Tau Fakatai

3 HAKU tama na e, aua neke nimo ia koe haku a tau fakatufono; ka kia omaoma e loto hāu ke he haku a tau fakatufono.

2 Ha ko e mena to lafilafi atu ia kia koe e tau aho loga, mo e tau tau ke moui ai, katoa mo e monuina.

3 Aua neke tiaki a koe he fakaalofa mo e fakamoli, kia pipi ai e koe mo kahoa ke he ua hāu, kia tohi ai e koe ke he lapatohi he loto hāu,

4 Ti moua ai e koe e fakaalofa mo e monuina mitaki ki mua he Atua katoa mo e tau tagata.

5 Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu.

6 Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.

7 Aua neke fakafiailoilo a koe; kia matakutaku a kia Iehova, kia kalo kehe mo e mahani kelea.

8 To eke ia mo mena ke malolo ai hāu a pito, mo mena foki ke fakamalū aki hāu a tau huimotua.

9 Kia fakalilifu atu a koe kia Iehova mo e hāu a tau koloa, mo e tau fua uluaki foki he hāu a tau mena oti ne tutupu mai he kelekele;

10 Ti puke ai hāu a tau fale saito ke he tau mena loga; ti puapua foki hāu a tau huhua vine ke he uaina fou.

11 Haku tama na e aua neke fakateaga a koe he ke akonakiaga a Iehova; ti ua fakaatukehe foki a koe ka akonaki e ia a koe.

12 Ha ko ia kua ofania e Iehova, kua akonaki e ia a ia; tuga he akonaki he matua tane e tama tane kua fiafia ki ai a ia.

13 Uhoaki e tagata kua moua e iloilo, mo e tagata foki kua moua e pulotu;

14 Ha kua mua he mitaki e mena ne fakafua aki a ia ke he mena ne fakafua aki e ario; mo e tau mena ke moua ai kua mua ia ke he auro.

15 Kua mua hana mitaki ke he mitaki he tau penina; mo e hāu a tau mena fulufuluola oti kua nakai ni tatai mo ia.

16 Ha ha he lima matau hana e moui leva; ha he lima hema hana e koloa mo e lilifu.

17 Ko e hana tau puhala ko e tau puhala fulufuluola; mo e hana tau puhala loto oti ha ha i ai e monuina.

18 Ko ia ko e akau he moui kia lautolu kua toto atu kia ia; uhoaki foki a lautolu kua taofi ai a ia.

19 Ko e iloilo ne fakave ai e Iehova e lalolagi; ne fakamau ai e ia e lagi ke he hana pulotu.

20 Ko e hana iloilo ne vehevehe ai e tau moana; kua to mai ai foki he tau aolagi e hahau.

21 Haku tama na e, aua neke toka kehe e koe e tau mena ia mai mua hāu; kia omaoma mau a koe ke he iloilo mo e loto manamanatu;

22 To eke e tau mena ia mo moui ke he hāu a agaga, mo tau mena fulufuluola foki ke he ua hāu.

23 Ti fano ai a koe ke he hāu a puhala mo e nakai haofia; ti nakai hakina foki hāu a hui;

24 Ka takoto a koe nakai matakutaku ai a koe; to takoto ni, mo e mohe mitaki ai a koe.

25 Aua neke matakutaku a koe ke he fakamatakutaku fakalutukia, mo e malaia he tau tagata mahani kelea ka hoko mai ai.

26 Ha ko Iehova ke tua a koe ki ai; to leveki, foki e ia hāu a tau hui, neke moua e ia ne fai fi mai.

27 Aua neke lamakai e koe e mena mitaki kia lautolu kua lata ki ai, ka kua maeke kia koe ke eke.

28 Aua neke pehe age a koe ke he tagata ne katofia mo koe, Fano a, ti liu mai a koe, ti ta atu ai e au kia koe, a pogipogi; ka kua toka ai ni e mena kia koe.

29 Ua eke lagatau e koe ke kelea ai e tagata ne katofia mo koe; ka kua nofo fakahanoa a ia fakalataha mo koe.

30 Aua neke taufetoko noa a koe mo e tagata, kaeke kua nakai eke e ia ha mena kelea kia koe.

31 Aua neke mahekeheke a koe ke he tagata favale; ti ua fifili foki e koe taha he hana tau puhala.

32 Ha kua vihiatia e Iehova e tagata mahani keukeu; ka kua feofanaki a ia mo lautolu ne mahani hakohako.

33 Ha ha he fale he tagata mahani kelea e malaia mai ia Iehova; ka e fakamonuina e ia e mena kua nonofo ai e tau tagata tututonu.

34 Kua vā e ia ke he tau tagata fa vā; ka e foaki age e ia e fakaalofa noa kia lautolu ne mahani molu.

35 To eke e lilifu mo tufaaga he tau tagata iloilo; ka ko e mena ne fakatokoluga ai e tau tagata goagoa, ko e mena ke mā ai haia.