1 Korinito

6 KAEKE kua taufetoko taha ia mutolu mo e taha ke he taha mena, kua fakamalolo kia a mutolu ke uta ki mua he tau tagata mahani hepehepe ke fakafili ai, ka e nakai kia uta ki mua he tau tagata fakatapu?

2 Kua nakai kia iloa e mutolu to fakafili e lalolagi he tau tagata fakatapu? Kaeke foki ke fakafili e mutolu e lalolagi, nakai kia lata a mutolu ke eke mo tau fakafili ke he tau mena ikiiki ni?

3 Kua nakai kia iloa e mutolu to fakafili e tautolu e tau agelu? Ka e nakai kia fakafili e tau mena he mouiaga nei he ha?

4 Hanai, kaeke ha ia mutolu e tau fakafiliaga he tau mena he mouiaga nai, kia kotofa a lautolu kua talahaua fakateaga ke he ekelesia kia fakafili a lautolu ki ai.

5 Kua pihia atu au kia mutolu kia ma ai a mutolu. Ko e moli kia? Nakai kia ha ha ia mutolu ha tagata tokotaha kua iloilo, kua maeke ia ia ke fakafili e tau mena he matakainaga hana?

6 Ka kua taufetoko e matakainaga, mo e hana matakainaga, kua eke foki e mena ia ki mua he tau tagata nakai tua.

7 Hanai, ha ha ia mutolu e hehe ni, ha kua eke e mutolu e taufetoko ko e taha ke he taha. Ka e nakai kia fakauka he ha a mutolu ke he mahani kelea? Ka e nakai kia fakauka he ha ke he fofoaga he tau mena ha mutolu?

8 Ka kua mahani kelea a mutolu mo e fofo mena, kua pihia foki ke he tau matakainaga.

9 Nakai kia iloa e mutolu nakai moua e lautolu kua mahani hepehepe e kautu he Atua? Aua neke fakahehe ai a mutolu; ko e tau tagata feuaki, mo lautolu kua hufeilo ke he tau tupua, mo lautolu kua faivao, mo lautolu kua fakakelea e lautolu a lautolu, mo lautolu kua eke e mahani Sotoma,

10 Mo lautolu kua kaiha, mo lautolu kua velevelemena, mo lautolu kua konahia, mo lautolu kua tauamuamu, mo lautolu kua fofo mena, nakai moua e lautolu nā e kautu he Atua.

11 Ne pihia foki e falu ia mutolu, ka kua koukou tuai a mutolu, ka kua fakatapu tuai a mutolu, ka kua talahaua tututonu a mutolu ke he higoa he Iki ko Iesu, ke he Agaga foki he Atua ha tautolu.

12 Kua pule e au ke he tau mena oti ke eke e au, ka e nakai aoga e tau mena oti, kua pule e au ke he tau mena oti ke eke e au, ka ko au nakai mahala au ke he pule taha.

13 Kua lata e tau mena kai mo e manava, kua lata foki e manava ke he tau mena kai; ka e fakaotioti he Atua ia, katoa mo e tau mena na. Ka e nakai lata e tino ke he feuaki, ka kua lata ke he Iki; kua lata foki e Iki ke he tino,

14 Ka kua liu fakatu foki he Atua e Iki, to fakatu foki e ia a tautolu he hana malolo.

15 Kua nakai kia iloa e mutolu ko e tau tino ha mutolu ko e tau fahi tino ia a Keriso? Haia ni, to uta kehe kia e au e tau fahi tino a Keriso ti eke mo tino he fifine fakataka? Aua ia.

16 Kua nakai kia iloa e mutolu, ko ia kua fakalataha mo e fifine fakataka, ko e tino taha a laua mo ia? Ha ko e mena kua pehe mai, To eke a laua mo tino taha.

17 Ka ko ia kua fakalataha mo e Iki, ko e agaga taha haia.

18 Kia fehola kehe a mutolu he feuaki. Kua noa e tino mo e tau hala oti kua eke he tau tagata; ka ko ia kua feuaki, kua hala tuai a ia ke he hana tino ni.

19 Kua nakai kia iloa e mutolu ko e tau tino ha mutolu ko e faituga haia he Agaga Tapu, ti ha i loto ia mutolu, ko ia kua moua e mutolu mai he Atua, ti nakai pule a mutolu kia mutolu?

20 Ha ko e mena kua fakafua a mutolu ke he totogi; ko e mena ia kia fakaheke atu ai a mutolu ke he Atua ke he tau tino ha mutolu, mo e tau agaga ha mutolu, ko e tau mena he Atua haia.