1 Nofoaga he Tau Patuiki
5 KO e tau tama tane a Reupena ko e tama uluaki a Isaraela, ha ko e tama uluaki ni a ia; ka e fakakelea e ia e moheaga he hana matua tane ti ta age ai hana tufaaga he uluaki ke he tau tama tane a Iosefa ko e tama a Isaraela; nakai tohi foki e matohiaga ke lata mo e tufaaga he uluaki.
2 Kua malolo a Iuta ti mua a ia ke he hana tau matakainaga, ne tupu mai ia ia foki e iki; ka ko e tufaaga he uluaki a Iosefa haia.
3 Ko e tau tama tane a Reupena ko e tama uluaki a Isaraela; ko Hanoka, mo Falū, mo Hesarona, mo Karame.
4 Ko e tau tama a Ioelu; ko Semaia hana tama, ko Koku hana tama, ko Semi hana tama,
5 Ko Mika hana tama, ko Reaia hana tama, ko Paala hana tama,
6 Ko Peira hana tama, ko ia ne fakapaea atu he patuiki a Asuria ko Tikelata-pilesa. Ko e iki ni a ia he tau tagata Reupena.
7 Ko e hana tau matakainaga foki ne totou e tau tohi he matohiaga ha lautolu, ke lata mo e tau magafaoa ha lautolu, ko e iki ne mua ko Ieielu, mo Sakaria,
8 Ko Pila ko e tama a Asasa, ko e tama a ia a Sema, ko e Tama a ia a Ioelu, ne nofo a ia i Aroeru ke hoko atu ki Nepo mo Paalameona.
9 Ne nofo ai a ia ke he faahi uta ke hoko ke he puhala ne fina atu ai ke he tutakale ne kamata mai he vailele ko Eufirate; ha kua tupu loga ai ha lautolu a tau fuifui manu ke he motu ko Kiliata.
10 Ne tau a lautolu mo e tau tagata Hakara ke he vaha ia Saulo, mo e keli e lautolu a lautolu; ti nonofo ai a lautolu ke he tau fale ie ha lautolu ke he kelekele oti ke he faahi uta a Kiliata.
11 Ko e fanau a Kato ne nonofo fakafehagai a lautolu mo lautolu ke he motu ko Vasana ke hoko atu ki Saleka.
12 Ko Ioelu ko e iki ne mua a ia, mo Safania ne ua aki a ia, mo Iaanai, mo Safata ne nofo i Vasana.
13 Ko e tau matakainaga ha lautolu foki he tau magafaoa he tau matua tane ha lautolu, ko Mekaeli, mo Mesulama, mo Sipa, mo Iorai, mo Iakana, mo Sia, mo Eperu, ko e tokofitu haia.
14 Ko e tau tama tane hanai a Aviaila, ko e tama a Huri, ko e tama a Iaroa a ia, ko e tama a ia a Kiliata, ko e tama a ia a Mekaeli, ko e tama a ia a Iesisai, ko e tama a ia a Iato, ko e tama a ia a Pusa;
15 Ko Aki ko e tama a Apitielu, ko e tama a ia a Guni, ko e iki a ia he tau magafaoa he tau matua tane ha lautolu.
16 Ne nonofo a lautolu i Kiliata i Vasana, mo e hana tau maga, mo e vao oti a Sarona ke he tau katofia ha lautolu.
17 Ne tohi ai a lautolu oti na ke he tau matohiaga ha lautolu, ke he vaha ia Iotamo ko e patuiki a Iuta, ke he vaha foki a Ierepoamo ko e patuiki a Isaraela.
18 Ko e tau tama tane a Reupena, mo Kato, mo e taha veveheaga he magafaoa a Manase, ko e tau tagata malolo, ko e tau tagata kua maeke ke toto e akau punuti, mo e pelu, mo e fana ke he tau kaufana, ko e tau tagata kua tauteute ke tau, ne fagofulu e afe ti fa e afe fitu e teau ti onogofulu e tagata ne maeke ke o atu ke tau.
19 Ti tau a lautolu mo e tau tagata Hakara, mo Ietura, mo Nafiso, mo Notapa,
20 Ne moua e lautolu e lagomatai he tau a lautolu mo lautolu, ne tuku mai foki e tau tagata Hakara ke he tau lima he lautolu, katoa mo e tau tagata oti ha ha ia lautolu; he tagi atu a lautolu ke he Atua ke he tau, ti fanogonogo mai a ia kia lautolu, ha kua tua a lautolu kia ia.
21 Ti fofo e lautolu ha lautolu a tau fuifui manu, ko e tau kamela ha lautolu ne limagofulu e afe, mo e ua e teau afe ti limagofulu e afe mamoe, mo e ua e afe asini, katoa mo e taha teau afe tagata.
22 Ne veveli ai mo e mamate e tau tagata tokologa, ha ko e mena mai he Atua he tau; ne nonofo foki a lautolu ke he mena he ha i ai a lautolu ke hoko ke he fakapaeaaga.
23 Ne nonofo e fanau he taha veveheaga he magafaoa a Manase ke he motu, ne kamata mai i Vasana ke hoko atu ki Paala-heremoni, mo Senira, mo e mouga ko Heremoni; ne tolotologa ai a lautolu.
24 Ko e tau iki ne mua he tau magafaoa he tau matua tane ha lautolu hanai; ko Eferu, mo Isai, mo Elielu, mo Asirielu, mo Ieremia, mo Hotavia, mo Iatielu, ko e tau toa malolo, ko e tau tagata talahaua, ko e tau iki ne mua a lautolu he magafaoa he tau matua tane ha lautolu.
25 Ti hala ni a lautolu ke he Atua he tau matua tane ha lautolu, mo e faivao a lautolu mo e tau atua he tau tagata he motu ne fakaoti ai he Atua ki mua ha lautolu.
26 Ti fakaohooho ai he Atua a Isaraela e patuiki a Asuria ko Pula mo Tikelata-pilesa ko e patuiki a Asuria, ti fakapaea atu e ia a lautolu, ko e tau tagata Reupena, mo e tau tagata Kato, mo e taha veveheaga he magafaoa a Manase, mo e uta a lautolu ki Hala, mo Havoli, mo Hara, mo e tapa he vailele ko Kosana, ke hoko mai ke he aho nai.