1 Nofoaga he Tau Patuiki
11 TI fakapotopoto mai a Isaraela oti kia Tavita i Heperona, kua pehe mai, Kitiala, ko mautolu nai, ko e tau huimotua hau, mo e tino hau a mautolu.
2 Ko e vaha fakamua foki he eke a Saulo mo patuiki, ko koe ni ne takitaki atu a Isaraela, mo e takitaki mai e koe a lautolu. Ne pehe mai foki a Iehova hau a Atua kia koe, Ko koe ke leveki haku motu, ko Isaraela, to eke foki a koe mo takitaki he haku motu ko Isaraela.
3 Ti o mai ai e tau patu Isaraela oti ke he patuiki ki Heperona, kia eke e lautolu e maveheaga mo Tavita ki mua a Iehova i Heperona; ti fakauku e lautolu a Tavita mo patuiki a Isaraela, ke lata mo e kupu a Iehova ne hoko mai ai ia Samuela.
4 Ti o atu a Tavita mo Isaraela oti ki Ierusalema, (ko Iepusi haia); ha ha i ai foki e tau tagata Iepusi ko lautolu ne nonofo he motu haia.
5 Ne pehe mai e tau tagata ne nonofo i Iepusi kia Tavita, Nakai hao mai a koe ki hinei. Ka e fofo a Tavita e taue ko Siona, ko e maga a Tavita foki haia.
6 Ti pehe age a Tavita, Ko e tagata ke keli fakamua e tau tagata Iepusi, to eke a ia mo tui ne mua mo takitaki foki. Ti hake mua a Ioapo ko e tama a Seruia, ti eke a ia mo tui ne mua.
7 Ne nofo foki a Tavita ke he kolo; ko e mena ia ne fakahigoa ai e lautolu, ko e maga a Tavita.
8 Ne ati takai ai e ia e maga ke kamata i Milo kua takai ai ni. Ti taute ai e Ioapo e tau mena ne toe he maga.
9 Ne tupu mau ni e lilifu a Tavita, ne fakalataha foki mo ia a Iehova Sapaota.
10 Ko e tau toa ne mua hanai he tau toa ha ha ia Tavita, ko lautolu ne fakamalolo ai fakalataha mo ia ke he hana kautu, katoa mo Isaraela oti ke eke a ia mo patuiki, ke lata mo e kupu a Iehova kia Isaraela.
11 Ko e katoatoa he totou hanai he tau toa ha ha ia Tavita; ko Iasapama ko e tama a Hakamoni, ne eke a ia mo tagata ne mua ke he tau takitaki kau; ne nikiti ai e ia hana tao ke he tau tagata tolu e teau ti keli ai e ia a lautolu ke he aho taha.
12 Ti mui age kia ia a Eleasaro ko e tama a Toto, ko e tagata Akoki, ko e taha ia he tau toa tokotolu.
13 Ne fakalataha a laua mo Tavita i Fesatamima, ne fakapotopoto ai e tau tagata Filisitia ke tau ai ke he tau; ha ha i ai e maga fonua ne tutupu ai e tau karite; ti fehola e motu ki mua he tau tagata Filisitia.
14 Kua tutu a lautolu ke he loto uho he fonua mo e laveaki mai a ia; ti kelipopo ai e lautolu e tau tagata Filisitia; ne eke foki e Iehova e fakamouiaga lahi.
15 Ne o hifo e tokotolu mai he tokotolugofulu ko lautolu ne mumua kia Tavita ke he kaumaka ke he ana i Atulama, ne heapi foki e kau he tau tagata Filisitia ke he pahua he tau tagata Refā.
16 Ne nofo a Tavita ke he taue he vaha ia; ka ko e kau leoleo he tau tagata Filisitia ha ha i Petelehema a lautolu he vaha ia.
17 Ti manako ai a Tavita, kua pehe age a ia, Kua fia inu magavai au mai he vaikeli ha ha he gutuhala i Petelehema.
18 Ti heia atu ai e tokotolu na he heagaapi he tau tagata Filisitia, mo e utu vai mai e lautolu he vaikeli ha ha he gutuhala i Petelehema; kua toto ai, mo e uta ai kia Tavita, ka e nakai mafai a ia ke inu, ka e liligi atu ai e ia kia Iehova.
19 Kua pehe age a ia, Haku Atua na e, Kia mamao ia au ke eke e mena nai; ke inu kia au e toto he tau tagata nai ne tuku lele atu ha lautolu a tau momoui? ha ko e mena o atu mo e tuku lele atu ha lautolu a tau momoui ke ta mai; ti nakai mafai a ia ke inu ai. Ko e mena ia ne eke he tau toa tokotolu na.
