Tau Salamo

146 HALELUIA. Haku agaga na e, kia fakaheke atu kia Iehova.

2 To fakaheke atu au kia Iehova ka kua moui au; to uhu lologo au ke he haku Atua ka kua moui agaia au.

3 Aua neke tua a mutolu ke he tau iki, po ke fanau he tau tagata, nakai ha i ai ha fakamouiaga.

4 Kua fina atu hana agaga, kua liu a ia ke he kelekele ne eke aki a ia, ko e aho ia ni kua mate ai hana tau manatu.

5 Uhoaki e tagata ha i ai e Atua a Iakopo mo lagomatai hana; ko e hana amaamanaki ha i ai ia kia Iehova ko e hana Atua;

6 Ko ia ne eke e lagi katoa mo e lalolagi, ko e tahi mo e tau mena oti ha i ai; ko ia ne toka ki ai e fakamoli tukulagi.

7 Ko ia ne eke e fakafiliaga ma lautolu kua pehia he favale; ko ia ne āge e tau mena kai kia lautolu kua hoge; kua vevete e Iehova a lautolu ne lili.

8 Ko Iehova ne fakamaama ai e tau mata he tau matapouli; ko Iehova ne fakatu hako a lautolu ne fakatolotolo; ko Iehova ne fakaalofa ke he tau tagata tututonu.

9 Ko Iehova ne leoleo e tau tagata kehe; kua lagaaki e ia e tagata nakai fai matua katoa mo e fifine takape, ka ko e puhala he tau tagata mahani kelea to fakakeukeu ai e ia.

10 To pule a Iehova tukulagi ni; Siona na e, to pule hāu a Atua ke hahau mo hahau. Haleluia.