Fakakiteaga

10 NE kitia foki e au e taha agelu malolo kua hifo mai he lagi, kua tapulu ke he aolagi, ha he fufuga foki hana e tagaloa, ko e fofoga foki hana tuga ne la ia, ko e hana na ve foki tuga ne tau afi tupou;

2 Ha ha he lima foki hana e tohi tote kua fofola, kua tu foki hana ve matau ke he tahi, mo e hana ve hema ke he fonua.

3 Kua ui foki a ia mo e leo lahi, tuga ne leona kua tagi; kua ui a ia, ti vagahau mai ai e tau pakulagi ne fitu ke he tau leo ha lautolu;

4 Kua vagahau mai e tau pakulagi ne fitu ke he tau leo ha lautolu, ti eke na au ke tohi; ti logona ai e au e leo mai he lagi, kua pehe mai kia au, kia fakamau fakamailoga e koe e tau mena kua vagahau mai e tau pakulagi ne fitu, ka e aua neke tohi e tau mena ia.

5 Ko e agelu foki ne kitia e au kua tu ke he tahi mo e fonua, kua nikiti hake e ia hana lima ke he lagi,

6 Mo e omonuo a ia kia ia kua moui tukulagi tukumuitea, ko ia ne eke e lagi mo e tau mena ha ha i ai, mo e lalolagi mo e tau mena ha ha i ai, mo e tahi mo e tau mena ha ha i ai, ke nakai tuai fai aho;

7 Ka e hoko ni ke he tau aho he leo he agelu ne tokofitu aki, ka fakatagi la e ia e pu, ti fakahiku ai e mena galo he Atua, tuga ne talahau mai e ia ke he hana tau fekafekau ko e tau perofeta.

8 Ko e leo foki ne logona e au mai he lagi, kua liu foki vagahau mai kia au, kua pehe mai, Ati fano a, kia toto a e koe e tohi tote kua fofola, ha he lima he agelu kua tu ke he tahi mo e fonua.

9 Ti fano ai au ke he agelu, mo e tala age kia ia, Ati ta mai ā e tohi tote kia au. Ti tala mai ai a ia kia au, Kia toto a, mo e kai; to kona foki ke he manava hau, ka e humelie ke he gutu hau, tuga ne meli,

10 Ti toto ai e au e tohi tote mai he lima he agelu, mo e kai ai; ti humelie ni ke he gutu haku, tuga ne meli; kua oti he kai ai e au, ti kona ni ke he manava haku.

11 Ti pehe mai ai a ia kia au, Ko e mena lata ni ke liu foki perofeta a koe ke he tau tagata, mo e tau motu kehe, mo e tau vagahau kehekehe, mo e tau patuiki tokologa.