Iosua

10 KUA logona e Atoniseteka ko e patuiki a Ierusalema kua eke tuai e Iosua a Ai, mo e fakaoti ai e ia a ia; tuga ne eke e ia ki Ieriko mo e hana patuiki kua eke ni pihia e ia ki Ai mo e hana patuiki; kua fakafeilo foki a lautolu ne nonofo i Kipeona mo Isaraela; ti fakalataha ai a lautolu mo lautolu;

2 Ti matakutaku lahi ai a lautolu, ha ko e maga lahi ni a Kipeona, po ke maga he patuiki; ne homo atu foki e lahi e maga na ia Ai; ko e hana tau tagata oti foki ko e tau tagata malolo a lautolu.

3 Ti fakafano atu e Atoniseteka ko e patuiki a Ierusalema kia Oama ko e patuiki a Heperona, mo Pirama ko e patuiki a Iaremuta, mo Iafia ko e patuiki a Lakisa, mo Tiperi ko e patuiki a Ekelona, kua pehe atu,

4 Kia o mai a mutolu kia au mo e lagomatai mai a mutolu kia au ke keli a Kipeona; ha kua fakafeilo tuai a lautolu mo Iosua katoa mo e fanau a Isaraela.

5 Ti fakapotopoto ai e tau patuiki ne tokolima he tau tagata Amori, ko e patuiki a Ierusalema, ko e patuiki a Heperona, ko e patuiki a Iaremuta, ko e patuiki a Lakisa, ko e patuiki a Ekelona, ti o hake a lautolu, mo e ha lautolu a tau kau oti, ti heapi ai a lautolu ki mua a Kipeona, mo e tau a lautolu kia ia.

6 Ti fakafano atu he tau tagata Kipeona kia Iosua ke he heagaapi i Kilikala, kua pehe atu, Aua neke tiaki e koe hau a tau fekafekau; kia alumaki mai a mutolu kia mautolu, mo e laveaki a mautolu, mo e lagomatai mai kia mautolu; ha kua fakapotopoto mai ke tau kia mautolu e tau patuiki oti he tau tagata Amori, ko lautolu kua nonofo ke he atu mouga.

7 Ti hake ai a Iosua i Kilikala, ko ia mo e tau tagata tau oti fakalataha mo ia, katoa mo e tau toa malolo oti.

8 Ti pehe mai ai a Iehova kia Iosua, Ua matakutaku a koe kia lautolu, ha kua tuku atu e au a lautolu ke he hau a lima; nakai fakai he tagata ia lautolu ke tu atu ki mua hau.

9 Kua hoko fakalutukia atu a Iosua kia lautolu, ne katoa e po he o hake ai a lautolu i Kilikala.

10 Ti tutuli ai e Iehova a lautolu ki mua a Isaraela, ti kelipopo ai a lautolu he keliaga lahi i Kipeona; ne tutuli atu e lautolu a lautolu ke he puhala ne o hake ai ki Peteorana; ti kelipopo ai e lautolu a lautolu ke hoko atu ki Aseka mo Maketa.

11 Kua fehola a lautolu ki mua a Isaraela, ha ne o hifo a lautolu ki Peteorana, ti liti hifo ai e Iehova e tau maka lalahi mai he lagi ki luga ha lautolu ko hoko ki Aseka, ti mamate ai a lautolu; ne mua he tokologa a lautolu ne mamate he uha tuli kia lautolu ne keli he fanau a Isaraela ke he pelu.

12 Ti vagahau atu ai e Iosua kia Iehova ke he aho ne tuku mai ai e Iehova e tau tagata Amori ki mua he fanau a Isaraela, kua pehe atu a ia ki mua a Isaraela, Ko e la na e, kia tu mau a koe ki luga a Kipeona; mo koe ko e mahina na e, ki luga he pahua a Ailona.

