Tau Fakafili

Ko e Tohi ke he Tau Fakafili

1 KUA mole e mate a Iosua, ti huhu ai he fanau a Isaraela kia Iehova, kua pehe atu, Ko hai kia ke mumua hake mo mautolu ke he tau tagata Kanana, ke tau kia lautolu.

2 Ti pehe mai a Iehova, Kia hake a Iuta, kitiala, kua tuku atu e au e motu ke he hana lima.

3 Ti pehe age a Iuta kia Simeona hana matakainaga, Kia o hake a taua mo au ke he haku a tufaaga, ke tau a tautolu mo e tau tagata Kanana; to fano foki au mo koe ke he tufaaga hau. Ti o ai a laua mo Simeona.

4 Kua hake a Iuta, ti tuku atu ai e Iehova e tau tagata Kanana, mo e tau tagata Perisi ke he tau lima ha lautolu; ti keli ai e lautolu i Peseka hogofulu e afe tagata.

5 Ne moua foki e lautolu a Atonipeseka; ti tau ai a lautolu mo ia; ti keli ai e lautolu e tau tagata Kanana mo e tau tagata Perisi.

6 Ka e hola a Atonipeseka ti tutuli e lautolu a ia, kua moua e lautolu a ia, ti hio kehe e lautolu hana tau matalima motua, mo e hana tau matahui motua.

7 Ti pehe age a Atonipeseka, Ko e tokofitugofulu e patuiki ne hio kehe ai ha lautolu a tau matalima motua, mo e ha lautolu a tau matahui motua, ne okooko valavalamena ki lalo he laulau kai haku; tuga ne eke e au, kua taui mai pihia ni he Atua kia au. Ti uta e lautolu a ia ki Ierusalema, ti mate ai a ia ke he mena ia.

8 Kua tau e fanau a Iuta ki Ierusalema, mo e fofo ai e lautolu, ti keli ai e lautolu e tau tagata ke he pelu, mo e huhunu e lautolu e maga ke he afi.

9 Kua mole ia ti o hifo ai e fanau a Iuta mo e tau tagata Kanana, ne nonofo ke he atu mouga, mo e fahi toga, mo e vaha mouga.

10 Ti fina age a Iuta ke tau mo e tau tagata Kanana ne nonofo i Heperona; (ko Kiriataarapa ko e higoa fakamua ia a Heperona;) ne keli ai foki e lautolu a Sesai, mo Aimano, mo Talemai.

11 Ti o a lautolu he mena ia ke tau mo e tau tagata ne nonofo i Tiperi, (ko e higoa fakamua foki a Tiperi, ko Kiriata-saperu haia).

12 Ti pehe a Kalepa, Ko e tagata ka keli a Kiriata-saperu, mo e fofo e ia e maga, to age e au kia ia haku a tama fifine ko Akesa ke eke mo hoana hana.

13 Ti fofo ai e Otinielu ko e tama tane a Kenasa ko e tehina a Kalepa a ia; ti age e ia kia ia hana tama fifine ko Akesa ke eke mo hoana hana.

14 Kua fina atu a ia kia ia, ti fakalagalaga e ia a ia ke ole e ia e fonua mai he matua tane hana, kua hifo a ia he asini, ti pehe age a Kalepa kia ia, Ko e heigoa kia hau ne fia eke?

15 Ti pehe age a ia kia ia, Kia fakaalofa mai a koe kia au; kua ta mai e koe kia au e fonua ke he fahi toga, ti ta mai foki e koe mo e tau vaipuna. Ti age e ia kia ia e tau vaipuna i luga, mo e tau vaipuna i lalo.

16 Ko e fanau he tagata Keni, ko e matua fugavai a Mose a ia, ne o hake a lautolu mai he maga he tau akau ko e tau pama fakalataha mo e fanau a Iuta, ke he tutakale a Iuta, ha he fahi toga a Arata, ti o a lautolu mo e nonofo fakalataha mo e motu.

17 Ti o ai a Iuta mo e hana matakainaga ko Simeona, ti keli ai e lautolu e tau tagata Kanana ne nonofo i Sifata, ti fakaoti ai e lautolu a ia, ti ui ai e lautolu e higoa he maga ko Horema.

