Roma

Ko e Tohi a Paulo ke he Tau Tagata Roma

1 KO au ko Paulo, ko e fekafekau a lesu Keriso, kua uiina ke eke mo aposetolo, kua kotofa ke fakamatala atu e vagahau mitaki he Atua,

2 Ko ia ne talahaua fakamua e ia ke he hana tau perofeta ke he tau Tohi tapu,

3 Ko e hana Tama ko Iesu Keriso ha tautolu a Iki, ko ia ne fanau mai ke he faoa a Tavita ke he tino,

4 Ko ia kua fakakite fakatonu mai ko e tama he Atua mo e mana ke he Agaga kua tapu, ke he liu tu mai ha lautolu kua mamate;

5 Ne moua mai e mautolu ia ia e fakaalofa noa mo e feua he aposetolo, kia tupu ai e omaoma ke he tua ke he tau motu oti kana ha ko e hana higoa;

6 Ha i ai foki a mutolu kua ui ki ai e Iesu Keriso.

7 Haku a tohi a enei kia mutolu oti ha ha i Roma, ko mutolu kua ofania he Atua, kua uiina ke eke mo tau tagata fakatapu; kia ha ha ia mutolu e fakaalofa noa mo e mafola mai he Atua ha tautolu a Matua, katoa mo e Iki ko Iesu Keriso.

8 Fakamua, kua fakaaue atu au ke he haku a Atua kia Iesu Keriso ha ko mutolu oti, ha kua talahaua e tua ha mutolu ke he lalolagi oti.

9 Ha kua fioia mai he Atua, ko ia kua fekafekau ki ai haku agaga ke he tala mitaki he hana Tama, kua totoku e au a mutolu nakai noa ke he haku a tau liogi,

10 Kua ole mau atu au po ke moua vave nakai e au e monuina ke he finagalo he Atua, kia fina atu ai au kia mutolu;

11 Ha kua manako lahi au ke feleveia mo mutolu, kia ta atu ai e au kia mutolu taha mena fakaalofa ke lata mo e Agaga ke fakatumau ai a mutolu;

12 Ko e kakano hanai, kia fefakamafanaaki a tautolu ke he tua ha tautolu, ko mutolu katoa mo au.

13 Ko e tau matakainaga na e, kua loto au ke iloa e mutolu kua lagaloga he manatu au ke fina atu kia mutolu, (ka e lekua ni, kua hoko mai ke he aho nai,) kia moua ai e au ha fua kia mutolu, tuga he falu a motu.

14 Ha ha ia au e tau mena he tau tagata Heleni katoa mo e tau tagata kehe, ko e tau iloilo katoa mo e tau goagoa;

15 Ko e mena ia kua amaamanaki ai au, kia fakamatala atu au e tala mitaki kia mutolu foki ha i Roma.

16 Ha kua nakai ma au ke he tala mitaki; ha ko e mana he Atua ia ke momoui ai a lautolu oti kana kua tua, kua fakamua e tau tagata Iutaia, katoa mo e tau tagata Heleni.

17 Ha kua fakakite mai ai e tututonu he Atua ke he tua kia lautolu kua tua, tuga ne tohi mai, To moui e tagata tututonu ke he tua.

18 Kua fakakite mai foki e ita he Atua mai he lagi ke he tau mahani matahavala, mo e tau mahani hepehepe oti kana he tau tagata, ko lautolu haia kua taofi e kupu moli he mahani hepehepe.

19 Ha kua fakakite mai kia lautolu e maama ke he tau mena he Atua; nukua fakakite mai ai he Atua kia lautolu;

20 Ha ko e hana tau mena kua nakai kitia, tali mai he vaha ne eke e lalolagi, kua kitia ia he manamanatu e tau mena ne eke, ko e hana mana haia kua tukulagi, mo e hana Atua; ko e mena foki ia kua nakai fai kupu a lautolu ke tali atu ai.

21 Ha kua iloa e lautolu e Atua, ka e nakai fakaheke e lautolu kia ia mo e fakaaue kua lata mo e Atua; ka e fakagoagoa a lautolu ke he tau mahalohaloaga ha lautolu, ti fakapouligia ha lautolu a tau loto goagoa;

22 Kua talahau e lautolu kua iloilo a lautolu, ka kua goagoa a lautolu,

23 Kua fehikitaki foki e lautolu e lilifu he Atua moui tukulagi mo e fakatai he tino he tagata ke fakahiku ke he popo, mo e tau manu lele, mo e tau manu huifa, mo e tau mena totolo.

24 Ko e mena foki ia ne tuku atu ai he Atua a lautolu ke he mahani kelea, ke he tau manako lahi he tau loto ha lautolu, kua fefakakeleaaki e lautolu ha lautolu a tau tino;

25 Kua fehikitaki e lautolu e kupu moli ke he Atua mo e kupu pikopiko, kua fakalilifu foki mo e fekafekau a lautolu ke he tau mena kua eke, ka kua toka a ia ne eke, ko ia ke fakaheke ki ai tukulagi. Amene.

26 Ko e mena ia ne tuku atu ai he Atua a lautolu ke he tau manako lahi kua ma ai; ha ko e tau fifine ha lautolu kua fehikitaki e lautolu e mahani kua lata, mo e mahani kua nakai lata;

27 Pihia foki mo e tau tane, kua tiaki e lautolu e mahani ke he tau fifine kua lata, ka kua vela ke he femanakoaki kelea ha lautolu, kua feekeaki e tau tane e mena ke ma ai; kua moua foki e lautolu e taui ke he tau tino ha lautolu kua lata mo e hehe ha lautolu.

28 Kua tiaki foki e lautolu e maama ke he Atua, ti kua tuku atu ai he Atua a lautolu ke he loto kua tiaki ke eke e lautolu e tau mena kua nakai lata;

29 Kua puke a lautolu ke he tau mahani hepehepe oti kana, ko e feuaki, ko e matahavala, ko e velevelemena, ko e loto kelea; kua puke namo ke he mahekeheke, mo e keli tagata, mo e taufetoko, mo e fakavai, mo e loto kona.

30 Ko e tau tagata fefanafanāki a lautolu, kua tauamuamu, kua fakalialia he Atua, kua hemu, kua fakatokoluga, kua hula, kua eke e tau lagatau ke he tau mena kelea, kua faliuliu ke he tau matua,

31 Nakai fai loto matala, kua fakavai, nakai fai fakaalofa, nakai fia loto mafola, mo e nakai fakaalofa atu;

32 Ko lautolu haia kua iloa e fakatonuaga he Atua, kua lata he mamate a lautolu kua eke e tau mena pehenā, ka e nakai kuenaia he eke e lautolu e tau mena ia, ka kua fiafia foki a lautolu kia lautolu kua eke ai.