13 Ti tu ai e la, ti tu foki e mahina, ato taui atu he motu kia lautolu ne fai fi kia lautolu. Nakai kia tohi e tala nai ke he tohi a Iasera? Kua tu ai e la ke he vaha loto he lagi, nakai to vave a ia, tokai ko e aho katoa ne tu ai,

14 Nakai fai aho fakamua foki po ke fakamui ke tuga ne aho ia, ne fanogonogo ai e Iehova ke he leo he tagata; ha kua kau ni a Iehova mo Isaraela.

15 Ti liu ai a Iosua mo Isaraela oti fakalataha mo ia ke he heaga api i Kilikala.

16 Ka e fehola e tau patuiki ia ne tokolima, mo e fakamumuli ai a lautolu ke he ana i Maketa,

17 Ne tala age ai kia Iosua kua pehe age, Kua moua tuai e tau patuiki ne tokolima, ha ne fakamumuli ai a lautolu ke he ana i Maketa.

18 Ti pehe age a Iosua kia lautolu, Kia fuluhi atu a e mutolu e tau maka lalahi ke he gutu ana, mo e kotofa ai e tau tagata ke leoleo kia lautolu.

19 Ka ko mutolu, aua neke nonofo a mutolu, ka kia tutuli atu e mutolu a lautolu kua fai fi kia mutolu, mo e keli e mutolu ha lautolu a tau tagata ne mumui, aua neke toka e mutolu a lautolu ke huhu atu ke he tau maga ha lautolu, ha kua tuku mai e Iehova ha mutolu a Atua a lautolu ke he lima ha mutolu.

20 Kua oti he keli ai e Iosua mo e fanau a Isaraela a lautolu he keliaga lahi, kua fakaoti a lautolu; ka ko lautolu ne hao ne huhu atu a lautolu ke he tau maga mo e nonofo ai ke he tau taue.

21 Ti liu mai ai e motu oti mo e monuina kia Iosua ke he heaga api i Maketa, nakai gahuahua he taha hana alelo ke he taha tagata he fanau a Isaraela.

22 Ti pehe age a Iosua kia lautolu, Kia hafagi e mutolu e gutu ana, mo e ta mai ai e mutolu he ana e tau patuiki ia ne tokolima.

23 Ti eke ai pihia e lautolu, ne ta mai ai e lautolu he ana e tau patuiki nai ne tokolima, ko e patuiki a Ierusalema, ko e patuiki a Heperona, ko e patuiki a Iaremuta, ko e patuiki a Lakisa, ko e patuiki a Ekelona.

24 Kua ta mai e lautolu e tau patuiki ia kia Iosua, ti ui age a Iosua ke he tau tagata oti i Isaraela, kua pehe age a ia ke he tau takitaki kau ne o fakalataha mo ia, Kia fakatata mai a mutolu mo e taholi ke he tau hui ha mutolu e tau ua he tau patuiki nai. Ti fakatata atu a lautolu mo e taholi ai ha lautolu a tau ua ke he tau hui ha lautolu.

25 Ti pehe age a Iosua kia lautolu, Ua matakutaku a mutolu, ti aua neke fakaatukehe, kia fakamalolo a mutolu mo e fakamanavalahi, ha ko e mena to eke pihia ni e Iehova kia lautolu oti kua fai fi kia mutolu, ka tau a mutolu kia lautolu.

26 Kua mole atu ia ti ta e Iosua a lautolu, mo e kelipopo a lautolu, ti tautau ai a lautolu ke he tau akau ne lima; ti tautau ai a lautolu ke he tau akau kua hoko ke he afiafi.

27 Kua hoko ke he magaaho ne to ai e la, ti poaki age e Iosua kia lautolu, kia ta hifo a lautolu he tau akau, mo e liti a lautolu ke he ana ne fakamumuli ai a lautolu; ti tuku ai e lautolu e tau maka lalahi ke he gutu he ana, kua hoko ni ke he aho nai.