20 Ko Apisai ko e matakainaga a Ioapo kua mua a ia ke he tokotolu; ko e mena nikiti e ia hana tao ke he tau tagata tolu e teau mo e kelipopo ai e ia a lautolu; ti talahaua a ia fakalataha mo e tokotolu.
21 Ne mua a ia ke he tokoua ia lautolu tokotolu; ti eke a ia mo iki kia lautolu; ka e nakai hoko atu a ia ke he tokoua fakamua.
22 Ko Penaia ko e tama a Iehoiata, ko e tama he tagata malolo mai Kapeseelu, ne eke e ia e tau mena loga; ne keli ai e ia e tau tama tane tokoua a Arielu i Moapi; ne hifo foki a ia mo e keli e leona ke he luo ke he vaha ne to ai e kiona.
23 Ne keli foki e ia e tagata Aikupito, ko e tagata loa ni, ko e hana tokoluga ko e lima e kupita. Ha i ai foki ke he lima he tagata Aikupito e tao tuga ne akau fakalava he tagata lalaga ie, ti hifo a ia kia ia mo e tokotoko, ti hamuti mai e ia e tao he lima he tagata Aikupito, ti keli aki e ia a ia ke he tao ni hana.
24 Ko e tau mena na ne eke e Penaia ko e tama a Iehoiata, ti talahaua a ia fakalataha mo e tau toa tokotolu.
25 Kitiala, ne mua a ia ke he tokotolugofulu ka e nakai hoko atu a ia ke he tokotolu fakamua; ti kotofa e Tavita a ia ke pule kia lautolu kua leveki a ia.
26 Ko e tau tagata malolo foki he tau kau; ko Asaelu ko e matakainaga a Ioapo, ko Elehanana ko e tama a Toto ko e tagata Petelehema,
27 Ko Sama ko e tagata Harori, ko Helesa ko e tagata Pelone.
28 Ko Ira ko e tama a Ikesa ko e tagata Tikoa, ko Apieseru ko e tagata Anatota,
29 Ko Sipekai ko e tagata Usa, ko Ilai ko e tagata Ahoki,
30 Ko Maharai ko e tagata Netopā, ko Heleta ko e tama a Paana ko e tagata Netopaā,
31 Ko Itai ko e tama a Ripai ko e tagata Kipea, ko e maga he fanau a Peniamina, ko Penaia ko e tagata Piratonu,
32 Ko Hurai mai he tau vailele a Kaasa, ko Avielu ko e tagata Arepa,
33 Ko Asemaveta ko e tagata Pahurima, ko Eliepa ko e tagata Saalepo,
34 Ko e tau tama a Hasema ko e tagata Kesoni, ko Ionatana ko e tama a Sage ko e tagata Harari,
35 Ko Ahiamu ko e tama a Sakara ko e tagata Harari, ko Elefala ko e tama a Uro,
36 Ko Heferu, ko e tagata Mekerati, ko Akia ko e tagata Pelone,
37 Ko Heserai ko e tagata Karamelu, ko Naarai ko e tama a Esipai,
38 Ko Ioelu ko e matakainaga a Natano, ko Mepekara ko e tama a Hakeri,
39 Ko Seleko ko e tagata Amoni, ko Naharai ko e tagata Perota ko e hoa a Ioapo ko e tama a Seruia,
40 Ko Ira ko e tagata he magafaoa a Iteru, ko Karepa ko e tagata he magafaoa a Iteru,
41 Ko Uria ko e tagata Heti, ko Sapata ko e tama a Akelai,
42 Ko Atina ko e tama a Sisa ko e tagata he magafaoa a Reupena, ko e iki a ia he magafaoa a Reupena, ha ha ia ia foki e tau tagata tokotolugofulu,
43 Ko Hanana ko e tama a Maaka, mo Iosafata ko e tagata Metini,
44 Ko Usia ko e tagata Aserota, ko Sama mo Ieielu ko e tau tama a Hotama ko e tagata Aroeru,
45 Ko Ietiaelu ko e tama a Simeri, mo Ioka ko e matakainaga hana, ko e tagata Tisi,
46 Ko Elielu ko e tagata Makavi, mo Ieripa, mo Iosavia, ko e tau tama a Elenaama, mo Itema ko e tagata Moapi,
47 Ko Elielu mo Opeta, mo Iaasielu ko e tagata Mesopaia.