1 Ioane

2 HAKU fanau ikiiki na e, kua tohi atu e au e tau mena ia kia mutolu, kia nakai hala a mutolu; kaeke foki kua hala taha, ha ia tautolu a Lagomatai ki mua he Matua, ko Iesu Keriso ko e tututonu a ia.

2 Ko e lukutoto foki a ia mo e tau hala ha tautolu; ka e nakai kuenaia e tau hala ha tautolu, ka e katoa mo e lalolagi oti kana.

3 Ko e mena foki hanai kua iloa ai e tautolu, kua iloa e tautolu a ia, kaeke kua omaoma a tautolu ke he tau poaki hana.

4 Ko e tagata kua pehe age, Kua iloa e au a ia, ka e nakai omaoma a ia ke he tau poaki hana, ko e pikopiko a ia, nakai nofo foki ki loto ia ia e kupu moli.

5 Ka ko ia kua omaoma ke he hana kupu, ko e moli, kua katoatoa e fakaalofa ke he Atua ki loto ia ia. Ko e mena ia kua iloa ai e tautolu, ha i loto ia ia a tautolu.

6 Ko ia kua pehe, ha ne nofo a ia ki loto ia ia, lata ke he tagata nā ke mahani tuga ne mahani a ia.

7 Ko e tau matakainaga na e, nakai tohi atu e au kia mutolu e poaki fou, ka ko e poaki tigahau ha ha ia mutolu tali mai he kamataaga; ko e poaki tigahau, ko e kupu ia ne fanogonogo ki ai a mutolu tali mai he kamataaga.

8 Kua tohi atu foki e au kia mutolu e poaki fou; kua moli e mena ia kia ia katoa mo mutolu, ha ko e mena ha ne mole atu e pouli ti kua kikila mai ainei e maama moli.

9 Ko ia kua pehe, ha ha he maama a ia, ka e vihiatia e ia hana matakainaga, ha ha he pouli a ia, kua hoko mai ke he vaha nai.

10 Ko e tagata kua fakaalofa ke he matakainaga hana, kua nofo a ia ke he maama; nakai fai mena ia ia ke tupetupe ai.

11 Ka ko ia kua vihiatia hana matakainaga, ha ha he pouli a ia, kua fano foki a ia ke he pouli; kua nakai kitia foki e ia e mena kua fano ki ai, nukua fakapouli e tau mata hana he pouli.

12 Ko e fanau ikiiki na e, kua tohi atu e au, kia mutolu, ha kua fakamagalo e tau hala ha mutolu ha ko e higoa hana.

13 Ko e tau matua tane na e, kua tohi atu e au kia mutolu, nukua iloa e mutolu a ia ha i ai tali mai he kamataaga. Ko e tau fuata na e, kua tohi atu e au kia mutolu, nukua kautu a mutolu kia ia ne mahani kelea. Ko e fanau na e, kua tohi atu e au kia mutolu, nukua iloa e mutolu e Matua.

14 Ko e tau matua tane na e, ne tohi atu e au kia mutolu, nukua iloa e mutolu a ia ha i ai tali mai he kamataaga. Ko e tau fuata na e, ne tohi atu e au kia mutolu, nukua malolo a mutolu, kua toka mau foki e kupu he Atua ki loto ia mutolu; kua kautu foki e mutolu kia ia ne mahani kelea.

15 Aua neke fakaalofa a mutolu ke he lalolagi, po ke tau mena ha ha he lalolagi; kaeke kua fakaalofa taha ke he lalolagi, nakai nofo e fakaalofa ke he Matua ke he loto hana.

16 Ha ko e tau mena oti ha ha he lalolagi, ko e manako lahi he tino, mo e manako lahi he tau mata, katoa mo e tau mena he mouiaga nai ke hula ki ai, nakai mai he Matua ia, ka e mai he lalolagi.

17 Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.

18 Ko e fanau na e, ko e tau aho ainei ke fakihiku ai; tuga ne fanogonogo ai a mutolu, ha ne hau e anetikeriso, ha ha i ai nai e tau anetikeriso tokologa; ko e mena ia kua iloa ai e tautolu, ko e tau aho ainei ke fakahiku ai.

19 Ne o atu a lautolu ia tautolu; ka e nakai ko e tau tagata ha tautolu a lautolu, ha ko e mena kane mai ko e tau tagata ha tautolu, po kua nonofo mau a lautolu fakalataha mo tautolu; ka e o atu a lautolu kia fakakite ai, nakai ko e tau tagata ha tautolu a lautolu oti kana.

20 Ka ko mutolu, ha ia mutolu e fakaukuaga mai ia ia kua Tapu; kua iloa foki e mutolu e tau mena oti.

21 Nakai tohi atu e au kia mutolu he nakai iloa e mutolu e kupu moli; ka ko e mena kua iloa tuai e mutolu, kua nakai tupu foki ha pikopiko mai he kupu moli.

22 Ko hai kia e tagata pikopiko, ka nakai ko ia ni kua fakatikai, pehe, Ko Iesu nakai ko e Keriso a ia? ko e anetikeriso hanā, ko e tagata kua fakatikai ke he Matua, katoa mo e Tama.

23 Ko lautolu oti kua fakatikai ke he Tama, nakai moua foki e lautolu e Matua; (ko lautolu kua talahau atu e Tama, ha ia lautolu foki e Matua.)

24 Hanai, kia toka mau ia mutolu e mena ne fanogonogo ki ai a mutolu tali mai he kamataaga; kaeke ke toka mau ia mutolu e mena kua fanogonogo ki ai a mutolu tali mai he kamataaga, ti tumau ai a mutolu ke he Tama katoa mo e Matua.

25 Ko e talahau foki hanai ne talahau mai e ia kia tautolu, ko e moui tukulagi.

26 Ne tohi atu e au e tau mena ia kia mutolu kia lautolu kua fakahehe a mutolu.

27 Kua tumau foki kia mutolu e fakaukuaga ne moua e mutolu ia ia; nakai aoga foki ke fakaako atu e taha kia mutolu; ka e tuga he fakaako atu kia mutolu he fakaukuaga ia ni e tau mena oti, ko e moli foki a ia, ka e nakai pikopiko ni, tuga he fakaako atu foki kia mutolu, kia tumau a mutolu kia ia.

28 Hanai foki, ko e fanau ikiiki na e, kia tumau a mutolu kia ia, kia moua ai e tautolu e fakamalolo ka fakakite mai a ia; kia nakai ma a tautolu ki mua hana ka haele mai a ia.

29 Kaeke kua iloa e mutolu kua mahani tututonu a ia kua iloa e mutolu, ko lautolu oti kua eke e mahani tututonu kua fanau mai a lautolu e ia.