Tau Salamo

97 KO e patuiki a Iehova, kia fiafia a e lalolagi; kia fiafia e tau motu loga kua takai he tahi.

2 Kua agaagai a ia he tau aolagi mo e pouli, ko e tututonu mo e fakafiliaga kua mau ai hana nofoaiki.

3 Kua mua atu ki mua hana e afi, kua huhunu takai ai a lautolu kua fai fi kia ia.

4 Kua maamatia e lalolagi he hana tau uhila; kua kitia he lalolagi, ti vivivivi ai.

5 Kua faliu puke vai e tau mouga tuga e pili, ki mua a Iehova ki mua he Iki he lalolagi oti.

6 Kua fakakite e lagi hana tututonu, kua kitia foki he tau motu oti hana lilifu.

7 Kia mā e tau fekafekau oti he tau tupua kua ta, katoa mo lautolu kua fiafia ke he tau tupua; ko mutolu oti ko e tau atua na e, kia hufeilo a mutolu kia ia.

8 Kua fanogonogo a Siona, ti fiafia ni; Iehova na e, kua fiafia e tau tama fifine a Iuta ha ko e hāu a tau fakafiliaga.

9 Ha ko koe, Iehova na e, kua homo ni a koe he lalolagi oti; kua homo atu fakalahi a koe ke he tau atua oti kana.

10 Ko mutolu kua fakaalofa atu kia Iehova, kia fakavihia e mutolu e tau mena kelea; kua leoleo e ia e tau agaga he hana tau tagata tapu, kua laveaki e ia a lautolu mai he tau lima he tau tagata mahani kelea.

11 Kua gana e maama mo e tagata tututonu, kua gana foki e fiafia mo lautolu kua loto fakamoli.

12 Ko mutolu ne tututonu kia fiafia a mutolu kia Iehova; kia fakaheke a mutolu ka manatu hana mahani tapu.