18 Ti fofo foki e Iuta a Kasa mo e hana tau fonua, mo Asikelona mo e hana tau fonua, mo Ekerona mo e hana tau fonua.

19 Ne ha i ai a Iehova mo Iuta; ti vega ai e ia e tau tagata ne nonofo ke he mouga, ka a nakai maeke ke vega e ia e tau tagata ne nonofo ke he pahua ha kua fai kariota lapatoa a lautolu.

20 Ti tuku atu e lautolu a Heperona kia Kalepa, tuga ne poaki mai ai e Mose; ti vega e ia he mena ia e tau tama tane tokotolu a Anaki.

21 Ka ko e tau tagata Iepusi, ne nonofo i Ierusalema; nakai vega he fanau a Peniamina a lautolu, ka e nonofo fakalataha i Ierusalema e tau tagata Iepusi mo e fanau a Peniamina kua hoko mai ke he aho nai.

22 Ne o hake foki e magafaoa a Iosefa ki Peteli; ha ha i ai foki a Iehova mo lautolu.

23 Ti fakafano atu he magafaoa a Iosefa e falu ke toko atu ki Peteli; (ko e higoa fakamua he maga na ko Lusa).

24 Ti kitia he tau tagata toko e tagata ne hau ai he maga, ti pehe age a lautolu kia ia, Kia fakakite mai e koe kia mautolu e hala ke he maga to fakaalofa atu a mautolu kia koe.

25 Ti fakakite atu e ia kia lautolu e hala ke o atu ai ke he maga, ti keli ai e lautolu e maga ke he pelu; ka e toka e lautolu e tagata mo e hana magafaoa oti ke o.

26 Ti fina age e tagata ke he motu he tau tagata Heti, ti ati ai e ia e maga, mo e fakahigoa aki a ia ko Lusa; ko e hana higoa haia kua hoko mai ke he aho nai.

27 Nakai moua foki e Manase a Petesana katoa mo e hana tau maga, mo Tanaka katoa mo e hana tau maga, mo lautolu ne nonofo i Toro katoa mo e hana tau maga, mo lautolu ne nonofo i Ipelamo katoa mo e tau maga ha lautolu, ko lautolu foki ne nonofo i Mekito katoa mo e ha lautolu a tau maga; ka e nonofo matauka ai e tau tagata Kanana ke he tau maga ia.

28 Ka kua malolo a Isaraela, ti kotofa atu e lautolu e totogi ke ta mai ai he tau tagata Kanana kia lautolu, ka e nakai vega fakaoti e lautolu a lautolu.

29 Ti nakai vega foki e Efaraimo e tau tagata Kanana ne nonofo i Kasera; ka e nonofo e tau tagata Kanana fakalataha mo lautolu i Kasera.

30 Nakai vega foki e Sepulona a lautolu ne nonofo i Kiterona, ko lautolu foki ne nonofo i Nahalolo; ka e nonofo e tau tagata Kanana fakalataha mo lautolu, mo e ta mai ai e lautolu e totogi kia lautolu.

31 Ti nakai vega e Asera a lautolu ne nonofo i Ako, mo lautolu foki ne nonofo i Saitonu, mo lautolu i Ahelava, mo lautolu i Akesipa, mo lautolu i Helipa, mo lautolu i Afeka, mo lautolu i Rehopo.

32 Ka e nonofo fakalataha ai e tau tagata Asera mo e tau tagata Kanana ne nonofo ke he motu; ha kua nakai vega e lautolu a lautolu.

33 Ti nakai vega e Nafatali a lautolu ne nonofo i Petesemesa, mo lautolu ne nonofo i Peteanata; ka e nonofo fakalataha a lautolu mo e tau tagata Kanana ne nonofo ke he motu; ka e ta mai ai e lautolu ne nonofo i Petesemesa mo Peteanata e totogi kia lautolu.

34 Ne totoko atu he tau tagata Amori ke he fanau a Tano ke nonofo a lautolu ke he mouga; he nakai toka e lautolu a lautolu ke nonofo ke he pahua.

35 Ka e nonofo matauka ai e tau tagata Amori ke he mouga ko Heresa i Ailona mo Salapima; ka e lima malolo e magafaoa a Iosefa, ti ta mai ai e lautolu e totogi kia lautolu.

36 Ko e katofia foki he tau tagata Amori, ne hoko ke he matiketike ne hake ai ki Akarava i Sila, mo e hana fahi atu ki luga.