magafaoa a Peniamina foki, ko Eliata, ko e toa malolo, ha ha ia ia foki ua e teau afe tagata ne toto e tau kaufana mo e tau akau punuti.

18 Ti mui age kia ia a Iehosafata, ha ha ia ia foki taha e teau afe ti valugofulu e afe tagata ko e tau tagata kua tauteute ke tau.

19 Ne fekafekau a lautolu na ke he patuiki, ka e kehe a lautolu ne kotofa he patuiki ke he tau maga nonofo taue i Iuta oti.