1 Samuela

16 TI pehe mai a Iehova kia Samuela, To mānu a koe ha ko Saulo ato a fe? ha kua tiaki e au a ia ke nakai eke a ia mo patuiki a Isaraela; kia fakapuke e koe hau a lupo hoe manu, ke he puke lolo, ti fano a koe, kua fakafano atu e au a koe kia Iese ko e tagata Petelehema, ha kua kitia e au ke he hana tau tama tane, taha ke eke e au mo patuiki.

2 Ti pehe atu a Samuela, Ke maeke kia fefe au ke fano? ka logona ai e Saulo ti kelipopo e ia au. Ti pehe mai a Iehova, Kia uta ai e koe e punua povi fifine, mo e pehe age a koe, Kua hau au ke eke e poa kia Iehova.

3 Ti ui e koe a Iese ke fina age ke he poa; ka ko au, to fakailoa atu e au kia koe e mena ke eke, ti fakauku ai e koe maku a ia ke tala atu ai e au kia koe.

4 Ti eke e Samuela e mena ne vagahau mai ai e Iehova; kua fano a ia ki Petelehema. Ti o mai e tau patu he maga mo e vivivivi ke feleveia mo ia, ti pehe mai a lautolu, Kua haele mai kia a koe mo e mafola?

5 Ti pehe atu a ia, Kua hau au mo e mafola ke eke ai e poa kia Iehova; kia fakatapu e mutolu a mutolu, ti o mai a mutolu kia au ke eke ai e poa. Ti fakatapu e ia a Iese mo e hana tau tama tane ti ui e ia kia lautolu ke o mai ke he poa.

6 Kua o mai a lautolu, ti kitekite a ia kia Eliapo, ti pehe age a ia, Ko e moli ni, ha ha i mua a Iehova a ia ke fakauku ai e ia.

7 Ka e pehe mai a Iehova kia Samuela, Aua neke kitekite a koe ke he hana tino, po ke tokoluga he hana tino ha kua tiaki e au a ia; ha ko e mena nakai kitekite a Iehova tuga ne kitekite e tagata, ha kua kitekite e tagata ke he tino, ka e kitekite a Iehova ke he loto.

8 Ti ui e Iese kia Apinatapu, kia fina age a ia ki mua a Samuela; ti pehe atu a ia, Nakai fifili foki e Iehova e tagata nai.

9 Ti pehe atu a Iese ke fina age ai a Sama; ti pehe atu a ia, Nakai fifili foki e Iehova e tagata nai.

10 Ti pehe atu a Iese ke o age ai hana tau tama tane ki mua a Samuela. Ti pehe atu a Samuela kia Iese, Nakai fifili e Iehova a lautolu na.

11 Ti pehe atu a Samuela kia Iese, Kua katoa mai kia hau a fanau? Ti pehe mai a ia, Ne toe agaia e tama fakamui; kitiala, kua leveki e ia e tau mamoe. Ti pehe atu a Samuela kia Iese, Kia fakafano atu e koe mo e ta mai ai a ia, ha ko e mena nakai agaagai ai a tautolu ke he laulau ato hau a ia ki hinai.

12 Ti fakafano atu e ia kia ia, mo e ta mai ai a ia; ko ia foki ne kula hana lau ulu, ti mitaki hana mata, mo e mitaki ni hana tino. Ti pehe mai a Iehova, Matike ā ti fakauku ā e koe a ia; ha ko ia hanā.

13 Ti toto ai e Samuela e lupo hoe manu ne toka ai e puke lolo, ti fakauku e ia a ia ki mua hana tau matakainaga; ti hoko ai e Agaga a Iehova kia Tavita, ne kamata mai he aho ia ni. Ti matike a Samuela, ti fano a ia ki Rama.

14 Kua haele kehe e Agaga a Iehova ia Saulo, ti hoko ai kia ia e agaga kelea mai ia Iehova.

15 Ti pehe age e tau fekafekau a Saulo kia ia, Kitiala, kua hoko kia koe e agaga kelea mai he Atua;

16 Kia vagahau mai ha mautolu a iki ke he hau a tau fekafekau ki mua hau, ke kumi mai e mautolu e tagata kua iloilo he ta kitara; ka hoko mai e agaga kelea mai he Atua kia koe, ti ta ai e ia ke he hana lima, ti mitaki ai ni.

17 Ti pehe age a Saulo ke he hana tau fekafekau, Ati kumi mai ā e mutolu e tagata kua ta fakamitaki e kitara ti ta mai e mutolu a ia kia au.

18 Ti tali age ai e taha he tau fuata, kua pehe age, Kitiala, kua kitia e au e tama tane a Iese ko e tagata Petelehema, kua iloilo a ia he ta kitara; ko e tagata malolo a ia, to toa, mo e pulotu a ia he vagahau, ko e tagata tino mitaki a ia, kua fakalataha foki a Iehova mo ia.

19 Ti fakafano atu ai e Saulo e tau fekau kia Iese, kua pehe atu, Kia fakafano mai ā e koe hau a tama ko Tavita, ne ha i ai a ia mo e tau mamoe.

20 Ti uta ai e Iese e asini mo e kavega ko e areto, mo e lupo kili manu kua puke ke he uaina, mo e taha punua koti; ti fakafano atu ai e ia ke he lima he hana tama ko Tavita kia Saulo.

21 Kua hoko atu a Tavita kia Saulo, kua tu atu a ia ki mua hana; ti fakaalofa lahi mai a ia kia ia; ti eke a ia mo hoa hana.

22 Ti fakafano atu e Saulo kia Iese, kua pehe atu, Kia tu a Tavita ki mua haku, ha kua fakaalofa au kia ia.

23 Ka hoko mai e agaga mai he Atua kia Saulo, ti toto e Tavita e kitara, ti ta ai e ia ke he hana lima; ti okioki ai a Saulo, ti mitaki ai a ia, ti fano kehe ia ia e agaga kelea.