28 Ko e aho ia ni ne moua ai e Iosua a Maketa, mo e keli ai ke he pelu, ne fakaoti foki e ia hana patuiki, ko lautolu, mo e tau tagata oti ha ha i ai, nakai toka ai e ia taha; ne eke foki e ia ke he patuiki a Maketa tuga ne eke e ia ke he patuiki a Ieriko.

29 Ti o age a Iosua mo Isaraela oti fakalataha mo ia i Maketa ki Lipena; ti tau ai a lautolu mo Lipena.

30 Ti tuku mai foki e Iehova e maga ia mo e hana patuiki ke he lima a Isaraela; ti keli ai e ia ke he pelu, mo e tau tagata oti ha ha i ai; nakai toka ai e ia taha; ne eke foki e ia ke he hana patuiki tuga ne eke ai e ia ke he patuiki Ieriko.

31 Ti o ai a Iosua mo Isaraela oti fakalataha mo ia i Lipena ki Lakisa, mo e heapi ai ki mua hana, mo e tau a lautolu ki ai.

32 Ti tuku mai foki e Iehova a Lakisa ke he lima a Isaraela, ne moua ai e lautolu a ia ke he aho ua, ti keli ai ke he pelu, mo e tau tagata oti ha ha i ai, tuga ne tau mena oti ne eke e ia ki Lipena.

33 Ti hake ai e patuiki a Kasera ko Horama ke lagomatai kia Lakisa; ti keli ai e Iosua a ia mo e hana motu, nakai toka ai e ia taha maana.

34 Ti o age a Iosua mo Isaraela oti fakalataha mo ia i Lakisa ki Ekelona, mo e heapi ki mua hana, mo e tau a lautolu ki ai.

35 Ti eke ai e lautolu e maga ke he aho ai, mo e keli e lautolu a ia ke he pelu, ti fakaoti ai e ia ke he aho ia e tau tagata oti ha ha i ai, tuga ne tau mena oti ne eke ai e ia i Lakisa.

36 Ti hake ai a Iosua mo Isaraela oti fakalataha mo ia i Ekelona ki Heperona, mo e tau ki ai.

37 Kua eke ai a ia ma lautolu, ti keli e lautolu a ia ke he pelu, mo e hana patuiki, mo e hana tau maga oti, mo e tau tagata oti ha ha i ai; nakai toka ai e ia taha, tuga ne tau mena oti ne eke e ia ki Ekelona, kua fakaotioti e ia a ia, katoa mo e tau tagata oti ha ha i ai.

38 Ti liliu mai ai a Iosua mo Isaraela oti fakalataha mo ia ki Tiperi, mo e tau ki ai.

39 Ti eke ai e ia e maga ia, mo e hana patuiki, mo e hana tau maga oti; kua keli e lautolu a lautolu ke he pelu mo e fakaoti ai e tau tagata oti ha ha i ai, nakai toka ai e ia taha; tuga ne eke e ia ki Heperona, ti eke ai pihia e ia ki Tiperi mo e ha lautolu a patuiki; ti eke pihia foki e ia ki Lipena mo e ha lautolu a patuiki.

40 Ne keli e Iosua e tau motu oti ke he atu mouga, mo e fahi ki toga, mo e motu ke he vaha mouga, mo e kelekele tatai, mo e tau patuiki oti ha lautolu; nakai toka ai e ia taha; ka e fakaoti ai e ia e tau mena momoui oti kana, tuga ne poaki mai ai e Iehova ko e Atua a Isaraela.

41 Ne keli e Iosua a lautolu ke kamata mai i Katesapanea ke hoko atu ki Kasa, mo e motu oti ko Kosena ke hoko atu ki Kipeona.

42 Ko e tau patuiki oti na mo e kelekele ha lautolu ne moua ai e Iosua ke he tau taha; ha ko Iehova ko e Atua a Isaraela ne kau a ia mo Isaraela.

43 Ti liu mai ai a Iosua mo Isaraela oti fakalataha mo ia ke he heagaapi i Kilikala.