1 Nofoaga he Tau Patuiki

13 KUA pulega a Tavita mo e tau iki he tau takiafe mo e tau iki he tau takiteau, mo e tau takitaki ne mua oti.

2 Kua pehe atu foki a Tavita ke he fakapotopotoaga oti a Isaraela, Kaeke kua lata kia mutolu na, kua finagalo foki ki ai e Iehova ha tautolu a Atua, kia fakafano atu fakaave e tautolu ke he tau matakainaga ha tautolu kua toe ke he tau motu oti a Isaraela, ha ha i ai foki mo lautolu e tau ekepoa mo e tau tagata Levi fakalataha mo lautolu ke he tau maga ha lautolu mo e tau vao ne takai ai, kia fakapotopoto mai a lautolu kia tautolu;

3 Kia ta mai e tautolu kia tautolu e puha he Atua ha tautolu; he nakai kumi ki ai a tautolu ke he vaha ia Saulo.

4 Ti tali mai he fakapotopotoaga oti, Kia eke pihia a tautolu; he mitaki e mena ia ke he manatu he motu oti.

5 Ti fakapotopoto e Tavita a Isaraela oti, kua kamata mai i Sikora i Aikupito ke hoko atu ke he mena ne fina atu ai ki Hamato, ke ta mai ai e puha he Atua i Kiriata-iarima.

6 Kua o atu a Tavita mo Isaraela oti ki Paala, ko Kiriata-iarima haia, ko e maga a Iuta, ke ta hake ai he mena ia e puha he Atua, ko Iehova, ko ia kua haele ke he vaha he tau kerupi, kua ui ai hana higoa ke he mena ia.

7 Ti ta hake ai e lautolu e puha he Atua he fale a Apinatapu ke he fata fakataveli fou; ko Usa mo Ahio ne takitaki e laua e fata fakataveli.

8 Ti koli a Tavita mo Isaraela oti ki mua he Atua mo e ha lautolu a malolo katoa, mo e lologo a lautolu, mo e ta e lautolu e tau kitara, mo e tau napeli, mo e tau topa, mo e tau kumepalo, mo e ulo ai e tau pu.

9 Kua hohoko atu a lautolu ke he mena ne haha saito ai e Kitonu, ti fakaolo atu e Usa hana lima ke taofi aki e puha, ha kua tupetupe e tau povi.

10 Ti tupu ai e ita a Iehova kia Usa, ti ta e ia a ia, he fakaolo atu e ia hana lima ke he puha; ti mate ai a ia he mena ia ki mua he Atua.

11 Kua mamahi a Tavita ha kua oho mai a Iehova kia Usa; ti fakahigoa ai e ia e mena ia ko Faresa-usa; kua hoko mai ke he aho nai.

12 Kua matakutaku a Tavita ke he Atua he aho ia, kua pehe age a ia, To hoko mai fefe kia e puha he Atua kia au?

13 Ti nakai ta mai e Tavita e puha kia ia ke he maga a Tavita, ka e afe age mo e toka ai ke he fale a Opeta-etoma, ko e tagata Kata.

14 Ti tolu e mahina ne toka ai e puha he Atua ke he magafaoa a Opeta-etoma ke he hana fale; ti fakamonuina ai e Iehova e magafaoa a Opeta-etoma, katoa mo e tau mena oti ha ha ia ia.